السلام عليكم ورحمة الله وبركاتة
اخواتي حبيباتي
رح احكي لكن قصة ولادتي ببنتي جنى حبيبة قلبي واول فرحتي
رح ترجعوني لاحلى ايام عشتها 
نبدا باسم الله
يعد ماتزوجت ب3 اشهر حملت والحمدلله
فرحت كتيييير كتير انا وزوجي واديش حلمنا باليوم اللي رح تشرف فيه الاميرة الصغيرة او الامير الصغير اللي رح ينور علينا حياتنا ويمليها
اول 3 اشهر من الحمل كانت جدا جدا متعبة بسبب الوحام وها الشي بعانوا منو كل السيدات لكن لما بتبلش البطن تكبر الوحدة منا من فرحتها بتنسى الوحام وبتتذكر انو في جنين عم ينمو باحشائها ويتغذى منها
صرت اروح واجي ع المراية واطلع اذا بطني كبرت ولا لسا 
ولما بلشت تكبر غمرتني السعادة انا وزوجي كل يوم اقيس اديش بطني كبرت هههههههه من فرحتي
مرت 3شهور ونصف كنت قاعدة انا وزوجي واذ بحس بحركة في بطني اتفاجات كتير وقلتلو لزوجي يالله عم يتحرك شعوري لايوصف بهديك اللحظة قلت الحمدلله ياربي انو اتحرك معناها الحمل طبيعي
كانت كل فترة تتحرك شوي وبعد الست شهور صارت تلعب كرة قدم في بطني هههههههه
رحت ع الدكتورة وقالتي اني حامل ببنوتة اممم كتير انبسطتت انا كتير بحب البنات وزوجي كمان طار من االفرحة قلنا الحمدلله ويارب خلقة تامة
وطبعا الوحام لازال ولكن خف واتطور لتعب والتهابات تناسلية لكن صبرت واتحملت كرمال فلذة كبدي يلي عم انتظرها
مرت التسع شهور والحمدلله بكل سلامة بدو نمضاعفات ولاشي
كان يوم اربعاء صحيت الفجر صليت وحسيت بشوية الم بحوالبي والم بسيط في ظهري فرررحت كتير انو رح اولد واشوف بنوتي الامورة هدية ربي
بس بنفس الوقت كنت خايفة من الطلق والولادة 
فيقت زوجي قلتلو عم اتالم قلي ليكون عم تتوهمي
قلتلو لا والله في الم بس بسيط طار النوم من عيونو من الفرحة
وضلينا قاعدين للصبح عم نستنى انو اذا زاد الام اتصل بالدكتورة واروح المشتشفى
وطبعا انا قبل اسبوع كنت مجهزة اغراض البيبي
والشنتة تبعه واغراض الي يعني كلشي جاهز
اروع شعور وانتي عم تجهزي اغراض الولادة
الساعة 5 العصر زاد الالم لكن الم محمول قلتلو خدني ع المستشفى بلكي في ولادة
رحت فحصوني الممرضات قالولي مافي ولادة روحي ع البيت واذا زاد الالم مابقى تتحملي تعالي
بصراحة انا انقهرت 
قلتلن والله عم اتالم
ماردو علي وقالولوا لزوجي خدها وجيبها بكرا
والله رحنا وكانت ماما الله يخليلي ياها معي وطول اليوم وانا عم اتالم
باليل زاد الالم اتحملت لتاني يوم وكان الخميس
الساعة 12 الظهر مابقى اتحمل الالم وماما وحماتي بكل برودة اعصاب قاعدين عم يتفرجوا علي
قال شبك لسا ماشفتي شي اتحملي وانا جنيت منهن اتاري هنن عارفين القصة ههههههه
والله قلتلولزوجي خدني الله يوفقك لاترد عليهن
والله دقينا للكتورة وقالتلي تعالي المستشفى مادام في الم كتير
رحت دخلوني ع المخاض و اصوا ت النسوان اللي عم تبكي وتتالم
اما متت رعبة قلت ياربي تيسر ولادتي وصرت ابكي
ماما وحماتي قعدوا يقراوا قرآن وانا عم اتمشى بالمستشفى واتالم والله الم فظيييييع لا احسن اقعد ولا اتسطح احترت شو اعمل
مع انو كنت مالي مصدقة ايمتا اولد سبحان الله
اجوا الممرضات وفحصوني وكل هالالم والطلق قال ما فتح الرحم غير 2 سم
انا قلت ياربي لسا بدي اتحمل هالام ليفتح 10 س ياربي دخيلك خفف الالم عني وقومني بالسلامة
وابكي وادعي لربي
قالتلي ماما تعاالي افرجيكي ع الصبايا متلك لاتخافي رحت ع الغرف الي جنبي كلهن عم يتالموا واللي عم تمشي وفي منهن سبحان الله من اول صرخة يلدوا سبحان الله
لكن انا ااااااه شو تعذبت وتالمت وهالرحم العنييييد مابقى يفتح
ضليت هيك للساعة 6 المسا
تجي الدكتورة تفحصني وتطلع من عندي وجها اصفر وزعلانة
قلتلا دكتورة شبك قوليلي شوفي قالتلي حبيبتي لاتخافي البنوتة بخير بس رحمك مو راضي يفتح غير 3 سم
انا هون خفت كتير وماما صارت تبكي وحالتنا صارت حالة 
يرجعوا يفحصوني وعلى حاله وعطوني تحريض ومافي خواص
والم شدييييييد كنت رح موت من الالم
تفرجيني ماما ع اغراض البيبي انو بلكي بنسى الالم لكن انا اقلن مابقى بدي اولد مابقى بدي البنت بس ولدت خدوها ما بقى بدي عصبت كتير وصرت اهلوس
قلتلن بدي اشوف زوجي فرجوني ياه صرت كاني عم ودع
طالعتني ماما لفوق عند زوجي وشفتو وابتسمت لكن والله كان منظري متل الاموات وشفايفي ما عم تتشقق
زوجي صار يبكي من زعلو علي طبعا انا ماشفتو بس حكولي
لانو لما شفتو ما منت بوعيي عن جد
مع كل هالالم المفروض تنزل مية الولد لكن انا ما نزلت عندي والدكتورة بلشت تخاف ع الجنين لانو تقريبا كنت فايتة بالشهر العاشر
دخلني الدكتورة وطقتلي كيس المي
صارت الساعة 9 مساء ولسا ما ولدت
اجت الدكتورة قالتلا لماما انا مابقى احسن اصبر اكتر من هيك منخاف ع الجنين يختنق لازم ندخلها ع العمليات قيصرية يعني ااااااه ع هديك اللحظة ماما مابقى يطلع صوتها وانا بس بدي اخلص
قلتلا خدوني ع العمليات كرما الله مابقى اتحمل رح موت
جهزولي غرفة العمليات ودخلت قلتلن نيموي ما بدي اشوف شي بعد هالالم مابقى اتحمل شي
قالتلي الدكتورة حبيبتي روحي انتي لاتخافي رح نيمك لترتاحي 5 ساعات هههه ولايهمك
خدروني تخدير موضعي ونمت وما عدت حسيت بشي
وضليت بالعمليات اكتر من نصف ساعة وشرفت الامورة جنى
هلا بقلن انا ولدت مرتين لانو طلق وعملية بس الحمدلله على كل شي
واجت بنوتي سليمة معافاة الحمدلله
غسلوها ولبسوها وانا نااايمة ومو حاسة بشي
وحطوها جنبي بسريرها
الدكتورة اصدا نيمتني لانو كتتتير تعبت بالطلق
بعد ساعتين بلشت اصحى
فتحت عيوني والدنيا عم تدور فيني شفت بابا واخواتي فوق راسي وعم يبوسوني ويباركولي وبابا عم تدمع عيونو يئبر قلبي
قلتلا لماما وينها بنتي فرجيني ياها حلوة فرجتني ياها وانا عيوني عم تغبش شفتها بس مو منيح ماحلاااااااااها متل القمر شقرا وبيضا متل القطن ابوس قلبا
وبعد هيك رجعت نمت وما عدت حسيت بشي لساعتين
بعدها صحيت مظبوط الحمدلله
واخدت بنتي بحضني وضميتها وشميت ريحتها الحلوة وصرت ابكي ونسيت كللل تعبي نسيت كل الالم وصرت ما يخطرببالي غير كيف بدي اربيها وارضعها واشوفها عم تمشي وتناديلي ماما ماما
اجت الدكتورة وقالتلي كيفك هبة انا رح اخد البنوتة شورايك
قلتلا ييييي ليش بقى
قالتلي مو انتي وعم تطلقي قلتي خدوها ما بدي ياها ههههههههه قلتلا لا والله خدي عيوني ولا تاخديها
لكن بلش الم العملية ودواء المعملية مابينطاااق لكن والله ارحم من الطلق وعذاب الولادة الطبيعيةيمكن كنت متت الله ستر
بعد شوي اجا زوجي ولابس طقم ومزبط حالو هههههه الله يحيميه
وجايب بوالين زهري وانا وقتها ضحكت عليه قلتلو من كل عقلك رحت تنفخ بوالين قال من فرحتو ما عرف شو بدو يعمل
وولادتي باختها ميسم كمان قيصرية لكن من دووون طلق ما اجاني طلق ابدا
الحمدلله على كل حال وهنن احلى هدية هداني ياها رب العالمين والله هلا لما بطلع فيهن بنسى الدنيا والتعب والسهر وكلشي
ماحلاهن وهنن عم ينادوا ماما بدي صندويشة ماما بدي حليب ابوس روحن
هلا جنى عمرها 3 سنوات
وميسم سنتين الا شهر الله يحميهن
يارب تطعم كل محروومة وترزقها ذرية صالحة وتعيش الفرحة الي انا عشتها يارب العاليمن
هي قصتي ادعولي الله يحمي بناتي ويخليلي زوجي و يرزقني بالولد
اتفضلوا التوزيعات مدوا ايدكن حياكن
دعواتي لكن
اللهم آمين يا رب العالمين.
وانا كمان عندي بنتين
الكبيره 3 سنين والصغيره 4 شهور
قصتك حلوة وبتحزن .. بس بيستاهلوا الاطفال ع قد غلبتهم بضلوا حلوين
والك احلى تقييم كرمال جنة الشقرا