الكريب الحلو والحادق من مطبخ الشيف مونى بالصور

السلام عليكم ورحمة الله
قبل مااكتب اى حاجة ادعولى من قلبكم ان ربنا يرزقنى الزوج الصالح
النهرده عملت الكريب باللحمة المفرومة الموز المكرمل ومصورة كل المراحل بالتفصيل
نبدء بسم الله
اول حاجة مقادير الكريب
3 كوب حليب
3كوب دقيق
6 بيضات
ربع كوب زيت
ذرة ملح
الطريقة
هنضرب بالمضرب اللبن مع البيض والزيت
وبعد كده نحط الدقيق والملح ونضربهم كويس اوى لغاية مانصل على قوام متماسك
هنجيب طاسة تيفال نحط فيها نقطة زيت
ولازم النار تكون عالية
ونحط فيها كبشة من العجينة ونفرشها فى الطاسة
لما الورقة ميكونش فيها مادة سايلة يعنى العجينة نشفت
نقلبها ونسيبها 5 ثوانى ونشيلها وهكذا لغاية ماالعجينة تخلص وفى كل مرة نحط
نقطة زيت فى الطاسة
وعشان التوضيح يبقى اكتر
اسيبكم مع الصور

شايفين العجينة لازم تكون كده

لما تكون بالشكل ده يبقى لازم اقلبها

ده بعد ماقلبتها

نيجى بقى للحمة المفرومة وطريقة تعصيجها
مقادير العصاج
ربع كيلو لحمة مفرومة
بصلة ونص
ملعقتين كبار سمنة
رشة ملح
رشة فلفل
ملعقتين شاى بهارات
6 طماطم
م ك صلصة
جزرة
فلفل اخضر
الطريقة
هنفرم اللحمة ونحط عليها البصل والملح والفلفل والبهارات
ونقلبها ونحطها ع النار ونقلبها لغاية ماتدبل نحط عليها السمنة ونقلبها تانى
بعد كده نحط عليها الطماطم مبشورة والصلصة والجزر والفلفل مخلوطين مع بعض وعليهم رشة ملح
ونقلبهم فى بعض ونحط حوالى كوباية ميه ونغطى عليها ونسيبها تلت ساعة لغاية ماتستوى
هسيبكم مع الصور بالترتيب

دى لما استوت وهاخد من على الوش 3 معالق كبار وهعين الباقى لمدة نص ساعة فى الفريزر عشان مينفعش احطه على الكريب وهو سخن

دول ال3 معالق اللى اخدتهم حطيت عليهم ملعقة كبيرة صلصة
وملعقتين كبار صويا صوص عشان ده الصوص اللى هحطه على وش الكريب وهو فى
الصينية قبل ماادخله الفرن

دى صورته بعد ماضفت عليه نص كوباية ميه وسيبته يغلى

دلوقتى هسيبكم مع صور لف الكريب لغاية مايستوى ونقدمه

ده لما حطيته فى الصينية وحطيت عليه الصوص اللى عملته قبل مادخله الفرن
هسيبه تلت ساعة بس على درجة حرارة 200 فى فرن الكهربا لو البوتاجاز هتبقى الحرارة اخفض

ده لما استوى وقدمته

تابعونى المشاركة الجاية هنزل الحشو بالموز المكرمل

نيجى بقى لحشو الحلو
مقادير الحشو
4 موزات او اى فاكهة انتى بتحبيها
كوباية سكر
2 مك زبدة او سمنة
2 م ك مياه
هنجيب السكر ونسيبه فى الحلة على النار لغاية مايبقى كراميل
ولما يبقى كراميل هنحط عليه نقطة ميه بعد كده هنحط عليه الزبدة ونقلبه
وهنحط عليه الميه ونقلبه كويس عشان لو فيه كلاكيع تفك ونسيبه يغلى
هنكون فى الوقت ده بنقطع الموز شرايح
ونطفى على الكراميل ونحط فيه الموز يستوى على البخار ونغطى
هنجيب الكريب ونحط فيه الموز من غير الكراميل بس هنضغط عليه شوية بالسكينة
فيه طريقتين للتقديم وانا مصورالكم الاتنين
اول طريقة هنحط الكراميل بعد مانصفيه عشان لو فيه كلاكيع على الكريب
تانى طريقة هنحط فى نفس الطبق جنب الكريب موز بالصوص
اسيبكم مع الصور بالتفصيل