السلام عليكم ورحمة الله وبركاته
ف البدايه حابه اشكر المنتدئ ع اتاحة الفرصه
لي بعرض موضوعي وعضوية مشكلتي استفدنا منها كثير جزاكم الله خير عليها ..~
ادخل بالموضوع اللي مدري من وين ابدا ومن وين انتهي فيه ف البدايه انا ادرس بالجامعه ثاني سنه لي تخصصت ولله الحمد تخصص جيد عمري 19 …
الله هو اعلم بالحال اللي انا فيها
حتئ تكونون علئ بينه بالمشكله من جميع جوانبها برجع لايام الثنوي كان عندي صديقات شله تقريبا 9 بنات دايم مع بعض سوالفنا وضحاكتنا روحاتنا وجياتنا قدر الله
وانتقلت الئ مدرسه ثانيه في صف ثاني ثنوي وكنت ع تواصل مع صديقاتي بعد مانقلت و تعرفت ع صديقات جدد كل وحده اطيب من الثانيه وانتقلنا الئ الجامعه وكنت احرص اني اتفقدهم كل صبح وادق عليهم وحده وحده واجمعهم ونسولف مع بعض قرابة شهرين صارت مشكله تافهه مع وحده فقط من هالشله وحقدت علي وكرهت باقي الشله فيني وسحبوا علي وحسيت ان وجهي طاح بعد عدة مواقف اذكر ع سبيل المثال اشوفهم من بعيد مجتمعين مع بعض ويسولفون ويضحكون واكون متوجهه لهم رايحه ابي اسلم عليهم يسوون نفسهم ماشافوني ويصدون ويغيرون مكانهم قلت يمكن ماشافوني مع انهم كلهم كانوا يطالعون فيني وموقف ثاني شفتهم من بعيد ورحت اناديهم بالاسما بصوت عالي ف وسط حرم الجامعه ومن شدة الصوت كل البنات التفتوا فيني الا هم سحبوا ولا كأنهم شافوا او سمعوا شي وموقف بعد موقف قلت انا اللي اسعئ وراهم وابي صداقتهم بس مو بذا الطريقه اللي تهدر كرامتي يوم بعد يوم سحبت عليهم ولا صرت اسلم حتئ بعدها بفتره طويله وجهي بوجه وحده منهم ع الدرج ماتقدر تصد لانها شافتني وشفتها قالت وينك من زمان ولا تسلمين ولاتسألين وكل البنات يقولون متغيره وحطوا اللوم علي قلت انتم اللي ماتبوني وقلت لها مواقفهم سلكت وطلعت من السالفه المهم رجعت لشلتي اللي باول ثنوي بس بعد تغيروا الناس ماهي مثل اول لاني من زمان عنهم بس عادي اكون جالسه معهم فجأه وحده تعتذر وتقوم وتعذر الثانيه وتقوم وتعتذر وحده ورئ الثانيه لين مايبقئ الا انا حسيت وقتها اني مفرق الجماعات خربت عليهم جلستهم صرت عادي اذا شفتهم اسلم بس مانقعد مع بعض هم يبينون كذا بتصرفاتهم بس اقعد اليوم كله بدون صديقه مايصير تعرفت علئ وحده في بداية الأمر طيبه مرررره صداقتنا دامت تقريبا ترم كامل بس للأسف ماتستاهل الصداقه حولتها الئ اعجاب وتقول للرايح والجاي اني انا جيتها وتعرفت عليها واعجبت فيها مع العلم اكره ماعلي في الدنيا الاعجاب والعياذ بالله والبنت ليست جميله حتئ ترئ في نفسها ان تكون كفؤ احد يعجب فيها ونترك الخلق للخالق طاحت من عيني وتركتها الآن انا ماعندي ولا صديقه (حقيقيه) عندي صديقات بس سلام سلام ووقت المحاضرات تجلس مع بعض ونتناقش حول المواد وكذا اما الشلتين اللي تعرفت عليهم بالثنوي سلام وكلمات رسميه بس ابي وحده افضفض لها واشكي لها وامشي معها بس بشي يرضي الله احيان يضيق صدري والجامعه كبييييييره مدري مع من اروح والا مع من اجلس تمر ساعات يكون ماعندي محاضرات انزل تحت للمصلئ ارتب المصلئ واكنس وانظف اصلي الضحئ اقرا قرآن بس الوقت يضيق الصدر كن عقارب الساعه ماتحرك الوقت طووووويل اقعد لحالي وأنا من النوع اللي ماأثق بأي بنت يجون بنات مصالح بالمحاضره لاني حريصه ع المحاضرات مافوت ولا محاضره وكتبي كلها محدده واكره هالنوعيه من الناس اصحاب المصالح احيانا افكر اقول ياربي ليش البنات اللي تعرفت عليهم ماعاد يبوني انا مثلي مثل غيري بس احيانا تجيني افكار اقول يمكن شكلي غلط بينهم انا دبه وقصيره طولي 154 يمكن عشان شكلي مدري وفكره تودي وفكره تجيب والشيطان يلعب علئ الحبلين بس والله الدنيا ماتسوئ بدون ماحد يشاركك يومك
ابي حلول وكيف اتعرف علئ بنات احس ربي كاتب لي اعيش بدون صديقات دعواتكم تكفون وحلول اقدر اسويها بس الشلتين اللي تعرفت عليهم قبل لاحد يقولي ارجعي لهم والله النفس اذا عافت خلاص تعاف واذا طاح وجهي عشانهم مرات ومرات وهم ماحسوا مابيهم ولا افكر ارجع لهم لأني اصلا ماني شي بعينهم ابي صديقات يعاونون دنيا ودين ولا يتمسخرون علي ولا علئ شكلي ولا ع اسلوبي ..~
تكفون ياإداره نزلوا الموضوع اول مره اشارك بموضوع خاص زي كذا والله اني ابي اي رد يريح النفس والا دعوه مستجابه الله يرزقني بصديقات صالحات والله يبعد عني صديقات السوء ويصلح النيه ..!
هذآ رأيي أنـآ ، والنآس مختلفين
ان شاء الله ينفعوكِ البنآت البآقيين
دمتي ي قلبي 🙂
تأثر على الشله وتغيرهم عليج
المفروض ماعطيتها مجال تنفرد بالشله وتغيرهم عليج
واذا ماتبين ترجعين لهم خلاص اجل حاولي تتعرفين على البنات الي معاج بالمحاضرات
ولاتعقدين الأمور وتقولين صديقات مصلحة
لازم تسهلين الامور شوي واذا على قولج يبونج مصلحة هم انتي صادقيهم مصلحة
عشان تقضين وقتج وماتقعدين بروحج وتتسلين معاهم
طبعاً مو أي بنت لا اختاري الصحبه الصالحة
ويمكن مع الوقت تقلب صداقتكم لصداقة حقيقية
وتصيرون مثل الخوات
ولاتقولين عشان الشكل صدقيني الصداقة الحقيقيه ماتتأثر بالشكل
والله يوفقج ويرزقج بالصحبة الصالحة
موووفقة