مرحبا
اسمي جوانة وعمري 18 .. الاصل من كردستان العراق
مشكلتي يا ناس هي الحب .. والله حاسة اني راح اموت والدنيا كلش مسودة بعيني يا ناس فهموني معقولة المشاعر تتبدل هيجييييي بسرعة والحب يتحول الى ذكريات ؟؟؟ والله والله الموت اهون من الي انا عايشة بيه ..
قصتي بدت قبل سنتين لما اتعرفت على شاب كردي من العراق بنفس المدرسة الي اني اداوم بيها.. علاقتنا بدت لمن ضافني عالفيس بوك بعدها صرنا نكعد ويا بعض بالمدرسة ونسولف عادي .. وطبعا هالشي كلش عادي جان لانو احنا عايشين بدولة اوروبية .. المهم بعده بشهرين اعترفلي بحبه وكالي انو هو جاد ويريدني من صدك .. طبعا مانكر انو اني هم جنت معجبة لان هو ما شاء الله كلش وسيم وينحب بسرعة لكن مع ذلك ماوافقت لانو اولا هو مسلم و اني جنت مسحية .. هوو اصر انو نكون مع بعض وابد ما خلاني والله جان يكعد بالساعات عالنت بس يحجي ويايه والرسائل ابد ما تتوقف ودايما يتصل بيه بحيث انو حتى دراسته اهملها بسببي .. جان يكولي جوانة اني اريدج انتي وبس ومستعد اني اخطبج هسه ونتزوج بالرغم من انو هو عمره 20 سنه يعني بهذاك الوقت جان 18 والاولاد بهذا العمر طبعا مايفكرون بالزواج .. المهم يا بنات الادمي هذا خلاني احبه هووواي والله اتعلقت بيه كثير خاصة انو اني جنت صغيرة عمري جان 16 يعني هو جان اول شخص بحياتي عشقته من كل قلبي وهو الي عرفني عالدين الاسلامي , اسلمت وعلمني عالصلاة والصوم اوووف ياربي كلما اتذكر ذكرياتنا اموت من القهر .. ضلينا ويا بعض تقريبا سنه ونص عشنا احلى ايام ويا بعض هوو جااااان يعشقني بمعنى الكلمة والله يمكن جنت اسعد انسانة بالدنيا بس يا فرحة ما تمت .. بعد سنة ونص حب بده حبيبي يتغير علية ما يتصل مثل قبل الرسائل شبه معدومة .. برودددد ماكو منه .. المهم انا قدرت اخذ كلمة السر مال الفيس بوك مالته ولكيت انو هو متعرف على بنت سويدية تلعب فوت بال وياهم بالعطل ومبين من طريقة محاتته انو هو متعرف عليها جديد ومعجب .. بعد ماقريت المحادثة رااسا خابرته علمود اعرف السبب لكن يا بنات حتى ماقبل يسمعنى؟ تدرون شنو كلي؟ كلي ليش تخابرين بهذا الوقت كلش ازعاج وراسا قفلها بوجهى.. الساعة طبعا كانت 12 وهو كان صاحي .. المهم الصبح اتصل بيه اعتذر وراد مني انو نبدي من اول وجديد لكن اني كرامتي اهم من كلشي لهذا كتله خلاص كلشي بيناتنة انتهى ماريد اظل ويا واحد اتغيرت مشاعره اتجاهي ويدور غير وحدة .. طبعا قطعت علاقتي بيه وماكذب اذا اكول عشت بعذاب ماكو منه خاصة لانو جان عدنا عطلة ووما جنت اشوفه ف كنت اشتاقله هواي .. المهم بعد ما بدينا المدرسة اجا حجى ويايه وكلي انو هو مشتاقلي ويريدنا نرجع لبعض انا ماقبلت وهو كان يعيد هالطلب تقريبا كل شهرين لكن انا حسيت انو هو متغير والله حتى كلامه ما كان مثل قبل .. حبيبي الحنون الي مثل قلبه ابد مافي صاير شخص ثاني .. صرت اسمع عنه اشياء هواية .. مثل انو يطلع مع بنات واشياء ابد مو زينه .. طبعا انا كنت اتألم والله حتى دراستي اهملتها بس افكر بيه وبأيام زمان .. وعلمود اتخلص من هالعذاب قبل شهر وافقت اني ارجعله طبعاا بعد ماهو حجى ويايه وكلي انو هو يريدني لاني خوش بنية وهو مستحيل يتزوج وحدة اوروبية يريدله وحده ومن بلده. طبعا اني فرحت وكلت يمكن يتغير لكن مع الاسف صديقتي مره شافته مع بنت سويدية كانو مع بعض بالباص انا هنا انهاريت وسويت مشكلة جبيرة وياه حسيت انو حتى هو ضاج ففضل انو نبتعد عن بعض , هو ما كالها لكن حسيت انو هو هكذ قصده .. المهم هسه ماكو شي بيناتنه بس سلام ..الشي الي قاهرني انو هو حياته صارت بس بنات يعني اتخيلو اليوم بالصدفة عرفت من صديقه انو هو جان طالع برا ويا وحدة بنت من الجامعة واشي الي قاهرني هو انو اني اعرفها. لكن الغريب انو لمن عرف انو صديقه حاجي ويايه عصب على صديقه وكله ليش تحجي لجوانة هجي اشياء وصارت مشكلة بيناتهم.. معقولة يخاف على مشاعري؟؟ ولا الاخ مفكر يلعبلو شوية واخر شي يرجعلي مثل كل مرة؟؟؟
وهسه اكيد كلكم تكولون اهلج مسيحين اشون يقبلون بيه, الصراحة اهلي مو كلش متدينين لان صارلنا هواية بالسويد ف الديانة مو كلش مهمة بالنسبة الهم .. يعني لو الح شوية راح يقبلون بحبيبي.
وهسه باقي بس يومين وماراح اشوفه بعد لان هو راح يتخرج وانتو ماتتصورون العذاب الي اني عايشة بيه .. اكيد هسه كلكم راح تكولون انسيه وهذا مايفيدج .. بس ياناس هذا جااااااااااان نور عيوني هذا اول حب بحياتي .. هو الي عرفني عالاسلام وخلاني اعرف شنو الصح وشنو الغلط .. والله كلما اتذكر ايامنا سوية اضل ادعي ربي يسويلي فد معجزة يخلي حبيبي يرجع مثل قبل يحبني ويهتم بيه.. هسه كلولي شنو اسوي بس علمود ارتاح من هالالم والعذاب كلما افكر انو غيري تكعد و تحجي وياه وتلمسه اموووت. ياربي الشخص هذا جان يموت عليه شلووووون اتغير هيجي راح اموووت من القهر .. والله اريده هو ووووبس .. اريده زوج الي واب لأطفالي نعيش تحت سقف واحد وتنتهي مشاكلنا ادعوليييي يا بنات والله ايامي اكضيها بس بكى وادعية 🙁
واتمنى لك كل خير والله يوفقك ويرزقك من حيث لا تحتسبي
هسه المطلوب من عندج ورده
انه تتعمقين بتعلم الدين الاسلامي
وتعرفين انه هالعلاقات يشوبها بعض المحاذير
الحب وتعلق القلب بهالسن لزغير همينه مشكله
تحسين بروحج محجوزه بفد زاويه ولا اكو مخرج منهه
اله الاعتبار ال مخليته براسج
حبيبج هايه : ذكري انه اكتسب اجر عظيم باخراجك من الشرك والكفر الى الديانه الصحيحه
فلايضيع اجره بهالتصرفات اتنقص من حسناته وتزيد بسيئاته
اذا بينكم حب وال اتمنه ايكون طاهر وعفيف ومابي لا لمس ولا ملحقاته
كعدي ويا وصارحيه وواجهيهه بتصرفاته الغلط اد يسويهه
وفهمي مثل منته ادغار اني همينه
ومثل ممفروض اراعي مشاعرك انته هماتين مفروض تراعي مشاعري
ولتنسين هوه حبيبج بفتره مراهقه وتحولات جسمانيه وهرمونيه تأثر علي
ومجتمع مفتوح كلشي بي مسموح ولابي محاذير
كل هالامور سوت هاي الظروف ال انتو بيهه
لازم تحجين ويا وتحطين نقاط ع الحروف ام يظل يحفظ نفسه ليمن الله يجمعكم بالحلال
لو يروح بدربه والله يساعدج عيني وتنسي
هاي الدربين اد اشوفهه
والله يكتب لج قسمة الخير عيوني
ما عرف لهجتكم
بما انك عرفتي الاسلام اكيد عرفتي ان السي التسوينه حرام و غلط
قدمي ربي الي بيت يدنه الجنه و النار على واحد بين يدينه بس بنات
انتبهي لنفسك خليه يروح الله وياه
حاسه فيك و الله بس يبيلك عزيمه
و الله يعوضك بالي احسن منه يارب
|
المشاركة الأصلية كتبت بواسطة مشكلتي
 دام انتي معجبه فية مو لازم زواج اطلعي معه وأتمشوا وشمو هوى وعيشوا الرومانسية ،لاتسمعين كلام اللي هنا أغلبهم رجال
|
؟؟؟؟؟؟؟؟؟؟؟؟
شكلك انت الرجال
انا كنت غلطانة التخرج مالته كان اليوم .. وكان اصعب يوووم بحياتي لان مر من يمي حتى سلام ما سلم جان يتصرف وكاني مو موجودة ماتتصورون شكد انقهرت لاول مره تمنيت الموت .. والله احبه من كل قلبي .. وردا على تعليق الاخت ترا حبنا جان شريف مابيه اي لمسات او هجي اشياء الحمدلله هو ابد ما جان يطلب مني هالاشياء جان يكولي براحتج ..
هسه اني شسوي علمود اتخلص من هالعذاب راح اطق من الغيرة عليه .. لان تفكيري كلش سلبي يعني اكعد افكر هذا بيوم من الايام جان حبيبي .. جان ملكي .. وهسه راح من ايدي وراح يصير لغيري يااارب صبرني