مجتمع لا يرحم المرأة
كل بنت تحلم تصير عروس و تلتقي بفارس احلامها و تعيش بالاحلام الوردية قبل ما تنخطب او بأثناء الخطبة
بس المجتمع ما بيرحم حدا في حال انخطبت البنت بعمر صغير يعني 14 او 15 بيصيروا يقولوا (اهلها بدون يخلصوا منها) او (كأنو ابنت فيها شي عيبة) و في حال البنت قررت ما تتزوج لتكفي دراستها يعني لعمر ال22 او 23 بيصيروا يقولوا (اي شو رح تنفعها الدراسة ) او (بكرة بتعنس و ما حدا بياخدها) و لو كانت البنت عادية بمواصفات متوسطة و اجاها عريس لقطة و حلو و مأمن حالو بيصيروا بيقولوا ( اي شو عجبو فيها) او ( اكيد مطبقتو و طمعانة فيه) و اذا اجاها عريس حالتو ع قدها بيقولوا (اكيد اخدتو عن حب و غصبت اهلها يوافقوا) و طبعا في حالات كتير ما انذكرت ….هي طبعا بس قبل الزواج
اما بعد الزواج
ف بيبدا النق ع اصوله اذا صار حمل من اول الزواج بيقولوا (لسا بسم الله ما لحقوا شو صاير عليهون خليهون يتهنو بكم شهر عسل لحقانين عالواع و الويع )
اما اذا تأخرت العروس بالحمل بتبدأ الاسئلة المعروفة … ما حملت ؟ ليش شو السبب؟ ما عم تروحي ع دكتورة؟
و كأنو في مشكلة كبيرة و بيحكوا و كأنون متأكدين انو العطل من المرأة و زوجها سليم 100%
و اذا صار و تأخر الحمل لاكتر من سنة بتبدأ التعليقات الجارحة عنجد متل …شو ما عم تعرفي تحملي نجي نعلمك هاهاها؟ او …. اذا ما بتحملي هاد الشهر رح نبلش ندور لزوجك على عروس ؟؟؟؟ و كأنو الشغلة بايدينا ايمت ما بدنا نحمل بنحمل
اما اذا المرأة بديت تحمل و تجيب بنات بيصيروا يقولوا (شو هالخلفة ما بتجيب الابنات) و حتى لو جابت صبي ما بتخلص بيصيروا يقولوا (لازم تجيبيلو اخ)…..الخ
أما عن حالة الزوجة مع زوجها نفسه فاذا كان السبب من المرأة و الزوج متسلط بيصير بيهتها عالطالعة و النازلة انو هي ما بتجيب ولاد و طبعا البعض بيعلق تعليقات اقسى و بيبلش يهدد انو رح يتزوج …الخ اما اذا كان الزوج بيعرف الله ف بيصبر و بيدعي ربه و بيتوكل على الله بس هاد ما بيعني انو المرأة رح تعيش بحالة نفسية مرتاحة بالعكس رح تبقى الوساوس انو شي يوم رح يخلص صبرو و يتزوج عليها و للاسف هاد اغلب الاحيان بيصير و حتى لو صبر الزوج لشي 10 سنين بالآخر بيفكر بالحل البديل مو كرها لزوجته لا بس مشان يشوف ابنه قبل ما يموت
اما اذا كان السبب من الزوج فما على المرأة الا الصبر و تحمل حكي العالم و تعليقاتون و محاولة جميع الطرق ليصير حمل بدون تذمر من الزوج بالعكس الخوف دائما من جرح مشاعره او حتى فتح الموضوع معو واذا فتحت الموضوع معو بيكون بعد مليون مقدمة
بس السؤال اللي بيطرح نفسه……ليش اذا ما نجحت و لا طريقة للحمل و السبب الزوج المرأة بتسكت و بتقول هيك الله كتبلي اما في حال العكس بيتزوج الرجل مرة تانية و ما بيحرم حالو شي؟؟؟؟؟
او حتى لو فكرت المرأة تتطلق و ما عاد تتحمل تعيش بدون ولاد لتتزوج مرة تانية …ليش المجتمع بينظرلها انو هي الجارحة القاسية الناكرة للمعروف؟؟؟؟؟
السبب انو المرأة هي دائما الضحية و الرجل بيحقلو يعمل اللي بدو ياه و اول شي بيقولوه الاسلام حلله يتزوج 4
طيب و قلب المرأة و عواطفها و مشاعرها ما حدا بيحس فيهون؟؟؟
من زمان لما لا كان في طب و كانت الولادة بتصير ع ايدين الداية كان اذا مضى اكتر من 3 شهور و ما حملت العروس فورا يتزوج الرجل وحدة تانية و لو التانية ما حملت يرجع يتزوج تالتة و رابعة بدون ما حدا حتى يشك انو في احتمال يكون السبب منو…..طبعا هاد التفكير ممنوع
بس كان البرهان الوحيد لما يتزوج وحدة ارملة او مطلقة و يكون عندها ولاد من قبل ع قولتون هي مجربة و اذا بعدها ما حملت وقتها بس بيتأكدوا انو السبب منو
طولت عليكون يا حلوين و بالنهاية بقول الله يصبر كل مسكينة عم تعاني من قسوة المجتمع
حبيت اكتب فكرتي عن هالموضوع و عن العادات و التقاليد اللي ما زالت مستمرة ببلادنا و للاسف و خاصة اني عم اسمع كتير عن هالحالات و عن عذاب المرأة منها
اما عني انا فالحمدلله بعد 4 سنين حملت و سمعت تعليقات من الناس لشبعت بس اي وحدة عم تعاني هيك بقلها استعيني بالصبر و خلي ايمانك بالله كبير
انشالله يكون عجبكون موضوعي و عم استنى تعليقاتكون او اي حدا بيحب يضيف اي عادة انا غفلت عنها يقولها
سلام يا حلوين
ناطرة ردودكم
اختي الكريمه … اول شيء الحمدلله بأن الله قد أنعم عليك بالحمل بعد 4 سنوات ما بعرف اذا لساتك حامل او انجبتي الله يتمم حملك اذا لساتك حامل ويرزقك منه قرة عينك واذا انجبتي الله يجعله من البارين بك
اكيد حبيبتي أرضاء الناس غايه لا تدرك … وكل كلامك الي حكيتيه بصير … بس كل واحده فينا هي الي بتقدر تحول نقطة ضعفها في هذا الموضوع الى نقطة قوه
يعني لا تتحسس من الموضوع كثيرا اذا احد سألها ليش ما حملتي لهلأ ؟؟
عادي جدا تجاوب وبكل ثقه عندما يريد الله احمل هذا من ناحية المجمع الذي حولك
اما بالنسبه للزوج فهنا المشكله الكبرى … اذا كان الزوج يتقي الله في نفسه وزوجته فهنا يكون الأمر أسهل على المرأه وتقدر تتجاوز أيامها من غير أمومه وتوكل امرها الى الله
اما اذا كان الزوج مستهتر لا يتقي الله … فهنا المشكله الكبرى يعني بتكوني بمصيبه بتصيري بمصيبتين
مصيبة عدم الانجاب ومصيبة الزوج المستهتر الذي لا يخاف الله
هنا سوف تعيش الزوجه في فوضى وعدم طمأنينه … وسوف تتوقع ان يتزوج عليها زوجها في اي لحظه
أسأل الله ان يسخر لنا أزواجنا ويجعلهم قرة أعيننا … ويرزقنا منهم الذريه الصالحه عاجلا ليس اجلا
مشكوره حبيبتي على الموضوع وفتح النقاش … وان شاءالله البنات بتفاعلوا معك
يستحق التقييم والنجوم
لك مودتي
)
(
)
معاك حق حبيبتي وللأسف في كثييييير ناس بمجتمعاتنا العربيه بيعطوا
انفسهم حق التدخل بخصوصيات الغير بدون اي استئذان وكأنهم هم من زوجونا وهم
من ستكون خلفتنا من ورثتهم الاصليين
ولا يسعنا سوى قول لا حول ولاقوة الا بالله
لكن صدقيني تبقى الموده والرحمه هي من تجمع الزواج الناجح باذن الله
سواء انجبوا اطفال او لم ينجبوا
وكم من زوجين انجبوا من البنين الذكور والاناث ولكنهم يفتقرون الى الموده والرحمه في حياتهم
والعكس صحيح
ونحن هنا لانقول الا الحمدلله على كل حال ،،وان كان لنا خيرٌ في الانجاب فنسأل الله العلي العظيم ان لايحرمنا من هذه النعمه ،،وان كان لنا فيها شر فنسأل الله ان يُنجينا من شرها
جزاك الله كل خير ،،موضوع جميل
تقبلي صافي ودي وتقديري
شكرا لاحلى بنت طيوبة عالرد الحلو
انتظر المزيد