بسم الله الرحمن الرحيم
السلام عليكم ورحمة الله وبركاته
مرحبا يا حلوين اليوم حبيت انقل لكم قصة ولادتي وبالبداية احب اشكر مشرفات قسم الحمل والولادة والعضوات المميزات فيه على المواضيع الرائع والمهمة والمفيدة الموجودة هنا في هذا القسم الذي احتضني من بداية حملي للولادة
في يوم 352011 ومن الصبح كان باين علي التعب ولاحظت انه صار تنزل علي افرازات بنية (الله يكرمكم) بعدها عرفت انه رح اولد اذا مش بهذا اليوم باليوم اللي بعده طبعا جهزت شنطة المستشفى وبديت ارتب بالبيت يعني على بالي اني رح اولد طبعاانا كنت داخلة بالاسبوع 39 من الحمل.
كانت الافرازات تروح وتيجي وفي المساء طلعت انا وابني الصغير عمره سنتين ونص لنتمشى وبعدها صار يبكي بدو يروح يلعب مع بنات عمه هم ساكنين جنبنا ورحت لعندهم وضليت لصلاة العشاء وبعدها روحت على البيت وتعشيت وعلى النوم على طول بس فجاءة وانا نايمة تقريبا بعد الساعة 1:30 حسيت انه نزل مني اشي دافي وصحيت وعلى طول عل الحمام ولانها مي الراس نزلت طبعا انا خفت كثير خصوصا اني مش حاسة باي طلق وفجاءة اجاني الوجع وصار كل 10 دقايق قمت جهزت حالي وتوضيت وقرأت سورة مريم ويس والانشراح والزلزلة وضليت ادعي انه الله يسهل ولادتي وييسرها وطبعا دعيت لاهلي ولزوجي ولخواتي ولحبايبي بالمنتدى وكلما اتذكر حدا وصاني ادعيلو ادعي
طبعا ضليت ماسكة حالي وصار الوجع يجي كل 5 دقايق استنيت لحد ما اذن الفجر وبعدها صحيت زوجي علشان يصلي وحكيتله على صار معي واني بدي اولد وخليته كمان يحكي لامه (حماتي) علشان تحضر حالها وتروح معي على المستشفى
طبعا وصلنا على المستشفى وانا طول الطريق هادية ولا حكيت ولاصرخت بس ادعي بقلبي
دخلت على الممرضات وكان في وحدة كثير كويسة خلتني اروح على الحمام وبعدها فحصتني فحص داخلي وحكت ما لازم اتحرك لان الرحم فاتح 4سم وشوي وباي لحضة اولد لكن للاسف الممرضة روحت واجت وحدة غيرها حسبي الله عليها من ممرضة طبعا كل الممرضات ينطبق عليها جملة (ملائكة الرحمة) الا هاذي الممرضة ضلت تفحصني داخلي وشو تقول راس البيبي رافع يا تساعدينا على شان ننزله يا نحولك على القيصرية والله طيرت عقلي من فحصها وكلامها وبعدها زاد الوجع كثير وحكت شوي وبحطلك مسكن يمكن ساعة وهي مسكرة على حالها الباب وتسولف مع صاحبتها وانا اتلوه من الوجع
لكن بعدها ما صبرت بدا الطلق يزيد وانا مش قادرة اتحمل بديت اصرخ وانادي وادعي ربي بصوت عالي والله من الوجع اللي سببتلي اياه الممرضة
وبعدها اجى الدكتور وقالي اطمني شوي وتولدي واعطوني مهدئ ومسكن بعدها حسيت حالي بعالم ثاني
ودخلوني على غرفة الولادة وحطوني على كرسي الولادة وبدات الممرضة تحط ايدها بالمنطقه اللي معاكو خبرها قال شو بدها تنزل راس البيبي وانا اطلق طبعا انا هون صابني حالة هستيرية ضليت اصرخ واصرخ وهي تحكي ما يصير تصرخي وضليت اصرخ ونزلت رجلي من على كرسي الولادة وقلتلها نادي الدكتور طبعا الدكتور واقف عند راسي ويحكي لي : انت ليه بتصرخي طبعا انا باعلى صوت عندي لدرجة انه حماتي وماما سمعو صوتي قلت للدكتور: انا حرة بدي اصرخ وهو يحكي لي: انت كيف ولدتي اول مرة طبعا انا باعلى صوت : مش هيك ولدت والله العظيم مش هيك
وما حسيت الا وانهم يعطوني ابرة منوم ومهدئ وصحيت والا الساعة 11 وشوي وكل الممرضات يحكولي الحمدلله على السلامة وانا طبعا صوتي رايح من الصراخ طبعا انا ما شفت الممرضة اللي عذبتني والا كنت بدي اردلها الواجب اللي عملته معي
وبعدها طلعت على غرفتي وشفت امي وحماتي واجى زوجي وتطمنو علي وانا ما الي صوت وحماتي تقول فضحتينا بصوتك كان ملي المستشفى
طبعا الممرضة طلعت حاطة الي طلق صناعي على شان عنق الرحم يتوسع والدكتور بهدلها لانه سبحان الله انا عندي عنق الرحم كثير ضيق يعني خلقة ربانية والدكتور كمان حكالها انه راس البيبي مش رافع وهي مصرة على كلامها مفكرة حالها انها تفهم اكثر من الدكاترة
طبعا الحمدلله على كل اشي ولدت الساعة 9:15 الصبح يوم الاربعاء 452011 وجبت بنوتة ما شاء الله عليها صحيح تغلبت بولادتها وكانت اصعب من ولادتي الاولى بس كل شي يهون على شان نشوفهم بين ايدينا
نصيح لكل الحوامل اللي على وجهه ولادة وخصوصا البكريات ما تقارني حالك باي وحدة حامل ولو سمعتي عن ولادة او قرأتي او وحدة حكتلك عن ولادتها لا تقارني اللي صار معاها انه يصير معاكي لان سبحان الله كل وحدة وجسمها وطبيعة رحمها وكل وحدة الله يبعثلها ساعة ولادة يمكن تكون اسهل من غيرها
وبالنهاية اللهم يسير ولادت اخواتي في لله في هذا المنتدى وسهل ولادتهن وارزق
اللهم المحرومات فيه عاجل غير آجل وارزق اختي قلبي مثل قبري بالذرية الصالحة عاجل غير اجل
آآآآآآآآآآآآآآآآآآمين يا رب العالمين
وتتربى بعزكن ودلالكن
والله انا بكرية وكلما اسمع قصة ولادة او اقراها اموت من الخوف
الله يسهلها علينا وعلى الجميع
تربى بعزكم
وتشوفيها عرووس ان شاء الله
والله يرزق كل محرووم
وشكرا على الافادة والنصيحة يا زوق
وان شاء الله كل التعب والألم في ميزان حسناتك.