طبعا الموضوع منقول
لكن انا يا امال الغد صارلي اسبوعين استخدم قشر القهوة وشفت العجب وربي خصري نحف وبطني من تحت الصدر
وسويت بحث في النت ولقيت هل موضوع الي اكدلي فوائد القشر
وانا استخدمه مع الزنجبيل
كيفكم بنات واخباركم مع الرشاقه
ماراح اطول
نا والعياذ بالله من كلمة انا مدمنة قهوة عربي درجة اولى
وفي مره من المرات رحت عند ناس وجابولي قهوة قشر البن واتجننت عليها طعمها يدوخ .المهم رحت طيران واشتريت القشر
وصرت اسويها كل يوم مع العلم انه يضاف لها زنجبيل وقرفه وقرنفل ..
طيب وين الاثارة في الموضوع ؟؟؟
حسيت انه محيط خصري نحف شوي
ولما رحت عند اختي قالتلي اني نحفانه شوي وكمان شغالاتها يقولون انه باين علي النحف
يعني انا نحفت من القشر ؟؟؟او نحفت من الزنجبيل الي مع القشر؟؟
———————————–
السلام عليكم ورحمة الله وبركاته
أختي مره الدكتور عادل عبد العال قال إن قشور البن تنحف بالذات القشر اليمني
وأنا اشتريته بس ما استخدمتها
بس أنت كيف تشربيها يعني المقادير والطريقة لو سمحت
——————————
هلا بحبايبي الي شرفوني ونورو موضوعي
بالنسبة لقشر القهوة(قشرة البن) تلاقية عند العطارين والزنجبيل شرط انه يكون طازج وتلاقيه عند محلات بيع الخضار
الطريقة:
تأخذي كمية القشر كلها وتحمصيها على النار وبعدين تحطيها في علبة ..
لما تجي تسوي القشر تاخذي مقدار ملعقتين كبيرة قشر وتطحنيها في طاحونة البيت واحد قرن زنجبيل متوسط تفرميه ناعم وتحطيهم(القشر والزنجبيل) في بكرج القهوة على الموية الحارة وتخليه يفور فورتين يعني زي ما نعمل القهوة العربي
في الترمس تحطي نص ملعقه قرنفل مطحون ونص ملعقه قرفه
ولما يفور القشر والزنجبيل تحطي صفاية على راس الترمس وتصبي القشر وبعدين
اقفلي الثلاجه وجيبيلك فنجان قهوة ونادي احد يسولفلك وسولفي عليه واشربي القشر
———————————–
حبيبتي الي سالت كم مره اشرب في اليوم انا اسوي ترمس كبير واشربه كله يعني ترمس واحد في اليوم
وان شاءالله تنحفو عليه مثلي
وعندي لكم مفاجاءة؟؟؟اليوم لبست فستان كان بالقوة يتقفل والحمدلله اتقفل بسهولة لا وصار واسع شوي الحمدلله
الخصر عندي صار منحوت يعني نحت جسمك نحت بس يبغاله استمرار
————————————
بنااات القشر ينحف وينحت الجسم نحت خاصه مع الزنجبيل
انا شربته في النفاس ونحفت مره وشربته العام ونحفت وذكرتيني فيه الحين برجعله لان عادل عبد العال مدحه كثير ويقول متتاز للنساء ويقول انه سبب نحف اهل اليمن هو القشر والله اعلم ؟؟
—————————————-
طيب يا بنات انا لي شهرين اشربه يوميا تقريبا ترمس ونص والله واحط عليه زنجبيل والله ما نحفت ولا شيء بس لاحظت انه يدر البول الله يكرمكم < أكيد موية
بس احسه بعد يطلع الفضلات يعني ينقي الجسم وغير كذا احس بطني خفيف وسد نفسيتي للأكل بس والله ما حسيت اني نحفت ادعولي والله اني خلاص الحالة النفسية واصلة صفر مشكورة حبيبتي على الموضوع ..
الا تعالي بسألك انت لما تشربيه تلقينه حار بسبب الزنجبيل ؟؟ او تقللين الزنجبيل بحيث انه ما يكون حار ؟؟ انا احيانا استخدم الزنجبيل مطحون واحيانا طازج ولي اسبوع استخدم الزنجبيل الأحمر حار اكثر خلينا نشوف ..
———————————-
ياقلبي القشر يتحمص وبعدين تدقيه ناعم وتحطيه بعلبه وتاخذي مقدار ملعقتين كبيرة
—————————————
حبيبتي انا اللحين لي شهرين استخدم القشر ولاحظت انه نحت خصري نحت
من ناحية الميزان نقصت كيلوين بس الصراحة المقاس اختلف كثير
————————
اليوم جايبتلكم خبر بمليون ريال وهو
اني كنت جالسه اسولف مع صديقتي في الجامعه فقالتلي ان ولد جيرانهم كان وزنه في 90
وكان يشرب قشر قهوة كل يوم قبل الاكل وصار وزنه 64 في خلال 4 شهور
طبعا هو اتفاجأمن النزول السريع في وزنه راح لدكتور وقاله انه كل شيء سليم وان القشر مره ممتاز للصحه بشكل عام( واذا بغى يثبت وزنه ويهضم يشربه بعد الأكل واذا يبغى ينحف زياده يشربه قبل الاكل وعلى الريق)
———————————————–
بس اللي بغيت اساله
انه القشر لازم يطحن لاني انا استخدم خلطة الاخت فن وذوق لي حوالي اربعة ايام هو اني احط القشر والبابونج والميرمية والكمون مع بعض في قارورة وصرت اشرب منهم كل يوم كوبين واحد بعد الغداء والثاني بعد العشاء
والله والله انه رائع جدا جدا
وحسيت نفسي اني نحفت وخفيت والكل لاحظ علي
بس اللي ابي اساله لازم القشر يكون مطحون لانه الاخت فن وذوق تقول انه ما يطحن
فالرجاء اللي عندها اي خبرة على انه يطحن تقولي الله يعافيها يا رب
———————————
القشر حسب الي عرفته انه ماله اي ضرر ان شاءالله
انا كنت اشربه المغرب عادي يعني اكون مو جايعانه ولا شبعانه لاني استبدلته بالقهوة العربي
بس قالتلي صديقتي انه ولد جيرانهم نحف على القشر وكان يشربه على الجوع ويسوي رياضه ونحف عليه ولما راح لللدكتور قاله انا وصلت للوزن المطلوب اكمل القشر ولا اتركه قاله الدكتور اذا تبي تثبت وزنك اشربه على شبع بعد الوجبة
——————————
لو سمحتى يعنى احط 2 ملعقه قهوه وزنجبيل بدون ما اقطعه ولا ايش ..
والمويه كم كاس بالضبط وكل شيء كم مقداره بالضبط ؟؟ وينفع للبنت الى ما تزوجت تشرب منه كل يوم حتى ايام الدورة ؟؟
———————
انا بنت مو متزوجه واشربه يعني عادي وبالعكس هو ينظف الرحم وقت الدورة
2 ملعقه طعام قشر مطحون+1 ملعقه طعام زنجبيل مطحون طازج+ربع ملعقه صغيرة قرنفل+ ربع ملعقه صغيرةقرفه+3 كأسات كبيرة ماء
وبعدين تخليهم على النار الى حد ماتفور
———————————–
اول شي واهم شي تعليق على الاخت بنت خلف اللي تقلو احمسو القهوه واذا فركتوها يطلع القشر جمعوه . يا عزيزتي مو هذا قشر القهوه الله يهديك قشر القهوه هي القشره اللي تغلف حبه القهوه اللي نحمسها والقشره متينه كاننا جالسين نفك الفول السوداني هذا اقرب وصف لك
بالنسبه لقشر القهوه بحكم اني من الجنوب فوائده حلوه للنساء والرجال عامه
النساء وقت الدوره والنفاس ينظف الرحم ويطرد الاوساخ لكن طريقة شربه مو مثل ما تفضلتو لا يشرب كالشاهي كيف (( ناخذ قشر القهوه ونحمسه ولا نطحنه يعني ملي كف اليد قبضه نحطه في الابريق او البكرج اللي تغلون فيه القهوه ونحط عليه تمر التمر خلنا نقول 6 حبات تمر على حسب درجه الحلاوه اللي تبغيها فيكي تكثيري وفيكي وتقللي التمر لانه يضبط الحلا وفوائده كثيره وبعدين نضيف له القرفه فقط القرفه شبه مطحونه مجروشه ونخليها تغلي على النار تقريبا ربع ساعه بعد كذا نصفيه في ترمس ونشربه مثل الشاهي ..))
الفوائد العامه له هو انه ينقي الدم سواء للنساء او البنات او الرجال ولا يخلو مجلس نساء من مشروب قشر القهوه واذا ما استسغتيه ممكن تضيفين عليه السكر بس برضو بالاضافه الى التمر
بالنسبه لطريقه اختي دودا الاموره ما ادري هذي اول مره اسمع فيها لكن بجربها ما يمنع خصوصا ان مافي بيت جنوبيه الا وتلاقين عندها خيشه قشر قهوه واحنا نوصيها من اليمن
وبالنسبه للاخت الجوري بتقول انها سمعت انه مو زين للعظام
ما اتوقع يااخت الجوري ماشالله اهل الجنوب تشوفين العجوز فيهم بهالجبال انشط مننا وفنجال القشر ما تتركه لدرجه انهم مايشربون الشاهي مثلنا على العكس
————————————————
انا بصراحة طحت فيها يادودا ودك تشوفيني كل يوم شف منها …تجين تقهوين عندي بكرة؟؟
مالاحظت نحف ذاك الكبير ولا بان في الميزان لكن استمتع فيها انا كييفة قهوة عموما احب انواع الكيف كلها (ماعدا المعسل والشيشة طبعا خخ)…
بس فعلا لاحظت انها تطهّر في وقت الدورة وتريّح جدا كان عندي آلام ذاك اليوم بغيت اموت ماقد جاني وجع دورة في حياتي مثل ذيك المرة المهم وسبحان الله خف بكثير يوم اني شربتها باذن الله …