السلام عليكم خواتي
مثل ما شايفين العنوان، زوجي باختصار طفل كبير، عنيد وكسلان ويسوي اللي براسه وبس ولا يحب احد ينصحه ويقوله لازم تتغير وتتحمل المسئولية، هو انسان طيب وحنون ويحبني لكن والله راح يجنني صرت احس اني امه مو زوجته مع اني والله ما احب النكد لكن تصرفاته اوقات تخليني افقد اعصابي، بعطيكم امثلة: صارلي شهر ونص من انتقلت لشقتي الجديدة وزوجي لحد الحين ما سلك لي الغسالة يعني اضطر اخذ ملابسي كل اسبوع واغسلهم ببيت ابوي، هذا غير مغسلة حمام غرفة النوم اللي اختربت ولحد الحين ما صلحها من كسله، هذا غير ان اوقات نقعد بدون فطور لان حضرته مايبي يتعب نفسه يروح يجيب لنا خبز او شي ناكله!
ادري هالامور يمكن تكون تافهة بنظركم لكني احب الرجل اللي يكون مسئول عن بيته، اللي يهتم ببيته بدون ما زوجته تجي تقوله سو هالشي وهالشي، احب اني اعتمد على زوجي مو كلشي ابيه اروح اشتريه بروحي واسويه بروحي، هو صارله فترة من انتقلنا لشقتنا وهو يبيني اقضي اموري بنفسي ما يبي يتعب نفسه يوديني لمكان ولا يشتريلي شي ولا يسأل عن شي، صحيح اني اشتغل لكن هذا مو معناته انه ما يسألني ان كنت محتاجة لشي او ناقصني شي، انا الحمدلله كلشي متوفر لي لكن ناقصني اهتمامه، والله تعبت وانا اقوله وافهمه بس خلاص تعبت، صاير يبي يقعد يطالع التلفزيون كأنه للحين بايام العزوبية ما كأنه عنده زوجه وبيت محتاجين اهتمامه..
والله اني احبه ما ودي اصير نكدية بعيونه ودي اسعده لكن شسوي اذا يعصبني، انصحوني شسوي؟