البحث عن الحب،>> بقلمـ الكاتبهـ (طرماء و ثرثارة) >>> كـــــــاملهـ ^_^
هذه القصة اعجبتني وأتمنى ان تعجبكم
وان رأيت منكم التشجيع سوف انقل لكم الكثير من الروايات
التي احتفظ بها
الجزء الاول
البحث عن الحب
…(الفصل الأول)…
في تمام الساعه السابعه صباحا ً انطلق صوت منبه جوال ساره ….ليعلن عن بداية يوم جديد في دوام الجامعه إلي ماينتهي الا بعد طلعة الروح …سكرت ساره المنبه بتأفف وتسب وتلعن الدراسه في خاطرهاوتسب السهر في ايام الدراسه.وبعد دقايق من التقلب في الفراش بطول والعرض قامت تغسل وجههاوتبدل ملابسها..وبعد مخلصت شلت عباتها ونقابها وحطت الشيله على راسها وطلعت من غرفتها عأساس تقوم بنات عمها حصه وهند .. وأول مادخلت الغرفه حصلت حصه قايمه و قاعده تمشط شعرها وهند بعدها تسدح على سريرها..
ساره:يلا هندوووه قومي ترى بنتأخر…
هند وبعد عيونها مسكره من النوم:أففففففف لازم اليوم دوام…
ساره:نعم ..نعم.. الشيخة شقلتي قومي يلا..ولاترى بنادي خالتي تصحيج عدل.
هندعلى طول قامت:لا والي يرحم والديج كله لا ام عبدالله ناقصين نسمع محاضرات وحن لين الحين مارحنا الجامعه.
حصه وساره ماتوا من الضحك عليها ..ساره: دواج ماينفع معاج الا جذي .
وبعد ربع ساعه نزلوا البنات تحت عشان يتريقون ويرحون دوامتهم ,اول منزلو حصلو ابوعبدالله وام عبدالله وجدهم ابوخالد واختهم نور وعيالها حمد وعبدالله (نور ارمله وعايشه مع اهلها من توفى زوجها من اربع سنوات ولان زوجها ماله احد ,ابوها مارضى انها تعيش في بيت بروحها وقال لها عيالج احنا بنربيهم, وأهي ساكنه مع البنات في الدور الثاني ولها قسم خاص كامل يعني صاله وغرفه لها وغرفه لعيالها)..
ساره:جدي صباح.. الخير شلونك؟
الجد(ابوخالد)ومن غير نفس وبطريقه بارده:الحمد الله…
ساره الي تعودت على اسلوب جدها وبرود تعامله معها قامت حبته على راسه وصبحت على عمها ومرت عمها الي عكس جدها ردوا عليها بكل حب وحنان وهى اصلا ً واجد متعلقه فيهم لانها تحس انهم اهلها الي فقدتهم من ست سنوات في حادث سيارة ومن يوم الحادث هي عايشه مع عمها وبناته الي ماقصروا معها و طلعوها من محنتها يوم وفاة اهلها وكانوا مثل الاخوات الي ربي مارزق اهلها فيهم واهي الحين ماتقدر تستغني عنهم في اي شي خاص او غير خاص فيها (تقريبا ً حزب خاص فيه الثلاث ).وأما سبب برود جدها معاها لانه ماكان راضي من زواج منصور (ابوساره)من دانه (ام ساره)ولان منصور تزوج من غيررضاه ورضا اخوانه واخته نوريه التي مازالت تكره دانه وبنتها ساره وتحملها افتراق اخوانها الي اقنسموا نصفين بين الي معارض الزواج منصور والي مأيده وسبب رفضهم الدانه لانها مو من العيله ولانها كانت عايشه طول عمرها في باريس مع اخوها الي كان يدرس هناك واشتغل مع واحد من ربعه فرنسي في مشروع خاص فيهم ,وكبر هالمشروع وسارعندهم راس مال كبير وتوسعوا في هالشركه لين صاروا من اكبر الشركات الاوروبيه,ومنصور كان يتعامل مع هالشركه الي شركة سالم اخو دانه وصار بينهم صداقه وفي يوم من الايام منصور شاف دانه صدفه مع اخوها في شوارع باريس وسلم عليهم وتعرف على دانه ,وبعد اكثر من لقاء صار بينهم قرر منصور انه يتقدم لها,وبعد مارجع البلد خبر ابوه بالسالفه كلها لاكن ابوه رفض رفض قاطع انه يتزوج وحده مش منهم ولامن العيله وبعد عايشه برى وقال اكيد بتكون مضيعه مذهبها,وعلى هذا المنوال حاول منصور يقنع ابوه وعيلته بزواجه.
وكان منهم الي رضي والي منهم زعل بس منصور ماعبر حد سوا الي في باله وتزوج دانه رغم غضب ابوه عليه. وعاش مع دانه احلى سنتين من عمرهم في فرنسا.وبعد هالسنتين ردوا البلاد وكان عمر ساره ثمان شهور.وبعد مارجع منصور حاول يرجع المياه لمجاريها ويحاول يصالح ابوه,ولكن ابوه رفض انه يشوفه لين يطلق مرته .وقعد يحاول اكثر من مره ان يخلي ابوه يرفض هالمبدء لين صار عمر ساره 15 سنه والجد متقبل الوضع البارد بينه وبين ولده ولكن عياله ابوعبدالله وابوراشد قعدوا يقنعون فيه عشان يردون شمل الاسره مثل اول ,وبعد فتره تنازل ابوخالد عن كبريائه وافق على انه يصالح ولده .واول ماعرف ابوساره بالخبر ان ابوه رضى عليه بسرعه خذ بنته ومرته وراح بيت ابوه ولكن الله ماقدر انهم يفرحون بعودة الاسره لبعضهم سار لمنصور حادث الي توفى فيه اهوا مرته فى نفس اللحظه معدا ساره اللي كانت فى السياره من ورا ولاصار فيها شىء غير كسر في إيدها وخدوش في وجهها, ومن هذه اللحظه الجد مازال يحملها مسئولية فراقه لولده ,وطبعا ً العمه نوريه من نفس الموقف الي ماتحب ساره ولا سيرتها او سيرة امها.
وبعد الوقت الطويل من الذكريات ابتسمت ساره بحزن وهي أتطالع جدها لانها ماتقدر تلوم جدها على مشاعره اللي لين الحين ماندفنت رغم مرالسنين .
حصه اللي أتطالع ساره مستغربه ابتسامتها :هاه .. خلصتي احلام اليقضه .يله قومي تأخرنا ترى ورانا خلود انمر عليها(خلود بنت عمهم ابوراشد)الحين تلاقينها مزهبه لسته سب وهواش عشان الدقيقتين اللي تأخرناهم.
ساره:اي والله مالي بارض على لسانها الطويل من صبح.
البنات وهم قايمين يلبسون عباياتهم ونقاباتهم: يالله مع السلامه ..
ام عبدالله :الله يحفضكم من كل شر .
عبدالله بكل ذهول : ليش يانوف ؟ ليش خليتيني ونسيتيني ونسيتي حبنا ليش يا عمري ؟
نوف بتأفف :عبدالله لوسمحت انا الحين في ذمة ريل ..واحبه .والي كان بيني وبينك يمكن كان حركات مراهقين او أعجاب مع أني ما كنت معجبه في طريقة عيشتك اللي عايشها مع هلك لاني احب اللي يكون لي يكون لي بس مو ملك عام ….وبعدين ثاني مرة لاتتصل على هالرقم ترى تسبب لي احراج مع ريلي ..فهمت؟
عبدالله اللي ماقدر يرد عليها من هول الصدمه سكر في وجهها الجوال ..معقوله اناحبيت انسانه بهالحقاره والخسه ؟..ومعقوله انا ضيعت احلى سنين عمري عليها وهي اللي مافتكرت فيني ولاعبرت غربتي عشان ابني مستقبلنا الي طول عمرنا نحلم فيه ونخطط له؟.. وعبدالله ولاشعوريا من غير لايحس نزلت منه دموع القهر وخذ الجوال وفره على الطوفه وتكسر لألف قطعه وقعد يصارخ بأعلي صوت: ليششششششششششششش ؟..ومن بعد هالازمه عبدالله مارد للبلد لانه يحس ان الكل خانه خصوصا ً هله لانهم ماقالوا له من البدايه الموضوع ونوف اللي خانته عشان الفلوس .وطول ها ثلاث سنوات حاول عبدالله انه ينسي جرح نوف ويخليه حافز له عشان يخلص دراسته من غيرما يحس بالغربه ,وبعد هالتجربه عبدالله دفن اي مشاعر للجنس الثاني وكرهم وكل مايشوف اي بنت يحس بنفور وان صار اي احتكاك معها يتعامل معهم برود كأنه جراح يتعامل مع جثه هامده.
+++البنات كانوا في السياره ومعهم طبعا ً خلود اللي ماخلت كلمه الاوقالتها لهم بسبب التأخير والبنات ناقعين من الضحك عليها وعلى تعابيروجههاوهي معصبه : ضحكتوا من غير ضروس في عروسكم قولوا امين ..
ساره: لا والي يسلمج كل شي ولا ليله عرسنا نبي ضروسنا.
خلود: شحقه.؟
ساره:لزوم الكشخه..هاهههههها..وتمتوا يضحكون كلهم لين اوصلوا الجامعه..واول ماوصلوا كل وحده راحت لمحاضرتها هند وخلود مع بعض لانهم سنه اولى عشان كذا حاشراتهم من الصبح.وساره سنه ثالثه تخصص ادب انجليزي وحصه لغه عربيه لان خطرها اتكون مدرسه..
في البيت نور وامها قاعدين يخططون لترتيب الملحق اللي جنب الفيلا حق عبدالله لأن عبدالله كان مقرر يسكن فيه من قبل ايام كان هو نوف يخططون حق مستقبلهم لكن الحين كل شيء تغير راح يسكن فيه بروحه.
ام عبدالله:يايمه مومتطمنه حق تجهيز الملحق..
نور:انزين ليش..؟
نور: ماظن عبدالله يكون بهاالتفكير..بعدين لاتسوينها سالفه بندق عليه ونسأله عن رايه؟
ام عبدالله:شبتقولين له يعني تبين تعورين قلبه بهاالسالفه من جديد واحنا ماصدقنا انه يرد البلاد ..؟
نور واهى ماسكه جوالها : بتصل فيه ولي يصير يصير مونقعد في حوسه مانعرف شي يبيه ولي مايبيه .
ام عبدالله :برايك انتي لاعصب مالي دخل اتراضينه بسرعه .ولاتراها اقطتج انتي وعيالج في الملحق بداله وحطه في قسمج ؟
نورطالع امها وتضحك عليهاوطلعت للحديقه عشان تكلم اخوها,نورمسكت الجوال دقت على جوال عبدالله واول مارد
نور:السلام عليكم حضرة الدكتور عبدالله..
عبدالله:وعليكم السلام ..ام حمد ..بعدين بدري على الدكتور باقي خمس ايام لين اصير.
نور :أن شالله بتكون ..عالعموم شلونك وشخبارك؟
عبدالله:نحمد الله.. ماشي الحال عايشين مع هالعالم وانتي شخباركم وشخبار خواتي واخبار الغاليه واخبار الشيبان ابوعبدالله وابوخالد ؟
نور:ببببل شوي شوي كلهم بخيروعافيه.. ولو تبي اخبار كل واحد فيهم بنقعد لين بكره وحنا انتكلم.
عبدالله وهوا يضحك :عيل ليش متصله موعشان اتقولين لي اخبارهم ؟
نور :لا والله ليكون مراسله وانامادري ؟ بعدين ياشيخ متصله عشان الغاليه حشرتنا وين تبي تقعد لرديت ان شالله ؟
عبدالله:فديتها الغاليه والله محد حاس فيني غيرها.. بعدين قولي حقها اني بسكن في الملحق مثل ماكنت ناوي وبليسس نواري بلااش تاخذون الامور بحساسيه ترى موضوع نوف خالص انتهى بنسبه لي وابي ارجع وانا مرتاح مابي حد يراعيني كأني زجاج خايفين عليه لايكنسر ..انزين..
نور:ان شالله تامر امر يالدكتور وحانا نقدر عليك .. انزين يله فديت عمرك.. اخليك عشان ابشرها بكلام الحلو.. الحين تلقي الوسواس ماكل فيها.. تامر على شيء؟
عدالله:مايامر عليج عدو خلي بالج عليها..وبوسي راسها لي وسلمي على الكل ويله في امان الله.
واول ماسكرت من اخوها راحت لأمها وقالت لها السالفه كامله ,وأمها فرحت بهالخبر :يعل عيني ماتبكيك يولدي عبدالله والله يرزقك بنت الحلال..في نفس الحظه عبدالله ولد نور(4سنوات)يطالع جدته باستغراب:يديده لبيه تكلميني ؟
ام عبدالله : لبيت حاج ماقعده اكلمك.. اتكلم عن خالك عبدالله.
عبدالله الصغير :من هذا خالي عبدالله انا مشفته من قبل؟
نور:حبيبي خالك اخر مره يا هني من ثلاث سنوات يعني كان عمرك سنه ماكنت تذكر.نور التفت حق امها الي تغير وجهها كانت تتذكر اللي صار وزعل ولدها عليهم ,وحولت تغير نور الموضوع :يمه اقول وين جدي؟
امها:راح المزرعه مع الدرويل يقول يبي يودي حق دبش شعير ويبي يشوف العمال خلصوا بركة السباحه اللي مسويها ورا فيلا المزرعه.
نور:زين ولله يرب يخلصونها قبل اجازة الصيف .
امها:ان شالله..
وعبدالله من بعد ماسكر من اخته قعد يطالع نفسه في المرايه.عبدالله كان الله معطيه جمال رباني كانت عيونه كبار وشوي نعسانه وحواجبه كانت كأنها مرسومه بقلم يعني كانت واجد رفيعه تدل علا انه صاحب نظره قويه ,وشفايفه كانت مليانه شوي وكان شعره حريري يوصل لين اخررقبته وكان ابيضاني شوي وكان الله معطيه طول فارع وعرض كتوف وصدر عريض وخصر ضيق لأنه كان على طول يمارس رياضة حمل الاثقال عشان يخفف الظغط النفسي اللي يمر فيه.
عبدالله حمد ربه انه قدر يطلع من أزمته.وقرر انه يغير جو فنزل الاسواق ياخذ هدايا حق أهله, دخل اكثرمن محل وهو محتارايش ياخذ حق البنات فاخذ شنط وبديهات ومجموعة عطور واول مطلع من المحل تذكر ان بنت عمه ساكنه وياهم وماعرف شياخذ لها فحاول انه يذكر شكلها اخر مره كان عمرها 17 يعني الحين صارت حرمه فشرالها غرشة عطر شكلها راقي وايد وكان عطره مركز ,وهوطبعا ًمانسي امه وبوه وجده ماقصرفيهم شرى لكل واحد شي يناسب ذوقه وبعد حق نور وعيالها فشرى لنور ساعه من غوتشي ومجموعة عطور وحمد شراله اكس بوكس وحق السمي عبدالله جيم بوي.واول مارد الشقه حط الهدايا في شنطه بروحها عشان ماتعتفس مع ملابسه اللي من الحين حاطهم في الشنط لأنه وايد متوله للرده وحق اهله وكان مستغرب من نفسه شلون قدر يصبر علي فراقهم طول هالسنين وبعدين قرر انه يتسبح ويروح يحط راسه لأنه من الصبح قعد يحوط.
البنات اول ماردوا من الجامعه البيت طلعوا غرفهم وصلو صلاة العصر ونزلوا يتغدون في الصاله الداخليه الصغيره ,والبنات قاعدين يسولفون عن بنات الجامعه وخرابيطهم دخلت عليهم نور وسلمت وقعدت معهم :ماقلت لكم شصار اليوم.
حصه :لاوالله ماقلتي ..
هند:اكيد ياني معرس .
ساره:ولااكيد ابوخالد بيودينا حفلة كاظم …
نور:اي معرس …اي كاظم قولي بيحفر قبرك قبل حفلة كاظم .
حصه اتطالعها مقهوره منها :هاذي صدق الي بتجيب لي الجلطه تبي تموت عشان واحد مادرى عن هوا دارها…
ساره اتطالع حصه بنظره عشان تقهرها زياده:ياناس اموت فيه تكفون ودوني عنده ونسوني .
نور:صدق ماحد يعطيكم ويه وهذا انا اللي معنيه نفسي ولا رقدت العصر عشان اقولكم ..برايكم اروح ارقد احسن من مقابلقكم..
هند على طول ربعت وراها وردتها لانها تموت ولايفوتها اي خبر في البيت :خليج من ريا وسكينه وقوليلي شصاير؟
نوروتسوي نفسها معصبه على البنات:خلاص عافت نفسي مابي اقول..
ساره:لاوالي يرحم والديج تقولين عشان هند لايحوشها شي حرام سالفه تبات ماتدري عنها.
حصه:اي والله..
نور:الله يسلمكم عبدالله اليوم كلمته وبشرني انه بيرجع بعد اسبوعبن .
حصه +هند:قولي والله….
نور:صدق لاوبعد قالي مايبي حد يعامله معامله خاصة من بعد سالفته نوف ويبي ينسي الموضوع عشان تشي قالي نرتب الملحق قبل ليرد.عشان تشي ابيكم تساعدوني في الترتيب مثل لون الغرف والأثاث والمكتب.
حصه:لاماصدق اخوي حبيبي بيرد ويبي يرد مثل اول بعد اكيد انا في حلم .
هند:الله لايوفق اللي كانت السبب .. الله ياخذها..
ساره:هنوود حرام لاتدعين مو زين ..قولي الله يسامحها.
هند:الله لايسامحهالافي دنيا ولاأخره..انتي لوشفتيه اخر مره كان عذرتيني كان حطام انسان كان كاره الكل حتى امي وبوي اللي عمره ماقال شينه في وجودهم قعد يصارخ فيهم مع أن مالهم دخل بلعكس اول من تدخل في الوضوع هم حاولوا يغيرون راى نوف اللي ماعبرت جيتهم وصممت على رايها الجشع وطبعا ًامها اوقفت مثل الشاهد الصامت ماحاولت تدخل في الموضوع على قولتها بنتها هي ادري بمستقبلها ولا ابوها سمسار الكبير على بنته قال بنته الوحيده ويبي ايأمن مسقبلها تعيش حياة الرفاهيه اللي يعيشتها معاه موعيشة القبور اللي في بيتنا.بس ماقول الاأنها بنت فقر أول ماشافت معرس غني وافقت عليه ونست وعدها حق اخوي واللي قاهرني ان زوجها اكبر منها بوايد.
نور:افففففف خلونا من هالسيره …من اللي بتساعدني الحين؟
حصه :انا بختار معاج اللأثاث والاصبغ محب اعور راسي فيه دبري حالج .
نور :ماقصرتي بنت خالد .
حصه:وشدخلني عاد في الوان ملحقه الالوان اللي اعرف انه يبها كان مختارها مع حمارة القايله وانا صراحه مابيه يتذكرها في شي .
هند:لاحد يطالعني انا مكنت اعرف ذوقه… وصراحه من بعد نوف اشك في ذ وقه.
ساره :انزين لاتسونها قضيه اصبغوا الملحق الوان اهو مومتوقعها الوان تنسيه حالته النفسيه السابقه وغيرو اي ديكور كان موجود من الأول .
نور :والله فكره حلوه ليش مانسويها بس سوير مدام الفكره فكرتج ابيش تساعديني ولا عندك اعتراض .
ساره:بس هذا اخوك مو اخوي يمكن مايحب اي تدخل من طرفي .
نور :شهالكلام ..ظن ان مابينا هالكلام احنا صرنا خوان الحين الله يهداج ؟
ساوه:بس..
حصه تقاطعها:لابس ولاغيرها خلاص اهي فكرتج وتنفذينها من غير هالكلام البايخ ..تفهمين؟
ساره اللي ماسكه ضحكتها: ان شالله اخت ريا..
حصه اللي فرت منديل الأكل على راس ساره:ريافي عينج يالهبله ..
ساره وهي ميته من الضحك :بس مالي دخل اذا ماأعجبه مو تقولون هذا ذوقي ..
هند:لاتخافين مدام مايكل انجلو مراح انقوله بنقول انه اختيار امي… تعرفين مايقدر على ام عبدالله..
نور:من هذا بعد مايكل فيه…. بعد غير كاظم ؟
هند: حبيبتي هذا رسام ايطالي قديم يعني مات من زمان من قبل لايولد ابوخالد.
نور :اشوي بعد احسب بعد خبل ثاني من خبالها..
ساره:لاوالله الحين فديته كاظم خبل .
هند:ايوى والله خبل..شفيه وائل كفوري مزيون ويهبل وصوته جنان..
حصه :جني يطير راسج انتي وياهاهذا اللي هامكم بس ..
ساره:عيل مثل بعض الناس ماهمهم غير سيفوه وآخر اخباره..
(سيف هذا ولد خالت حصه وعمره 27 مثل عمر عبدالله وأهواصلا رفيجه وسيف خاطب حصه من ست أشهر وينطر تخرجها اللي بعد سنه يعني لين الحين ماملجوا بس خطبه وهو يحبها عشان جذي تقدم لها اول متوظف في شركة البترول وهي نفس الشعور تحبه بس تستحي حتي من طاريه)حصه:سيفوه في عينج ..سوير.قصدج الشيخ سيف.
ساره:أحين انا سوير وأهو الشيخ..صج معاد فيه حيا.
حصه :ليش الحيا مابقي شي ويصير ماي هزبند.
ساره :عداال والهزبند تقوليين بياع غاز أوهو هالينوفورم..
حصه:بياع غاز ريلج أن شالله قولي أمين ..انتي محتره منه لأنه أكبر مهندس في الشركة.
هند :والله متفرغين انتو ثنتين انابروح انام ..يله بخاطركم..وطلعت تغسل أيدنها وتروح لغرفتهم.
حصه:لحظه أخذيني معاج ابي أحط راسي شوي..
نور :هاه مدام الساهر مراح تحطين راسج مثل هالدبب .
ساره :تعرفيني ماحب رقدة العصر بروح أدور عبادي ألعب معاه شوي قبل المغرب ..
نور :تحصلينه في الحديقه مع حمد يلعبون كره.
وطلعت ساره تغسل أيدينها وراحت الحديقه دور على العيال وحصلت عبدالله قاعد يصيح وحمد وقف بعيد عنه والكوره في أيده.
ساره: حبيبي عبادي شفيك ليش تصيح ؟
عبادي:حماده خذ الكوره ولايخليني ألعب معاه..
حمد:حماده في عينك الحين انا صارعمري10 سنوات وتقولي حماده .
ساره:أنزين مدامك ريال وشطولك ليش ماتخليه يلعب معاك..
حمد:لأن الشيخ ياخذ الكوره ويشرد فيها ولايخليني العب معاه فيها..ماصارت عيل كرة قدم.
حمد اللي لانت ملامح ويهه من بعد كلام ساره ونزل الكوره الارض عشان يلعب فيها مع اخوه اللي مسكته ساره ومسحت ويهه بالفاين وباسته على خده وهو بعد حط ايدينه وراراسها وباسها على خدها بقو ,وقعدت على احدى كراسي الحديقه وطالعهم بفرح لأنهم ردوا يلعبون مع بعض.ساره كانت متعلقه في عيال نور من أول ماسكنت معاهم في بيت عمها وكانت تحب تلعب مع حمد في البلاي ستيشن وتلعب معاه بعض المرات كره اما عبدالله فهذا كان مثل نسمتها مكانت تستغني عنه طول الوقت معاها وين ماتروح مثل الجمعيه أوالمكتبه عشان أوراق الجامعه وكان بعض المرات ينام معاها وكان ديايما ًيقول لها انها اخته العوده لان ماعندها خوان وهوماعنده خوات.وهي كانت تحب تضيع وقتها معهم ومع بنات عمها او مرت عمها اوتدخل مع نور المطبخ يقعدون يخبصون اي شي حق العصاري وكانت دايما ً تشغل نفسها بأي شي عشان ماتقعد تفكر في خسارتها لأهلها وتحطم نفسها من الحزن وساره كانت مثل شخصية ابوها متخلي الظروف تحكم فيها وكانت وايد طموحه وذكيه وكانت نسبتها في الثانويه97%وكان اهم شي عندها دراستها لأنها تخطط تكون مثل ابوها انسان متفوق في دراسته.وهي كانت فيها من ملامح ابوها وايد مثل الغمزات اللي تبين عند اي شبه ابتسامه ومثل لون الشعر الأسود وكان شعرها وايد طويل وكثيف يعني يوصل لين تحت ردوفهاوكانت دايما ًتنزل خصل على يبهتها توصل عند حواجبهاالرفيعه وعيونها كبيره لونها دخاني مثل خالها سالم وكان طولها عادي يعني طول مناسب لجسمها الي كان شوي مليان خصوصا ً عند الأرداف وخصرها كان وايد ضعيف وكان لون بشرتها ابيض وخدودها وشفايفها ورديه كأنها حاطه غلوس يعني غلوس رباني.
عبدالله واقف في ساحة المطار ينطر الأعلان عن أقلاع رحلة العودة للبلد بعد غياب ثلاث سنوات من اخر مرة شاف أهله وكان وايد مشتاق لهم ومشتاق حق يده ابوخالد ولرفيج عمره سيف كان لين الحين مومصدق شلون قدر على فراقهم طول هالفتره ظاهر ان الغضب والقهر كانوا معمين بصيرته عبدالله كان مثل يده زعله كايد أذا زعل مايقدريحكم الأمور بعقل.وأول ماأعلنوا رحلته سحب شنطته ودع ذكرياته الحزينه وتجربة حبه الفاشل وتطلع لمستقبل يديد مع أهله وشغله في شركة العيله ويشل خرابيط الحب من راسه لأن قلبه رسم عليه أكس من بعد نوف.
في البيت البنات قاعدين يرتبون ويسون الفواله اللي كانت من أختصاص ساره وكانت داخله المطبخ من الضحى ومسويه اكثر من نوع ,وحصه كانت في الملحق تبخره وتحط عطور على فراشه وتبخر ملابسه وغتره اللي رتبتها أهي وساره اللي كانت محرجه انهاترتب أغراض ريل ماتعرف عنه شي ولاشافته ألا مرتين مره يوم عزا ريل نور ومره يوم رد عشان سالفة نوف وبعد اصلاً مسلمت عليه بس حصه اقنعتها تساعدها لأن هند لوتموت ماتشل شي ,وام عبدالله ونور كانوا في الميلس يرتبون وكانت معهم الخدامه ونوف كانت ترتب الصاله بعد شرشحه من ام عبدالله لأن الكل يشتغل ماعدا أهي حطه ريل على ريل وطالع تلفزيون,وابوعبدالله راح السوق يجيب أغراض للمطبخ مثل الخظره والفواكه وكان معه حمد .
وبعد مخلصوا شغلهم راحوا يصلون العصر ويتسبحون ويبدلون ملابسهم عشان يستقبلونه ,لأن بوعبدالله وسيف بيروحون يستقبلونه في المطار الساعه اربع ونص .وكان ابوخالد حاشرهم يبي يروح المزرعه في نفس اللحظه ويبي وحده من البنات وحده من الخدمات أتروح معاهم هووالدرويل فقعدت نور تهدي فيه لأن زعل مو زين له فقالت له بتكلم البنات .
ودخلت نور غرفة خواتها وحصلت ساره عندهم تسوي سيشوار حق هندوسكرته اول مدخلت نوروحصه ماسكه بدله لونها رملي واصفر تبي تلبسهاقالت لهم نور:يدي يبي يروح المزرعه ويبي وحده فيكم أتروح معاه عشان الخدامه ترتب الغرف وتنظفهم يقول بيسوي عشاء عبدالله هناك يوم الجمعه ويبي كل جاهز قبل العشا .
البنات سكتوا وقعدوا يطالعون بعض ساره:عادي أنا بروح ..
هند: وعبدالله..؟
ساره: شفيه عبدالله ؟أول مايرد يبي يشوف هله يعني ماراح يلاحظ غيابي وبعدين انا ابي أشوف البركه موقعها أوكيه يعني يصلح حقنا..
حصه:سوير تبين لج قص لسان شقصدج هله يعني انتي مومن هله.
ساره:حصيص عن قلب الحجي ترى قصدى موجذي قصدي يمكن يحس بلأحراج من وجودي ومايقدريرتاح معاكم ويطلع مشاعره في وجودي .
نور:أنزين ساره ترى عبدالله يبي يروح مع يدي المزرعه.
ساره :أفا عليج ترى هاذي أبوالعبد ترى في عيوني قبل قلبي …لاتوصين حريص ترى أنا أخته العوده..
نور: تسلم عيونج وقلبج والله لايحرمني منج ومن حنانج يالغاليه.
ساره: يله هنود سوي شعرج بنفسج ..بروح انزل قبل لاتصعد القوه المركزيه وتسوي أعدام جماعي .
ضحكوا البنات على خبال ساره وانصرفت كل وحده على نفسها تتعدل وساره شلت عباتها وشيلتها ونزلت ليدها وحصلته قاعد في الصاله وعبادي قاعد في حضنه .ساره : يله يدي أناجاهزه نقدر نمشي .أبوخالد قعد يطالعهاوكأنه موراضي من خوتها بس ماعلق طلع وركب السياره من غير لايعبرها وطالعت عبادي اللي شاج الحلج لأنها بتروح معاه ومسك يدها بقو كأنها بتشرد عنه ,وركبت مع الخدامه ورى وحطت عبادي في حضنها وعلى طول راحوا المزرعه.
وهم فطريق وقف يدهم عند الدكان الي في طريق المزرعه وشتري حق عبادي وساره كاكاووعصيروشبس وحب وشوية اغراض حق العمال لي في المزرعه,وكملوا طريقهم وأول ماوصولوا نقز عبادي من حضنها ونزل من حضنها صوب البط يلحقه لأن العمال فاكينه هووالدجاج ,ظحك ابوخالد عليه وطالع ساره بغير مبالاه:روحي مع الخدامه ورتبوا الفله وخصوصا ًالميالس والدكه الي عند الزرع .
ساره:أن شالله يبه بس عبدالله من ينتبه له ..؟
وراحت ساره مع الخدامه صوب الفله ويدها يطالعها بحزن مايعرف ليه لين الحين يعاملها بكره ونفس اللحظه مايرضى عليها شكت الأبره يمكن لأنها تذكره بمنصور لي راح منه وهو مقاله انه راضي عليه وانها أهي وأمها سبب فراقه هوولده وحروموه من شوفته 15 سنه بس ساره كانت اللي باقيه من منصور عشان كذا مزال متعلق فيها من غير لاتعرف وكان دايم يحسسها بالنفور عشان مايتنازل عن كبرياءه اللي انجرحت من زواج منصور وكانت هي ثمرة هالتحدي الي لين الحين جمر في يوفه.
الوقت اللي وصل فيه ابوخالد للمزرعه وصل عبدالله مطار البلاد وكان ابوه وسيف وحمد ولد نور ينطرونه ,وحمد أول ماشاف خاله ركض صوبه وحضنه وعبدالله استغرب منوهالولد اللي ماسكه فحط في باله اكيد هذا ولد نور حمد وحضنه وباس راسه:يحليلك ياحمد استويت ريال من بعدي.
حمد الي طالع خاله وعيونه متروسه دموع :شسوي لازم استوي ريال انا وراي امي واخوي وانت خليتنا عشان الدكتوراه..بس تدري كل شي يهون عشانها عشان يقولون ولد اخت الدكتور.
عبدالله: أن شالله مراح اخليكم ولا اخلي حد يبعدني عنكم .
حمد :ان شالله ياخالي..
شوي إلاويجي ابوه ويحضنه ودموعه تارسه عيونه على ولده اللي ماشافه من سنين وعبدالله باس ابوه على خشمه ويبهته وراسه وحط راسه على كتف ابوه : يبه سامحني على عهالجفى اللي كان اقوى مني وغمض عيوني ونزلت دموع الندم من عيونه .
ابوه:يا ولدي ماصار الا كل خير والمهم انك رجعت بسلامه.
عبدالله وقف قدام ابوه وهو منزل راسه مستحي ابوه مسك لحيه ورفع راسه :يابوك ارفع راسك ترى انت الحين رافع راسي ياحضرة الدكتور..وابتسم له ابتسامه كلها فخر واعتزاز.
وبعدين عبدالله التفت صوب سيف وسلم عليه وراحوا يخلصون أجراءت عبدالله من الجمارك وبعدين توكلوا للبيت ,يوم وصل عبدالله البيت سووله الحريم مهرجان صياح أمه تلوي عليه وتصيح والبنات نفس الحاله وعبدالله مامسك نفسه من هالموقف دمعت عيونه من فرحته في أهله ومن حبهم له رغم جفاه لهم طول هالمده وبعد ماسلم عليهم كلهم قعد مع أمه في نفس الكنبه وهي حاطه ايدها على خصره وهو حاط ذراعه على جتوفها وام عبدالله:الحمد الله على سلامتك يمه .
عبدالله:الله يسلمج يالغاليه..ويلتفت على خواته الصغار اللي قاعدين على الكنبه اللي ينبه هاه شلونكم وشخباركم مع الجامعه يرب المعدلات تبيض الويه..
حصه وكانت شاقه الحلج من الوناسه: الحمد الله الله يسلمك والحمد لله معدلاتنا ممتازه..وانت شخبارك ياحضرة الدكتور …وأوه نسيت أقولك ..مبروك .
عبدالله يضحك: الله يسلمج وعقبالج ..
هند :شعقباله على الكتوراه عشان تحصل سيف حافر قبرها سنه لين أتخرج موقادر يصبر تبونه ينطر الدكتوراه عزالله ياته جلطه.
ام عبدالله:هنوود وجع لاتفوليين على ولد أختي ترى أذبحج ..
عبدالله مات من ضحك على هند وحصه اللي ستوت طماطه من الأحراج من كلام هند :ليش معزم على العرس قريب .
ام عبدالله : أن شالله بعد تخرج حصه .
عبدالله :الله يتمم على خير ..أقول أم حمد وين السمي وين الشيخ؟
نور :راح مع يدي وساره المزرعه .
عبدالله:أنزين متى يرد ابوخالد ترى متوله عليه..
ام عبدالله وتغيرت ملامح ويهها :أبوي ..عبدالله ترى يدك ماخذ على خاطره منك شوي وليت إذا رد تسمح خاطره بكم كلمه ترى هذا كبيرنا ومالنا على زعله ..
عبدالله:محشوم أبوخالد ..أدري أنه زعلان علي بس أول مايي أن شاالله يسير كل خير ..
فرحت ام عبدالله من رده وعرفت أن ولدها نسي جرحه وتعاسته الأوليه ورد مثل أول,وبعد ما قعد مع هله شوي رد الميلس يسولف مع ابوه وسيف لين الخدم ينزلون الشنط ويحطونها في الملحق .
في المزرعه ساره بعد مارتبت مع الخدامه كل الغرف والمجالس الخارجيه راحت تصلي المغرب ونزلت ليدها تشوف عبادي ليكون مأذيه مالها على حشرة يدها بروحها تعبانه من الترتيب والشغل في المطبخ الضحى ,وأول مانزلت حصلت عبادي يلعب بالكوره في الحشيش اللي قدام البيت ويدها الخدم فارشين له زوليه وقاعد يطالعه وعنده دلة القهوه والشاي ورطب من المزرعه حاطه في صحن ,عبادي يوم شافها :ساروه عفيه حبيبتي لعبي معاي يدوه مارضى يلعب معاي ..
ابوخالد:وين العب معك يابوك أنابروحي ابي حد يشلني..
عبادي :عادي يدي انا بشيلك انا صرت عود.
ابوخالد:الله يعطيك العافيه ياوليدي ..وطالع ساره:هاه خلصتوا ..
ساره:ايه يبه ..رتبنا وبخرنا الفيلا كامله حتى الميلس ..وطالعت في ويهه تبي تشوف أي نظرة رضي أوستحسان من شغلها بس لبسها ولا عبرها وقعد يطالع العمال اللي عند النخل ويكلمهم ..ساره: يبه متى نروح ..
ابوخالد :الحين ..
ساره :أنزين ممكن أروح أشوف البركه قبل لنروح..
ابوخالد:أنزين روحي وخذي عبدالله معاج..بس لاتتأخرون ترى ورانا طريج..
ساره :أن شالله يبه …يله حبيبي عبادي تروح معاي انشوف البركه .
عبادي :بس شرط أتشليني على ظهرج..
ساره:ان شالله تامر أمر يابو العبد ..
ونزلت بركبها على الأرض عشان تشله وشلته وراحوا ورى الفيلا يوم شافوها كانت تخبل كانت على شكل منحنى ومدرجه على صوب وكان مركب على أطرافها كشفات كبار وايد وعاكسه الليت وطالع شكلها يهبل وتصلح حق سهرات الشله في الأجازه لأنهم مايسافرون ولايطلعون مكان إلاإذا تزوجوا بأمكان كل وحده تروح مع ريلها..وقعدت تخطط حق المغامرات مع بنات عمها في الصيف ,وقرصها عبدالله في خدها :أشفيج انصمختي يدي صار له ساعه يدق هرن ..
حصه وهند ونور راحوا مع عبدالله ملحقه عشان يشفون ردة فعله من بعد مارتبوه,اول مابطل الباب فاحت ريحة بخور العود اللي حطته حصه وبطل الليتات وقعد يطالع ديكور الملحق كان فوق تصوره ماتوقع ان يوم قالت نور بنرتبه انهم بيغرون كل شي ,كانت الصاله لونها كريمي مع ستاير عنابيه والاثاث كله كان عنابي وتلفزيون كبير في نص الصاله وفازات الورد في كل زاويه معطيه المكان شعور بالحياه ومشي لين وصل عند الباب اللي يسار وكان مكتبه ومحطوط فيه مكتب كبير وفخم لون ماهوغني وكمبيوتره كانوا حاطينه على طرف المكتب وحاطين على سطح المكتب لافته باسمه الدكتور عبدالله كانت مذهبه ومكتوبه بخط راقي وكان المكتب طوفه كلها زجاج عاكس وطل على الحديقه وكانوا مركبين عليها ستاير ذهبيه,وطلع من المكتب وراح لغرفة النوم كانوا مغيرين لونها للون البحري الخفيف وكان مهندس الديكور حاط رسم غيوم بالسقف ,واثاث الغرفه كان لونه بيج وكان في نص الغرفه سرير كبير وفخم ,عبدالله طالع خواته:صراحه ماتوقعت هالشي كل شي متغير ماشاله عليكم ماقصرتوا في شي …بس موكأن السرير كبير شوي الظاهر بسكن معاي قبيله وانا مادري ..
هند:والا ان شالله المدام اليديده .
عبدالله اختفت ملامح الفرح من ويهه وعصب من هند وهو اصلا ً كاره هالسيره ليش ترد اتذكره فيها : هنوود بلا هالسيره البايخه اللي بلامعني انتوا تعرفون اني مستحيل اثق في مره أواحبها او تزوج انا اللي همني الحين شغلي وهلي وبس..وعلى طول حصه قرصت هند وقعدت تساسر لها: هذا وقته يالسباله ؟ هند:وانا شعرفني على بالي نسي ..
في نفس الوقت نور تبي تغير الموضوع : عبدالله حبيبي ترى المطبخ الوحيد ماغيرناه لأنه يديد.
عبدالله :مايحتاي مطبخ اصلا ًكل وجباتي ماحب اكلها الا معاكم..
نور:يعل الله مايحرمك منا .
عبدالله:أمين ..يله بعد اذنكم بروح اتسبح وبدل اهدومي قبل لايي ابوخالد ..
والبنات طالعين نداهم عبدالله:تعالوا بغيت انسي تعالوا معاي غرفته النوم..
ودخلوا معاه الغرفه وبطل وحده من الشنط وطلع منها اكياس مالت الهدايا وعطى كل وحده هديتها :وهاذي حق ساره وعطاها لحصه وهدايا العيال عطاها حق نور والباقين بعطيهم بعدين.
نور: مشكور اخوي ماتقصر بس ليش تعبل على روحك جذي .
عبدالله:اي عباله يام حمد انتوا عندي الدنيا ومافيها..
نور:تسلم فديت عيونك .
حصه +هند :مشكور عبدالله .
ابوخالد وساره وعبادي وصلوا البيت مع صلاة العشا عبادي كان نعسان وساره طول الطريج قاعده تلهي فيه عشان مايرقد ويقوم اخر الليل ونزلت من السياره اول موصلوا وهي ماسكته من ايده وهو قاعد يسحب في اريوله من التعب :اوووه سوير شليني ابي انام تكفيين .ساره : ماكوا نوم الحين بعد العشا ارقد ..بعدين ملتبي تسلم على خالك اللي مثل اسمك.
عبادي ونوم طار من عيونه وشتغلت فيه الحيويه من سمع طاري خاله اللي لين الحين ماشافه : امبلا ابي اشوفه .
ودخلوا البيت وابوخالد راح المسيد يصلي العشا,واول مادخلت الصاله حصلت بنات عمها وامهم قاعدين على الكنب ويسولفون ,ساره:السلام عليكم .
الكل :وعليكم السلام .