بسم الله الرحمن الرحيم
أخباركم يابنات وياحريم ومساؤكم أو صباحكم بررررد ,,
داخله على الله ثم عليكم تساعدوني بمشكلتي هذي خصوصا اللي عندهم
خبره بالحياه الزوجيه تكفوووووووون ,,
السالفه ومافيها وسامحوني اذا طولت عليكم .. انا متزوجه صار لي
ثلاث سنوات وعندي بنوته الحين عمرها شهرين وحياتي الزوجيه مستقره
ولله الحمد وكل شي تمام وانا وزوجي نحب بعض واحترمه ويحترمني
وكل شي بيني وبينه كان اوكيه الين قبل فتره بدا يفاتحني بموضوع مدري من وين جابه انه يبي>> يتزوج
طبعا هو كان يجيبها باستبهال وانا كنت اعطيه ع جوه واقول له
تزوج الله يستر عليك عادي >>طبعا انا استهبل بعد..
المهم جلس يكرر علي هالموضوع بين فتره وفتره وانا اطنشه
بس يوم كذا طفشني وقلت له انت من جدك ولا وش سالفتك وزعلت منه
يوم شافني زعلت جلس جنبي وقال لا تاخذينها بخاطرك وتصدقين ترا احب استهبل معك وانرفزك00
هالكلام قبل سنتين واستمرت حياتنا عادي وبعدين جا ع باله يغير جواله
ويشتري بلاك بيري ..فالبدايه عصبت عليه وقلت له مستحيل
راح تدمن عليه وتهملني وتهمل بيتك بسبب هالجوال ,,
قال بكل بهدوء : ومين قال لك اني بشترك بالخدمه او اني شاريه
عشان الخدمه وحلف لي انه شاريه بس كذا من باب التغيير لانه طفش
من جواله القديم.. طبعا انا صدقته لاني صراحه حسيته صادق,,
وجلس معه الجوال تقريبا سنه وكنت بين فتره وفتره افتش بجواله
بدون لا يدري اشوف اذا مشترك بالخدمه او لا طبعا لاتلوموني 
وكل مره القاه مو مشترك وكلها مسجات عن العمل والشغل
والكرف والعملاء >>حسيت بالذنب
المهم وادري اني طولت فجأه كذا دخل علي بيوم من الايام و وجهه
بوجه الجوال واشوفه يبتسم ويضحك من الشق للشق
طبعا انا يوم شفته كذا طااااااار عقلي وعرفت على طووول انه اشترك
بالخدمه
ويوم سألته وقلت له وين كلامك اللي أول قال والله العظيم اني عند كلامي
بس زملائي بالعمل من زمان يتمسخرون علي لان معي بي بي وماني
مشترك ويقولون لي وشو له شاريه ويقولون بعد اني مااعرف له
وصارت الدعوه تحدي بيني وبينهم ووعدني انه اذا خلص الاشتراك
ماراح يجدد وقال بتشوفين ,,
انا بصراحه انقهرت وقلت له ابي اشوف المضافين اللي عندك ويوم
وراني لقيت عنده اربعه بس المهم مشيتها له وقلت له
براحتك منت صغير عشان اقعد افهمك الصح من الغلط وطلعت من الغرفه,.
وعقبها باسبوووع بس >> تخيلوا يابنات سرعة تأثير هالجوال
بعقول الرجاجيل تخيلوا انه رجع يفاتحني بموضوع الزواج ويبي
موافقتي هالمره ماحسيته يمزح وكل شي يعيد ويزيد
بالسالفه وقال انتي دوري لي وراح اعطيك اللي تبين وقال بعد
انه مايبي يتزوج بدون موافقتي عشان مايظلمني
وجلس يزن فوق راسي اسبوع كامل
انا مررررررره ارتفع ضغطي وقلت له مين اللي لاعب بعقلك وشفيك صاير
كذا (( رغم اني يابنات والله ثم والله ماني مقصره معه بشي وربي شاهد على كلامي.. بيتي نظيف وطبخي حلو وداااااايم البس له واتكشخ له
وحتى بالفراش والله ثم والله مااقصر معاه بشي ابد ابد وماعمره رجع من دوامه وحصلني نايمه.. او البيت مو نظيف اوووو… الخ))
بس مدري وشفيه كذا ويوم سألته اذا انا مقصره معه بشي
قال لا منتي مقصره بس كذا طلعت براسي وابي اجرب الثالثه
(( لاني يوم تزوجت كان مطلق ومعه ولد عمره ثلاث سنوات وانا بعد كنت مطلقه وتزوجنا بعض على هالاساس))
المهم طفشني بهالموضوع وقال لا تصيرين انانيه خليني ع راحتي
وماراح اقصر معك>> يقولها بكل برود
انا من كثر ماطفشت من هالسالفه صرخت بوجهه بصوت عالي وقلت له
خلااااااااص يرحم امك تزوج وفكني من هالساااااااالفه والله
ماطقيت لك خبر بس فكني .. تخيلوا انا اقول له كذا وهو يضحك
وبعد يوم بس >> وهنا المصيبه
رجع من الدوام كالعاده وحط راسه ع المخد وقال صحيني عقب ساعه
قلت له طيب.. وبعد ساعه يوم جيت اصحيه شفت جواله
وجاني ابليس يقول لي فتشيه
اخذت الجوال وفتحته ورحت للدردشه حق البي بي لقيته مرسل
رساله لواحد يقول له فيهاا (( يا بو فلان وش صار ع الموضوع اللي
قلت لك؟؟ ابيك تخلي الوالده تشوف لي وحده وحلاوتك عندي))
انا يوم قريت هالرساله انهبلت انجنيت انقهرت وبعدين رحت للاستوديو حق الصور لقيت عنده صور من جد ماااااااالها داعي
كلها اغراء في اغراء(( رغم انه زوجي والحق ينقال مايهتم لهالشغلات وماعمري شفت بجواله شي مو زين وهو صراحه طيب وابن ناس وخلوق ويعاملني زين وحياتي معه ولله الحمد مره كويسه يعني ماكان راعي صور وخرابيط ابد ابد الا عقب مااشترك بهالخدمه )) المهم
طلعت من الغرفه وجلست ابكي بحررررررقه والله اني بكيت
بكاء من قلب حسيت دموعي نشفت وجلست اكثر من ساعتين وانا
بس ابكي مقهوووررررره بمعنى الكلمه ومن القهر وقوة الصدمه
نسيت اصحيه وراحت عليه نومه وعقب ماهديت نفسي شوي
سمعته يناديني بس طنشته لاني يوم سمعت صوته خنقتني
العبره مره ثانيه ورجعت ابكي ويوم دخل علي سالني
وش فيني ..
قلت له بكل هدووووء خلاص انا ماابيك ودني لاهلي
ماعاد ابي اشوفك ولا اجلس معك انا كرهتك تبي تتزوج
تزوج بس انا هالبيت ماراح ادخله خير شر وانت الله يهنيك
لانك بصراحه طحت من عيني تبي تتزوج مايخالف بس انك
تحط هالصور وهالخرابيط بجوالك صدقني طحت من عيني (( وهو
واالله العظيم من عقب ماشاف هالصور وهالاغراء غصب يبي يتزوج))
ويوم قلت له كذا مسك ايدي وقال يابنت الحلال العني ابليس
والله زملائي هم يرسلون لي هالخرابيط انتي تدرين مالي فيها
قلت له طيب ليش محتفظ فيها قال يوم كنتي نفاس حسي بالفراغ
وترا كلها صور يعني احمدي ربك مارحت للحرام قلت له طيب
والرساله اللي تقول فيها لخويك خلي امك تشوف لي وحده… الخ
قال ماشاءالله مفتشه جوالي
قلت له لاااااا تصرف جاوبني
قال والله ثم والله انها مزووح واستهبال ولا اقصد فيها شي
وجلس يحط لي اعذار ومبررات ومن هالكلام
وقال لو ابي اتزوج كان من زمان وبعدين
لاتخافين موب الحين بتزوج رغم اني صااامل
>> شوفوا التناقض بكلامه
المهم والزبده انا ماعاد عرفت صدقه من مزحه لانه بصراحه لحس مخي
مره يقول ماني متزوج ومره يقول بتزوج بس موب الحين
والله العظيم اني خلاص تعبت نفسيا وتعبت من كثر التفكير
وصرت افتش وراه على طووول رغم اني ماكنت كذا ابد بس هو
اللي اضطرني اسوي هالشي لاني احبه وامووت فيه
ومااتخيل بيوم انه بيتزوج علي والله بموت قهر
وهو يدري اني امووت فيه بس مدري ليه يسوي كذا
وسؤالي لكم هو ::
من حركاته هذي كلها تتوقعونه صادق ولا ايش بالضبط
تكفووون ساعدوني وشورو علي
والله اني في حيررررره من امري لا تخلوني
تكفوون لانه بجد مايحر المره الا المره
سواء صغير او كبير المشكلة مو في البلاك بيري
المشكلة انك انشغلتي في التفكير ان زوجك وراه سالفة من واراء البلاك بيري
لاتنسين انك تزوجتية
وكنتي مطلقة من قبل يعني لاقدر الله لو تتطلقتي مرتين ؟؟
قد تكون نزوة وراح تنتهي … بس حاولي تثقي في زوجك وتثقي في نفسك اكثر
وربنا يهدي زوجك حبيبتي ويساعدك
…………………………..
اكثري من الاستغفار والدعاء بالحاح وصدقيني ربي ماراح يردك خائبه
والله حاسه فيك
لاتنسين صلاة الليل
من كلامك عنه فهمت انوه يحبك وبس ينرفزكي عشان البلاك بيري
لاتخلي الشيطان يلعب باعصابك ويوترك اكثر
زوجك يحبك وشاريك
ويقولك كذا بس عشان تتركين البلاك
قال ماله حال الا اقولها كذا
انتي ادعي ربك
واستغفري كثير
الله يجمعكم ان شالله ولايفرقكم يارب
مع تمنياتي لكي بحياه سعيده
ووفقك الله في الدارين
اختك
شكولاه
وحده متعرف عليها بالجوال اما من ناحية انه كل شوي يفتح الموضوع قولي له يا حياتي احبك واموت فيك
ونمزح مع بعض لكن رجاء لا تمزح بذا الموضوع لانه عن جد يضايقني اذا كنت اهمك ومن ناحية انك
تفتشين واره على طول عشان تلقين شي اذا عنده شي بيدسه حبيبتي ما بيخله قدامك عشان كذا ريحي راسك
هو راااح يمل منه والزواج كل الرجال يتمنون هالشي بس نصبر ولا نخرب بيوتناا وندمر عيالناا
توكلي على الله اختي
اسال الله ان يسخر زوجك لك
مالك الا الدعااء والاستغفااار
ولااا تعلقين نفسك فيه لهدرجه خلي قلبك معلق برب العاالمين وبس
واللي عليك تحترميه وتقدريه وتعزيه وتحبيه بس مو ذاك الحب اللي تخلي دموعك تنزل عشاان هالحب
خلي دموعك تنزل لخشية الله وخوفك من الله وبس
وبالتوفييييق يالغاليه