الكونسيلر أو مصحح العيوب 2024.

طبعا أول حاجة ممكن إنها تقابلك وماتعرفيهاش هي كلمة "الكونسيلر" أو مصحح العيوب بس ولا يهمك احنا هنعرف مع بعض دلوقت واحدة واحدة كل حاجة عنه.

يلاّ نشوف مع بعض

إيه هو؟

الكونسيلر أو مصحح العيوب..
هو كريم أساس بيوضع على البشرة قبل المكياج لتصحيح العيوب اللي ممكن تكون موجودة في البشرة، زي إخفاء الهالات السوداء والبقع وتصحيح ملامح الوجه، يعني مثلا ممكن إنك تستخدميه لتصغير الأنف أو الذقن أو الجبهة أو توحيد لون البشرة. يعني من الآخر كل واحد بيستخدمه على حسب احتياج بشرته.

وعلشان توزعيه على البشرة بطريقة صحيحة يبقى لازم تستخدمي صوابعك في توزيعه، وعلى فكرة يُفضل استخدامه قبل كريم الأساس للحصول مظهر طبيعي للبشرة وتغطية متجانسة، ويجوز استخدامه بعد الأساس إذا ظلت المشكلة قائمة، أو للحصول على تغطيه أكبر.

وعلى فكرة الكونسيلر ده له ألوان كتير، ولكل لون وظيفة معينة، ولازم تاخدي بالك وإنتِ بتختاري اللون إنك تشوفي الأول طبيعة بشرتك وإنتِ عايزاه ليه.. وبعد كده تختاري اللون المناسب لكِ فهتلاقي مثلا إنك ممكن تستخدمي:

• اللون الأخضر لتغطية الحبوب الحمراء اللي ممكن تكون في الوجه.
• اللون البني لتغطية الأماكن اللي إنتِ مش عايزة إنها تكون واضحة مثل جوانب الأنف لتصغيره، ولتحت العين لإخفاء الهالات كطبقة أولى توزعيه بطريقة "الطبطبة" باستخدام إيدك.
• البيج الغامق على أورانج يوضع أيضا كطبقة رقيقة على الهالات لتغطيتها فوق الطبقة الأولى، باستعمال الإصبع الصغير باليد وبطريقة الطبطبة الخفيفة.

• البيج الفاتح بتحطيه على الأماكن اللي فيها بقع في البشرة وكطبقة خفيفة ثالثة على الهالات السوداء، وماتخافيش مش هيبان إنك حاطّة حاجة؛ لأن الطريقة دي بالذات بتخفي الهالات نهائيا.
• اللون الفاتح يميل للأصفر يوضع على الأماكن اللي إنتِ عايزاها تبان زي عضمة الأنف والخدين.

وعلى فكرة ممكن إنك تستخدمي بقايا كريم الأساس الموجودة على فتحة علبة الأساس كـ"كونسيلر".

أنوع الكونسيلر:

كونسيلر كريمي

ده بيكون على شكل علبة تشبه علبة "الآي شادو" وبيكون فيه جميع الألوان، وبيكون مناسب لجميع أنواع البشرة وبيستخدم النوع ده لتصحيح العيوب اللي ممكن إنها تكون في الوجه عن طريق توزيعه على الوجه، وخدي بالك إن الألوان الغامقة بتستخدم لتصغير الأنف.

ليكويد كونسيلر

أو الكونسيلر السائل: ويستخدم لجميع أنواع البشرة، وبصفة خاصة البشرة الحساسة، وبيكون على شكل قلم أو فرشاة تشبه فرشاة الجلوس، وعلى فكرة النوع ده بيعطي تغطية شفافة وناعمة قوي على البشرة، ده بالإضافة إلى إنه غني بالسوائل والفيتامينات. وكمان فيه أنواع منه بتكون مناسبة جدا لصاحبة البشرة اللي فوق "35" سنة، وده لأنه بيساعد على إخفاء التجاعيد.

الكونسيلر العصار

وده حالة وسط بين الكونسيلر السائل والكريمي، وأيضا مناسب لجميع أنواع البشرة، وعلى فكرة ده بيوجد في ماركات معينة.

ستيك كونسيلر

أو بيسمى كونسيلر الإصبع، وبيكون مناسب جدا للبشرة الدهنية والبشرة اللي فيها عيوب كتير وهالات سوداء، بس مش مستحب للبشرة شديدة الجفاف أو للناس اللي سنهم فوق 35، لأنه بيساعد على ظهور التجاعيد بسبب سماكته.

الستيك ليب كونسيلر

يستخدم لتغطية الشفاه خاصة، إذا كانت بلون غامق أو شديدة الاحمرار ويستخدم لتصحيح الشفاه أيضا، ويمكن الاستغناء عنه بأي روج بلون لحمي عاجي، أو بنك عاجي بس يكون بدون لمعة.

الكونسيلر القلم "ليب بنسل"

ويستخدم لتكبير أو تصغير الشفاه وأيضا لتغطية التجاعيد الموجودة عند الفم. وغالبا بيكون بوجهين: فاتح وغامق.

بس كده دي كانت أنواع الكونسيلر، بس بيفضل اختيار الكونسيلر الكريمي أو السائل وأن تكون تركيبة خفيفة، وإذا كانت تركيبته تخينة نوعاً ما، يمكن مزج القليل من الكونسيلر مع الفاونديشين (كريم الأساس) لتخفيف تركيبته.

طريقة توزيع الكونسيلر

• في البداية حطي كريم مرطب مخصص سريع الامتصاص لمحيط العينين علشان الجفن يبقى ناعما ومرنا وعلشان يبقى من السهل توزيع "الكونسيلر" عليه… وده لأن لو كان الجلد جاف هتلاقي "الكونسيلر " متكسرا وغير جذاب لأنه ثقيل نوعا ما على البشرة، وبالتالي يسبب تجاعيدَ مبكرة.

• استخدمي فرشاة مخصصة أو إصبع السبابة لتوزيع الكونسيلر بطريقة (الطبطبة) علشان يذوب تماما في الجلد، واوعي تستخدمي طريقة الفرك لأن دي ممكن تجيب نتيجة عكسية. ممكن إنك تستخدمي فرشاة ناعمة أو إسفنجة للتأكد من توزيعه.

• حطي الكونسيلر على كامل الجفن الأسفل من زاوية العين الداخلية حتى الزاوية الخارجية له، وخلّي اللون يغطي جذور الرموش السفلى، وتأكدي من تغطية الاحمرار والدوائر السوداء علشان تدي اتساع جذاب لنظرة العينين.

• إذا كانت بشرتِك دهنية يبقى ماتوزعيش الكونسيلر فوق الجفن الأعلى؛ لأن ده هيخلي المكياج يسيح بسرعة.

• لو كانت الهالات السوداء واضحة يبقى حطي طبقة أخرى من الكونسيلر ووزعيه أيضا بطريقة (الطبطبة) وبعد كده ثبتيه بالبودرة الحرة "السائبة ".

• لو كانت الهالات السوداء شديدة السواد ودي حاجة ممكن إنها تكون واضحة في الناس اللي بشرتهم سمراء يبقى اختاري كونسيلر يميل إلى الوردي الباهت وثبتيه ببودرة صفراء شاحبة علشان يبان الكونسيلر طبيعيا ومناسبا مع لون البشرة.

• إذا كنت تعانين من دوائر أفتح من لون البشرة حول العينين جربي ألوانا مختلفة من الكونسيلر لإيجاد الأقرب إلى لون بشرتك وراعي اختيار لون مشابه لكريم الأساس الخاص بك أو بدرجة لونية أغمق بقليل.