السلام عليكم ورحمة الله وبركاته
انا عمري 12 سنة في اول متوسط
صديقتي اسمها ندى نفس العمر والسنة لكن هي صارت في فصل غير فصلي
هي اكثر صديقة وياي في الابتدائي تقريبا 5 سنوات
وفي يوم قالت حق صديقتي الثانيه انهاماتبيني
وانا قمت مااروح وياهم واذا رحت مع صديقاتي هي تروح مع بنت غير
واذا قمت اطالع فيها تسوي نفسها تضحك مع البنات
واحس ان ضحكتها كلها كذب احس انها تبيني ارجع وياها
صرت في وقت الفسحه اجلس في الفصل اسوي اي شي
اذاكر اسوي اي شي بس عشان مااطلع واشوفها
صار ماعندي اصدقاء ولا شي
كيف ارجعها ؟
احس بالملل
انا ماسويت لها شي ولا غلطت عليها بكلمه ودايم اسمع لها ومااعرضها بشي حتى لو ماعجبني
وخليتها تتحكم فيني وسويت لها اي شي بس عشان تضل وياي وهي ماسوت لي شي !
ليس شرطا ان تصادقيها هي فقط
كوني اجتماعية
صادقي اخريات.. احرصي على مرافقة صحبة صالحة
وفي وقت الفسحة حتى لا تشعري بالملل مارسي هواياتك ارسمي اكتبي حلي واجباتك
وفقك الله ورزقك صحبة صالحة 
وبالتوفيق
بالتوفيق حبيبتي
لو ماتبيكي ليش انتي تبينها مدامك ماسويتي لها شي وهي الي مزاعله لك الله معاها
شكلها تبيكي بس تكابر تبيك انتي تجي عندها عقبها بتذلك وكذا مدام ماسويتي لها شي معا نفسها
الله معاها تلاقين غيرها تعرفي ..
الله يحفظك سنك من سن بنت اختي الغاليه الله يحفظها
عشان كذا براعيك برد
مادري بعدك تردين تقرين ولا شردتي!
مهم
حبيبتي ادري الحين منجرحه وتحسين ملل وفراغ من بعد صديقتك القديمه ,وتحاولين تشغلين نفسك عشان تنسين
وجرحك ان ه الصديقه شبه ارخصتك . قالت ماتبيك . تتهرب اذ جيتي صوب شله
وواضح مثل ه الشمس الي فوق راسي ه الحين
تبيها انتي وتتاملين ترجع ومنعتك عنها عزة نفسك ماتنلامين
– شدراك ان بعدها تبيك ؟
فتحتي قلبها شفتي مو كل ضنون صادقه . دام فسرتي ضحكته تبيك . اجل شرودها وش تفسرينه
– من الاساس وش سبب الخلاف قصور وخطا منك ؟
اذ جاها الوم عليك ولازم تعذرين
واما دام متاكده لاجاها قصور ولا خطا منك ومجرد بطره منها من عندي ريحي ضميرك
وشرواك ينشرى قربه ومحبته وهي الخسرانه
ان جات حي هلا
وان راحت لاتتبعين خطاها
يعني هي رجلها من ذهب وانتي رجلك من فضه
المذله لله
والصداقه طبيعه وتوازن مو ذل من طرف واحد
اهتمي ب دراستك واحفظي جميل ذكرياته يعني خليها تنطوي ب هدوء لاتقبحين شي ولاتحطين نقطه خلك طبيعيه
وبتلقين الي يقدرك وتقدرينه حاولي بعد تقربين من صديقاتك الي قريبين من طباعك واخلاق والهي بهم وخل همك هم مو هي وادعي الله يرزقك ب صديقات طيبات ومحبة خلقه
اوكي حبيبتي حااولي لاتقولين مقدر شوي شوي اشياء بسيطه تفتح القلوب سلام ابتسامه سوال عن الحال بين فتره وفتره تعليق بسيط مجامله صغيره لين تنزرع بينكم الالفه
وسبحان الله والحمدالله والله واكبر
حآولي تكلميهآ تفهمي ألسبب إللي جعلهآ تترككِ ، ممكن سوء فهم لآ أكثر ولآ أقل !
إن كآنت لآتريدكِ تجآهلي الأمر ، فعلآ شيء صعب ولكن ..
إن شآء ألله خير من ألله تعآلى ")
شوفي يَ حب ، وقت ألفسحة إغتنميه بإللي يفيدكِ ، مثل بآلمصلى صلي ركعتين ضحى
وبعدهآ تنآولي وجبة إفطآركِ ، أو زآولي هوآيآتكِ ، حلي وآجبآتكِ ، أو ذآكري ألأختبآر
أو حضري درس ، بإذن الله مع الأيآم بتنسي ، ألله يعينكِ حيآتي ..
لآإله إلآ أنت سبحآنك إني كنت من ألظآلمين