السلام عليكم ورحمة الله وبركاته
اتمنى من الله أن تكونوا جميعا فى أتم صحة
اليوم هوريكو طبق الخرشوف المحشى لحمة مفرومة مع الرز الأبيض والجاجيق من مطبخى
أنا بدأت من أول فرم اللحمة لأنى ما بحبش الدهن أبدااااا ولازم أفرم اللحمة بايدى بعد ما أطلع عينها واشيل منها أى فتلة دهن
المهم
الخرشوف اسمه بردو ( الارض شوكى )
أنا بجيبه من السوق متنضف لأن تنضيفه يحرق الدم 
وبحطه سريعا فى ماية بملح وليمون وخل عشان مش يسود وكمان احتياطى لقتل الميكروبات 
المقادير:
8 خرشوفات
نص كيلو لحمة
بصلة متوسطة
ملح وفلفل وسماق
زيت معلقتين او زبدة ( زى ما تحبى )
صلصة
طماطم نقول نص كيلو مثلا او 4 حبات كبار
الخرشوف دى صورته بقشره من ع النت للجماعة اللى ميعرفهوش :
ودى صورة شوية تانيين بس بعد ما ركنتهم يوم 
اسودوا شوية بس بصراحة
وأدى اللحمة :
وأدى اللى فرمها :
وادى البصلة :
وادى اللى عصجها 🙂
أقطع البصلة صغير
وأضيف اللحمة المفرومة والملح والفلفل والسماق واعصج بيها اللحمة
أحط الزيت او الزبدة فى الحلة وأحط عليهم البصلاية واقليها شوية لحد ما تبقى شفافة
وأقلب باستمرار عشان متتكومش كتل وتبقى بايخة
خلاص كده اللحمة اتعصجت
أجيب الصينية اللى هدخلها الفرن وأرص فيها الخرشوفات بالشكل ده وأحشيهم باللحمة
دلوقت اعمل الصوص الاحمر وممكن تتعمل بالباشاميل لو حبيتى
ادى الطماطم
وأدى اللى عصرها
اضيف كوبين من العصير المصفى مع المتبقى من العصاج زائد ملعقة صلصة ومكعب مرقة لحم
وملح وفلفل شوية
أقلبهم واغليهم غلوة كده مش عاوزاهم يتسبكوا اوى عشان ميسودوش لما ينطبخوا ف الخرشوف
أحب أعمل للخرشوفات منظر كده
هقطع طماطماية شرايح
بعدين اصب الصوص عليهم كلهم واغمرهم :
عشان معنديش غطا للصينية هغطيها بفويل
واطبخها شوية على البوتاجاز من فوق على نار هادية حوالى نص ساعة
بعدين اشيل الفويل وادخلها الفرن على الشبكة على نار متوسطة كمان شوية المهم ان الصوص ميتبخرش وتتحرق قولى يا ستى كمان نص ساعة
طلعت ريحتها والله تحفة .حتى شمّى
و عشان الاكلة دى مليانة طماطم مش عاوزين حموضة الله يكرمكم يبقى سلطة الزبادى
وبالهنا يارب تعجبكوا لما تجربوها
sm100:
يسلمو طبق رائع جدا خصوصا إني أنا بحب القوق اللي هو الأرضي شوكي بالمغربي
تسلمي ميمي يا عسل
سفرة دايمة
وجاجيق عجبني اسمهااااا حلوة كتير
ان شالله رح اجربها…..واحلى تقييم ياعسل ……بتستاهليه
بس وراه وراه
شهي جدا نحن نسميه في الجزائر بالقرنون
وتقديمك للموضوع عسل زيك :)))
تستاهلي احلى تقييم والله