السلام عليكم ورحمة الله وبركاته
يا مرحبا بكل صديقات المنتدى..
كتبت هالخاطرة عن الفنانات والمذيعات والممثلات اللي اغتروا بنفسهم لما صاروا مشهورين وزادوا معجبينهم ..
اتمنى انها تعيبكم.. 
نحن في زمان الواوا.. الشباب كبروا وبعدهم يقولون بابا.. الأجهزة فيها تشتغل على نظام الويندووز والجافا.. الصغارية يتربون على ايدين كاترين وسلينا.. وأبطالهم مهند وسيلا.. وبناتنا صار اهتمامهم فالرجيم واليوغا.. محترفين في صنع الكب كيك والباستا.. يرقدون على صوت الجسمي ويارا.. يشترون من ماكس و زارا.. وجمالهم من الجلوز والماسكارا.. والشباب صاروا يحطون عدسات خضرا وزرقا.. يتحوطون في ممزر وجميرا.. يغازلون لما ورنا.. بعد ما كانوا يركضون ورا شما وعليا.. ويبون عرايس من تركيا وروسيا.. ومعاييرهم فالجمال أشواريا وانجلينا.. نحن في زمان اللي يشتهر فيه المايعة والرقاصة.. والحبايب صاروا أهل الطرب والسمارة.. كل ما ظهرت وحدة بحركات يديدة وصياعة.. خلوا الأضواء عليها وصارت عند كل الناس مرغوبة.. المعجبات فيها في زيادة وفي كل مكان مسويلها سالفة.. لين ما تصدق عمرها.. وتعتبر نفسها للبنات قدوة.. وكل سنة تطلع فناتك يديدة.. عشان تضمن بقائها ووجودها.. حتى مرات تتحرى نفسها هوا المكان .. اللي ما يستغنى عنها انس ولا جان.. ومسوية نفسها ملكة الزمان.. كلمتها مسموعة من كل الآذان.. وكلامها متداول عند كل لسان.. مسكينة مستانسة وعايشة الدور.. باجر يدور الزمان وينشال عنها النور.. وتنتقل لوحدة حركاتها يديدة وتصير موضة الجمهور.. تصير جديمة حالها حال البيت المهجور.. تخلوا عنها بعد ما كانت مركز اهتمام الكبير والصغير.. للاسف لانه حب الناس لها مو لويه الله.. ونست انه كل شي لغير الله ما يدوم.. والدنيا تدور.. ومحد راح يحصل دوم الراحة والسرور.. خليها تطلب رضا الله وطاعته والمحبة فيه.. قبل لا يعميه الغرور.. ويصير انسان وهو حي انسان مقبور..