السلام عليكم ورحمة الله وبركاته
أخواتي الحبيبات موضوعي طوييل ولو بحكي بحتاج أيام وأنا أتكلم بس بحاول ألخص لكم قدر الإمكان واعذروني مقدما على الإطاله
أنا كتبت قبل موضوع هنا عن أختي اللي بتخرب بيتنا …
والحين صرت محتارة بأمري من الصح ومن الخطأ اسمعوني وأرشدوني
حبيباتي أختي هذه شخصيتها قويه وسليطة لسان ( وأحيان يد ) على أمها وأبوها فقط ولا تقدر على غيرهم تزوجت قبل مرتين وتطلقت والحين متعرفه على شخص جديد متزوج وعنده ثلاث أطفال وكلمت أهلي عنه وانه خطبها عن طريق صديقتها اللي محد يعرفها وأهلي ما قالو شي وطلبو نسأل عنه وسألنا وقالو انه مايعرف المسجد وانه محد يعرفه بالحي اللي هو ساكن فيه وانه حق سفريات ووو فقلنا لأهلي انه ماينفع وذكرنا الأسباب وقال الوالد خلاص ورد عليه بعدم الموافقه وبعدها تكلمت مع أهلي وقالت لهم انا ابيه وهو شاريني وعارف ظروفي وانه معاي بنتين عايشين معاي وكان الوالد مستمر بالرفض فاستغلت أختي انشغالنا ودخلت الغرفه على أمي وابوي وقفلت الباب عليهم وكسرت التحف بغرفتهم وقالت والله ماأفتح الباب حتى تتصل عليه وتقول له تعال سوي الملكه يوم الخميس (يعني مجهزه ومخططه على كل شي ) المهم الوالد كان يصارخ عليها ويقول لها افتحي الباب ولا قدر حتى انه يضربها وهي اصرت والوالد اتصل قدامها على الشخص ولا رد عليه وبعدها وافقت انها تفتح الباب وخرج الوالد زعلان وقال اني غضبان عليها الى يوم الدين ومن هالكلام …
وبعدها بيومين انتهى كل الموضوع وصارت الملكه وزعلو علينا ليش ما باركنا لها وما حضرنا والسبب اننا مصرين على موقفنا وان الشخص هذا ما ينفع وصعب كل شويه تجيب لنا رجال وتتزوجه وتتطلق لمره أخرى بسبب سوء الإختيار
مشكلتنا الحين في أهلي وسلبيتهم في التعامل معها لدرجة ان الوالد يقول لزوجي اني ماأقدرعليها وأخاف تشرد معاه وتفضحني
اصلا مالهم رأي بأي شئ في البيت الا علينا احنا اللي مانرد عليهم يعني أختي الصغيره عمرها 18 سنه محد يقدر يقول لها شي لأن الثانيه تدافع عنها ومالنا الا أخ واحد ولو تدخل يقولو له لا تتدخل نخاف تضربها ويصير بها شئ وتبتلش والأدهى من هذا انهم يرضو عنها بعد كل اللي تسويه وتقول له يعني تقول للوالد انت منت رجال وانت تمشي بالحرام وكلام كثيير والله ولما الوالده تنصحها وتقول لها خافي الله الزمن دوار تقول لها انا اللي ادور رضا بناتي مو هم اللي يدورو رضاي وانتو ما تصلحو تكونو أهل وانا مابي أحد منكم وكلاااام ؟؟؟؟؟
الحين قولو لي الحل كيف التعامل مع سلبيتهم في التعامل مع الخطأ وكيف نقدر نرضيهم وكيف نتعامل مع أخت بهالشكل ؟؟؟؟
الله يهدي اختك يااكريم والله مادري اش اقولك اختك كبيرة وصعب التعاااامل معها انتي مابيدك الا انك تنصحيها وتخوفيها بالله وان العقوق له عقوبة بالدنيا والاخرة وقوليلها اللي تسوينه بامك وابوك بكرة عيالك بيسوونه فيك…
الله يهديها ياااكريم
خليها تسوي اللي براسهها
تبروا منها
الله يهديها