السلام عليكم أخواتي
أبي مشورتكم .. أنا قريت كل المشاكل الي هنا تقريبا وأعجبتني الحلول المطروحة
قلت يمكن ألاقي حل لمشكلتي..
أنـآ عمري 17 سنه .. مشكلتي يمكن أني طموحه زيادة
أحلم في المستقبل بإكمال دراستي الجامعيه وأتمنى غني أتوظف ويصير عندي راتبي إلي أصرف منه على نفسي وتصير لي إستقلاليه من هـ الناحيه ..
وأنا يتقدملي الكثير لكن كان الرفض دائمآ هو الجواب عندي ..
بغض النظر عن صفات الشاب ..
لآتلوموني .. أنا شفت كثير من حولي
شفت معاملة أبوي لـ أمّي الجافه والقاسيه ..
شفت كيف كل ماعطاها ريال يقولها أنا صرفت عليك أنا سويتلك.. إحمدي ربّك إني صابر عليك ومارميتك الشارع !!
دايم هواش هو وأمي على أتفه الأمور وكله قدامي أنا وأخواني ..
سب وشتم كله على مسامعنا حتى قدام الشغاله يهينها !!!
كل ماتقوله تبي شي حتى لو من أغراض البيت يمن عليهآ ..
مع العلـــــــــم .. أبوي مو بخيل أبدااا وحالتنا الماديه فوق الممتازة
بالإضافه .. إن معاملة أبوي لي غير مدللني ومدلعني والي أبيه آخذه قبل ما أطلبه ..
مع هذا هو مع أمي شخص ثااااااني
وهذا مو شي جديد من لحظة ماوعيت عالدنيا أبوي هذي هي علاقته مع أمي.. دايم يخونها بكل الوسائل ..
وحاول مرتين يتزوج عليها بس بعد مايملك تخرب السالفه .. مدري يمكن دعوات أمي ..!
أنا قريبه من أبوي كثير لدرجة إنه يقولي إذا يكلم وحدة ..!!
ودايم يشكيلي من أمي ويقول إنه ناقصه عطف وحنان
يقولي إن أمي ماتفهمه .. ويقولي إنها غبيه !!!
يقولي أنا مو صابر إلا عشانكم إنتو
مع إن امي إنسانه طيبه ولاهي من الحريم الي تتطلب وتبي تروح وتطلع .. وتطلب فلوس…
إن عطاها عطاها .. وإن ما عطاها سكتت !!
أكرهـــ علاقة أبوي بـ أمّي جدآآآآ ومأثرررة علي لـحد كبير
هذا جانب .. جانب آخر..
أخوي وزوجته عايشين معانا في البيت ..
أخوي إنسان طيب ويحب زوجته
بس بعد أخوي فيه أمور تقهرني .. ماعنده مسؤوليه تجاة زوجته وأولادة ..
عنده طفلين يهبلون ..
مايشريلهم ملابسهم .. ولآلوازم الأطفال من حليب وحفايض وغيرة !!
مايدفع شي من راتبه لا لزوجته ولا عياله
كله مصاريفه الخاصه
زوجته تقد فوق السنه ماتطلع من البيت ماتشري أغراض ..
يطلع برا مع الشباب دايم ويرجع آخر الليل مايقعد مع زوجته
ولآعمره طلع يمشيهآ.. مصاريف عياله وزوجته أبوي متكفل فيها
صحيح إنه مو راعي خرابيط وبنات .. ويموت على زوجته
لكن غنسان غير مسؤول وهالشي قاهرني !!
طبعآ انا عطيتكم ملخص عن هذا كلّه ..
عشان أقولكم إن الحين هالشي كلّه أثر بـ مفهوم الزواج عندي
وخلّآني أفكّر أرفض كل من يتقدم والسبب
عشان أدرس وأتوظف وأصرف على نفسي
لإني لما أتزوج مابي رجال يهيني ويمن علي ..
مثل أبوي مايسوي بأمي؟؟
ولآ أبي رجال مهملني وتارك مسؤولياته
عشان كذا أهم شي عندي الدراسه والوظيفه أبي أعتمد على نفسي وما ألجأ أو أحتاج أي رجل !!
بس العجيب إن قبل 9 شهور إنخطبت !!
الحين نعم أنا مخطوبه!!
لآتسألوني شلون لإني مدري
بس صدقوني هـ الإنسان حسيته غير
أبوي ماخلاه يشوفني أو أشوفه ومع كذا ماقال شي
طبعآ فترة الخطوبه بطول لـ 4 سنوات هذا شرطي
و وافق مع إنه ماشافني وقال مستعد أنتظرها 10 سنين حتى!!!
طول التسع شهور يتصل كل جمعه على أمي طبعا ممنوع يكلمني
ويسأل عني وعن دراستي وصحتي ويسلم علي
أنا مرتاحة له كثير بس خااايفه أكثر
وطول الـ 9 شهور وأنا في قلق وتفكير متواصل أفصخ الخطوبه … ما أفصخهآ ؟؟
وأقول الحين إنتي عانيتي من كل هذا بحياتك
وتبين آخرتها تصير نهايتك مثل أمك وزوجة أخوك والكثيرات من الحريم الي اعرفهم ماله داعي أذكر قصصهم..
تعبت من التفكير
تعبت والله تعبت وأبي نصايحكم .. لآتبخلون علي أرجوكم ..
هناك رجال يعاملون زوجاتهم كما يعاملون بناتهم المدلله وبيكونو لهن كل دنياهم
بل وايضا عن تجربه يتسع صدره الي ان يتحمل كل الاخطاء ويصححها وكانه المسؤل عنها
ويوجد ايضا من الرجال من يقوم فوق عمله بمساعده زوجته باعمال المنزل
من الواضح افتقاد بيتكم للب غير مفاهيم الحياه لديكي
اسفه لصراحتي ولكن لابد منها
قدمي الحب تعيشيه بعيون كل من حولك
ولا تاخذي بيتك مقباس
دمتي سالمه
فلاتؤثر عليك تصرفاتهم
اما بالنسبة للزواج وبصراحة لازم احنه البنات نخلي
كل الاحتمالات يعني لازم البنت تكمل دراستها وتشتغل
حتى لوكانت متزوجة حتى اذا لاسامح الله كان الزوج
معها بخيل يكون عندها مال تصرف على نفسها
فأنت اكملي دراستك وتزوجي واشتغلي وان شاء خير
ولاتخافي من خطيبك اذا كنت مرتاحتله وان شاء يسعدك ويهنيك
وتكون ايامك االجاية احسن منلي شوفتيها
ما ندم من استخار
والمشكلة مش في ابوكي او اخوكي وانما في امك
وزوجة اخوكي هما لم يحركا ساكنا فكيف انت تلومين اباكي او اخاكي مع انك بتقولي ابوكي انسان
طيب وكذلك اخوكي وقد اعترفتي لنا بذلك من خلال كتاباتك
فحاولي انتي ما تكوني مثل امك سلبية او زوجة اخوكي والرجل مهما يكن عصبي او غير مبالي يبقى بداخله طفل وهو يحتاج للرعاية
واذا كنت فعلا طموحة وتريدين اكمال دراستك فهذا شيء جميل جدا وليس لكي تكوني مسيطرة على كل شيء بالمال والجاه بل لاسعاد نفسك اولا واسعاد من حوليكي
وخطيبك اذا كان انسان ملتزم وذو اخلاق فتزوجيه بل كوني على يقين ان وراء كل رجل عظيم امراة عظيمة