السلام عليكم ورحمة الله وبركاته
بقول لكم قصتي من البدايه وانتوا احكموا
ابوي تزوج امي قبل 30 سنه وطبعا هي سوريه وابوي سعودي
طبعا القصه ان هو كان يشتغل تبع قروب سياحي للي يروحون سوريا وهناك عرفها وحبها وخطبها وتزوجها داخل سوريا
وكان جدي الله يرحمه ماهو راضي عن زواجه
وحتى اعمامي وقفوا ضده وعادوه
ووحده من عماتي كانت تقوله طلقها وانا ازوجك احسن واحلى منها
بس هو كان مقتنع بأمي ومتعلق فيها حيل
المهم ان طول فترة حياة ابوي كان عايش وحداني يعني ملتزم بأسرتنا وبس
وماحد من اهلنا كان يدخل علينا بسبة ان امي مو من ثوبهم وماتشرفهم
ربي يسامحهم بس
المهم ان احنا 4 بنات وماعندنا اخ
واخواتي 2 اكبر مني متزوجات والحمدلله
واختي الاصغر مني مخطوبه
المهم ان ابوي بآخر ايامه تعب حيل وصابه الخبيث بالدم بعيد عنكم وعن حبايبكم ان شاء الله وما اخذ له شهرين من المرض وتوفى
وتخيلوا بدل مااعمامي وعماتي يواسونا بهالمصيبه كان يشمتوا فينا
ونطقت ألسن كانت ساكته من زمان
يعني كل واحد بقلبه حقد دفين مكبوت طول هالسنين طلع بيوم وفاة ابوي
طبعا امي انهارت ماقدرت تتحمل وعلى طول مرضت من بعده
وفضلت تروح لسوريا وقالت ابي اموت قريبه من اهلي
لان بعد وفاة ابوكم خلاص مالي قعده بالسعوديه
وكنا نصيح حواليها ونقول لها لاتروحين وتتركينا بس هي كانت مصره
وراحت سوريا ورحت انا معها وقعدت هناك الاجازه بطولها
لكن الموت كان اقرب وارادة الله مايعلوها شي
بنص رمضان هذا اللي توه رايح فارقت امي الحياه
وماتتخيلوا الحاله اللي كنت فيها انهرت انهيار وصابتني حالة اني ماطيق اشوف احد و اي شي قبالي اخذه واكسره
وجدتي الحنونه كانت تقولي حبيبتي راح تضلين معي هنا وماراح اخلي احد ياخذك ولا يأذيك وكنت اقول لها لازم ارجع البلد انا عندي جامعه
المهم رجعت لــــ ولا احد
لا اب
لا ام
لا اخت
ولا اهل يعينوا بهالازمه
رجعت للجدران
بس طبعا خواتي ماقصروا كانوا يمروني ويقعدوا معي النهار بطوله ووقت الليل يطلعون انا بنفسي كنت اقول لهم روحوا لان وراكم بيت ورجال ومسئولية اطفال ومالكم لزمه تقعدون معاي وانا اقدر اتصرف لوحدي
المهم انا عمري 23 سنه
وهذي اخر سنه لي بالجامعه طبعا هالاسبوع ماداومت
واحس مو طايقه اداوم
وعشان ماتسألون عن اختي المخطوبه
هي حاليا تدرس بالادرن يعني مو معي
المهم ان جارتنا ربي يجازيها بالخير كل يوم تتصل علي وتتطمن عن احوالي وترسل لي اكل
المهم الحين اثنين من اعمامي يبوني اقعد عندهم وطبعا انا رافضه رفض قاطع واقول اموت بحسرتي ببيتي ولا اعيش تحت ظلهم
لان عارفه هم يبون يتحكمون فيني ويقضون على الباقي من عمري
ويحسبون اني بنت ولوحدي اني برضخ وبستجيب هم مايدرون ان كل هالسنين زرعت فيني قوه ماراح يقدرون عليها
والله ماابالغ ,.,
بس المشكله تجيني اتصالات غريبه من شخص مجهول ودوم يهددني والمصيبه مايطلع معي الرقم يعني ماعرف لمين اروح
والله بديت اخاف
ليش كذا يصير معي والله انا مو ذنبي اذا ابوي تزوج بغير رضا جدي وانا اتحمل تبعات هالغلطه؟؟
امانه عليكم قولوا وش اسوي
تخنقني العبرهـ .. آآهـ قضاء وقدر وش أقدر أقول !
الله يكون بعونش يـالغـاليـه .. وإذا جفتـي رقم غريب بالموبايل لا ترديــن أحسن لش
طيب ابسألش .. ليش مـاتجلسين كم يوم عند اخواتش يمكن اوسع صدر ؟ تنبسطين أكثــر
إذا تعدوا حدودهم تقدرين تشتكينهم
عندك جمعية حقوق الإنسان ماراح يقصرون إن شاء الله
وغيري رقمك عشان مااحد يوصل لك إلا أخواتك وصديقاتك المقربات بس
الله يعينك وييسر لك أمرك
حبيبتي
اشكي لله تعالى
وادعي
واستغفري الله
وانتي اسال الله لك ان يرزقك الزوج الصالح الذي يسعدك واصبري ان الله مع الصابرين
ااعووذ بالله
الله يفرج همك ويرزقك ابن الحلال