طبعا كلنا عارفين ان الحمل ده رزق من ربنا زيه زى الاكل والشرب والجواز
يعنى هييجى هييجى باذن الله بس بمعاد ربنا اختاره لكل واحده فينا
ويوم ما هييجى هتتفاجئى بحاجات كتييييييير وتقولى يارتنى خدت بالى منها قبل كده
طبعا الحاجات اللى هتكلم عنها
شفت شكاوى كتير من حوامل معانا بالقسم منها
وبيبقى صعب قوى فى الحمل نلاقيلها حل او علاج بالذات اول 3 شهور
يبقى مانطنشهاش من دلوقتى ونتسلى عليهم واحنا فاضيين ونعالجهم ونخلى صحتنا تمام
وجسمنا مستعد لحمل سليم معافى باذن الله
ندخل بقى فى المفيد قبل ما تتاوبوا وتنعسوا منى
1- مشاكل القولون
كتير جدا من البنات بتعانى قبل الجواز من مشاكل الانتفاخ او عسر الهضم او الامساك المزمن ومشاكل المعده بشكل عام
وبتزيد اكتر مع البنات اللى بتاخد منشطات او ابر تفجير واللى مجربها عارف اعراضها المتعبه
نحاول نعالجها وعندنا من اول يوم فى البريود لحد ايام التبويض
نشرب الاعشاب المفيده للمعده وفى نفس الوقت طارده للغازات زى اليانسون والنعناع والبردقوش
واللى الموضوع عندها بشكل مرضى تقدر تاخد ادويه زى
كولونا اقراص للقولون العصبى قبل الكل 3 مرات فاليوم
دايجستين اقراص لتحسين الهضم فى وسط الاكل 3 مرات فاليوم
ديسفلاتيل اقراص طارد للغازات عند اللزوم
دوفالاك شراب للامساك عند اللزوم
2- مشاكل الأسنان
اى ضرس عندك عايز حشو ولا قلع ولا تنضيف حتى لو حاجه بسيطه اوعى تطنشيه
هتقوليلى ماهو مش تاعبنى دلوقتى
بعد الحمل بيظهر المستخبى اول ما الجنين يبدأ يتسلى على الكالسيوم المخزون فى سنانك
يبقى لازم نأمنهم كويس
عشان مانرجعش بعد كده ناخد بنج واحنا مرعوبين عالبيبى وبنج الحوامل بيبقى خفيف اصلا مالوش لازمه
يبقى الاهتمام عامه بأسنانك ب 3 حاجات:
– العنايه الطبيه باى مشكله
– غسيل الاسنان بالمعجون مرتين عالاقل يوميا
– تناول الكالسيوم بشرب اللبن ومنتجاته
3- الالتهابات المهبليه
من اكتر المشاكل اللى بتظهر فى الحمل نتيجه ضعف المناعه وقتها
يبقى نتعود على بعض العادات الصحيه للوقايه منها عشان جسمنا مايبقاش حساس ليها
زى ارتداء الملابس الداخليه من الاقطان بلاش الياف صناعيه خالص
دايما اغلي غياراتك الداخليه او حتى اعمليهم على درجه السخونه فالغساله الاوتوماتيك
خلى ضوافرك مقصوصه عشان ماتقلش بكتيريا للمنطقه
تنشفى كويس بعد التشطيف
لو بقول لو بتحبى تستخدمى غسول طبى يبقى مره واحده فى الاسبوع
ولو حسيتى بأى افرازات لونها غريب او ريحتها وحشه تعالجيها فورااااا قبل ماتصعد للرحم والمشكله تكبر لا قدر الله
4- الاملاح والتهابات مجرى البول
لازم تعالجيها كويس وتتابعيها بالتحاليل علطول
شرب كميات كبيره من الماء يوميا
واللى بتجيله يلاحظ الابتعاد عن الموالح والشطه والفاكهه المالحه زى المانجو
5- الانيميا
تخيلى واحده عندها انيميا قبل الحمل وحملت تخيلى هتكون تعبانه ازاى طول الحمل
طبعا من اهم اعراض انيميا الحديد النهجان وخفقان القلب الشديد مع اقل مجهود
يبقى تتطمنى على نفسك بتحليل هيموجلوبين فالدم
وحتى لو النسبه كويسه لازم تهتمى بعنصر الحديد فى اكلك
العسل الاسود والسبانخ والحقى كلى كبده عشان ممنوعه فى الحمل
6- التهاب الاعصاب والتنميل
ده بيكون ناتج عن نقص فيتامين ب وللاسف معظمنا كده
وبيزيد فالحمل عشان زياده الميه اللى بتضغط اكتر عالاعصاب
الحل بسيط قوىىىىىىى
حقنه ديبوفيت او نيوروتون او اى نوع مره واحده فقط فى الاسبوع
هتفرق بجد معاكى كتير
7- مشاكل العظام
عشان زى ما قلنا الحمل بيسحب الكالسيوم المختزن فى العظم وبيزود مشاكله
يبقى هنعالج المشكله طبيا
بالاضافه لشرب اللبن ومنتجاته عشان الكالسيوم
8- الفوليك اسيد
مهم انك تبدأى تاخديه قبل الحمل بفتره
من ايام التبويض خدى واحده بس فاليوم من فوليك اسيد 500 اقراص
لأننا غالبا بنكتشف الحمل فى الشهر التانى وهو مهم اول 3 شهور بالحمل
بالاضافه لدوره فى تقويه بطانة الرحم
9- مشاكل الشعر والبشره
ايا كان نوع المشكله حب شباب او تساقط شعر وغيره
الحقى اهتمى بيها دلوقتى لان الغالبيه من منتجات العنايه بالبشره بيكون فيها كيماويات ممنوعه فالحمل
10- الوزززززززن
لو وزنك زياده فرصه تعملى ريجيم وتظبطى جسمك ووزنك
لانه هيزيد فى الحمل وهيبقى صعب تتحكمى فيه وقتها
11- الحياه الاجتماعيه
معلش النقطه دى بعيده شويه عن محتوى الموضوع
بس الكلام بيجيب بعضه بالمره
طول فتره قبل الحمل انتى عرووووووووسه حتى لو بقالك سنين
اوعى تضيعى الفتره دى فى الزعل والنكد وتحصرى حياتك فى شئ واحد
فكرى فى ايه الحاجات اللى هتتمنعى منها وقتها واستغلى الفرصه خليكى ناصحه
خليكى دايما جميله وشيك ومهتميه بنفسك مزززززه من الاخر
لان فالحمل اكيد هتبقى ……بلاش خليها مفاجأه احسن
هيبقى المكياج غلط والبرفان غلط واللبس الخفيف غلط لحسن يجيلك برد
والفسح والملاهى والبحر ممنووووووووووع
واول 3 شهور واخر 3 شهور عند ناس كتير ممنوع الحاجات التانيه
وهتلاقى نفسك قاعداله فى البيت عم عبده البواب
يبقى خدى بالاسباب وظبطى علاجك ومتابعتك من ناحيه
وفنفس الوقت عيشى حياتك واستمتعى بيها
يااااااااااارب يكون الموضوع عجبكم
ومش هقوللكم ماتنسوش التقييم
هتقيموا بالعافيه انا ايدى وجعتنى
و لو نسيت حاجه فكرونى
واللى عندها معلومه تحب تضيفها ماتبخلش علينا بيها
وياريت اللى استفادت ولو بكلمه ماتحرمنيش من دعوه حلوه
بحبكم فى الله
|
المشاركة الأصلية كتبت بواسطة أم عبدالرحمن1976
 جزاااكى الله كل خير ويارب يعطيكى ماتتمنى
|
واياكي حببتي شكرا لمروك