السلام عليكم ورحمة الله وبركاته
شلونكم يابنات وشخباركم انا بصراحه عندى مشكله يمكن تضحكون عليهابس بصراحه لها سنتين ولانى لاقيه لها حل بالمره مشكلتى اهى بولدى الصغير هو بصراحه ماهو اخر العنقود لاوالله فيه اصغر منه بس ولدى هذا ضعيف وماكو جسم وكلامه مو مفهوم خصوصا لاعصب صرت اقعد اترجم وراه لين اوصل لنتيجه واعرف شيقول !!!بتقولون عنده مشكله بالنطق بقولكم لا واللهماعنده بس هذى الحاله واللخبطه تجيه فى حالتين :اذا استحى او عصب لا وابشركم صارله سنه وانا الاحظ انه صاير فيه حولهوالسبب فى حولته انه كان يقول اذا حولت عيونى اشوف اثنين واستانس على هالحركه لين ارتخى العصب عنده وصارت عيونه تلف وهو مو حاس !!!
بينى وبينكم انا مرات قمت العب معاه واحول عيونى ليما اعجبتنى الحركه وصرت اشوف الشى اثنين خصوصا لاصرت جوعانه حولت عيونى عشان اشوف الصمونه 2 واحس ان الاكل واجدالمهم ولدى هذا كان المفروض يدش سنه اولى قبل سنه بس شفت مافيه جسم ولا خير قلت وانا امك كبر المخده معاى وارقد قلبى مايطاوعنى اوديك
والكل يهاوشنى حرام عليج ضيعتى سنه من عمره وانا مطنشتهم
السنه هذى انحطيت قدام الامر الواقع :الجاهل لازم يروح للمدرسه !!!
والله يابنات يوم وديته الصحه المدرسيه للتطعيم يعطونه الابره وانا اهشم وابجى وانوح السستر تقول :انتى بتبكى لييييييييه ؟؟؟ هوانتى اللى بتتطعمى !!
قلتلها :سستر الله يخليج ديرى بالج لاتدش البره من جهه وتطلع من الجهه الثانيه ترى مافيه لحم !!
ورحت اشترى ملابسه المدرسه بروحه طلعه خاصه بس لخاطر عيونه الصاكه هذى وطردت باقى عيالى لان نفسيتى ما تتحمل ضغوط من احد
المهم وطول فترة التسوق وانا الحق فيه لاقلت بنروح قسم البنطلونات ..الولد حول راح لقسم القمصان وهكذا
يابنات مالى قلب اوديه للمدرسه قلبى يعورنى ويعصرنى
يوم جربت الشنطه على ضهره ولف الولد ولا تواير الشنطه تحك بالارض تقول الشنطه تمشى بروحها يوم لف بشوف الزى المدرسى على جسمه ولا هو <لا وساااااااااامه ولا جسااامه> العيون صاكه والبنطلون ينزل ويطيح ولاهو حاس فيه !!!
ساعدونى ساعدونى مالى قلب اخليه وراى بالمدرسه واروووووح بيقعد يبجى والمدرسات لا طلعت بيقعدون يهاوشون الجهال وانا اخاف عليه والمشكله حتى كلامه ماراح احد يفهمه ؟؟؟
المدارس بعد العيد وانا احس بموت
بس أهم شي توديه فورا لطبيب العيون
يفحص نظره ويعالج الحول لإن الحول
مع الوقت يسبب ضعف النظر وهذي أهم خطوه
قبل المدرسه وقبل أي شي لاتتركيه أبداا
ومو مهم جسمه نحيف أهم شي صحته ونشاطه
وأكله مفيد ولى لا …وركزي دايماا على الفواكه والخضار
والحليب والعسل بستمرار بكذا تكوني إطمنتي على صحته
وصدقيني مع الوقت وفي سن معينه راح يتحسن
جسمه لاتستعجلين عليه
وأنصحك أختي إنك تدخليه المدرسه لإنها مفيده جدا
لحالته وبيختلط مع أطفال بسنه و يتعلم منهم النطق
والجرأةعند الحديث وبعرف أطفال كثير من أقاربنا
تغيروا 180درجه بعد المدرسه
وأرجوا أن أكون أفدتك
دمتي بصحه وعافيه
اهم شي توديييينه طبيب العيون
لا تستسهلين مشكلة الحول
انا اراجع ببنتي طبيب العيون وهناك اشوف الصغار كل واحد فيه مشكله في عيونه الله يشفيهم
ويشفي بنتي وولدك ياااااااااااااااااااااااارب
ومن ناحية الدراسه توكلي على الله وخليه يدرس ويندمج مع اللي بعمره
واستودعيه الله
وان شاء الله يرفع
راسكم بالشهاده