عمري 16 سنه حاولت الإنتحار والإلحاد بسبب مشاكلي -تم الاجابة 2024.

السلام عليكم ورحمة الله وبركاته**
اولا أنا ساره عمري 16 سنه في اخر سنه لي في الثانوي
مشكلتي ابختصرها بنقاط**
أنا ما ادري وش اقول عن نفسي متحطمه نفسياً حزينه ما ادري ليش**
اكره نفسي اكره شكلي أكره الماضي حقي اكررره كل شي متعلق فيني مع ان الحمدلله عيشتي وربي الف يتمناها بس ما ادري ليش أنا كذا**
الله يخليكم ساعدوني اعطوني نصايح والله ما اكذب عليكم لما اقول كارهه نفسي بجد بجد كارهتها وكذا مره افكر لو انتحر أحسن ولا أبدى افكر بمعتقدات محرمه مثل ليه ربي خلقني والله لو أني مو موجوده بالحياه افضل ومرات فكرت بالالحاد من شدة بؤسي وليس لسبب غيره لكن هداني الله ورجعت للصراط المستقيم**
1/ أ_ أتوقع ان اكثر شي معقدني نفسيا هي شكلي طولي 158سم و وزني 75 كيلو**
اعتقد واضحه أني ما اقدر ألاقي لبس زي العالم والناس على قدي من وانا صغيره وهذي للمشكله عندي والي زادها للأسف أمي **كانت من وانا صغيره تقول لي ( اتمنى انك مثل البنات الثانيات نحيفه وعصلا ادخل المحل أشتري لك واطلع ) السبب انها ما تلقى لي ملابس بمقاسي بقسم الاطفال وبعض الاحيان كانت تشتري لي ولادي او نسائي وانا كنت بصف 6 ابتدائي**
وكانت تشتري لي من محلات الجمله او الاسواق الشعبيه اسواق المولات ما عرفتها الا هالسنه وهذا الي خلاني ما اعرف للكشخه مثل باقي البنات ولا اعرف اهتم بنفسي حتى مدرستي كانت بحي فقير فزاد الطين بله قلبت عجوز **
تعرضت لكثير من المضايقات من صغيري ماكان عندي صديقات الا لما دخلت 5 إبتدائي وهذا خلا شخصيتي حساسه بقوه مع ان شكلي وتصرفاتي تدل على ثقه لكني اكبر بنت مهزوزه من الداخل**
اخوي يوم الأحد دخل الصاله وكنت قاعده فيها قام يكلم أمي يقولها في ناس هنا في الصاله دبيين مره ومو راضين ينحفون ما ادري متى بينحفون أمي قالت له احترم نفسك وسكت أنا ما لفيت عليه ولا قلت له شي سويت نفسي ما علي منه لكن وربي كان شوي واببكي والله جرحني وطبعا ما يناديني بساره أبدا يناديني كرشه ولا الدبا ودائم لما يمر من جنبي يقولي يا الحامل ليه ما تنحفين واذا سويت شي غلط يقول اي عشان كرشتها ما تقدر تسوي صح أنا ما ارد عليه لأني اعرف انه بيزيد لكنه يجرحني**
أنا الان بديت بالرياضة والتخفيف دعواتكم اواصل و اخلي اخوي يبلع لسانه بعد ما يشوفني

ب_ وجهي ذابحته أثار الحب والنمش والكلف وتحت شفايفي من الاطراف في سواد يعني لون وجهي ماهو موحد وهذت فيني منذ الصغر بعد لكني توني لاحظته السنه الس فاتت مع أني جميلة و أنا اعرف والناس كلها تدري وتعترف لكن جمالي ناااااقص و والله هذا يقطع قلبي اكثرر لما أشوف بنت ملامحها عاديه لكن وجهها صافي و موحد وتهتم بعمرها تجذذذب وربي اكثر من الجميله .. أنا ما أغار وربي لكن أحزن على نفسي وأكرها لأني مو مثلها**

ج_ شعري مرررره مرررره **خفيف وخلاص صلعت من قدام ما اقدر اسوي تسريحات بشعري زي البنات بالمدرسه كل وحده تسأل صديقتها وش اسوي بشعري بكره وانا افكر كيف بغطي صلعتي بكره تناقض يقطع لي قلبي وهذا واذا اشتكيت لامي تهاوشني تقول خلك بالحنا والزيوت بس انتي ما تواظبين عليهم ولا من زمان طلع شعرك ومره جلست ابكي عند ابوي اقوله ابي احس زي البنات سوو لي شي ودني عند دكاتره الي هو بس ابي شعري يرجع مثل اول والى الان ما تحرك

2/ أنا ما أنسى الماضي بسهوله خصوصا لما يحصل لي موقف ويطيح وجهي والله ما انساه ولا أنسى الشعور احس أني ما اتفشل ولا اسوي شي غلط أني حقيره **لدرجة ان في مواقف من 3 سنين والى الان ما نسيتها وصار طبيعي أتذكر فجأه الشعور وانا امشي **واوقف واجلس اسب في نفسي بعدين ارجع اكمل مشي صحيح مضحك وشر البليه ما يضحك لكنه والله شعور قبيح ونصيحه لحد يضحك علي ولا ربي بيبلاكم صدقوني ماتبون تكونون محلي

3/ واعتقد هو اهمهم واكبرهم والي بسبته اتوقع اني اعاني من كل هالمشاكل هو ( عدم الرضا والقناعه ) دايما أشوف الي عند غيري وأنسى الي عندي مع أني عارفه ان عندي خير بس لا للحين ماني راضيه ابي مثل الي عند غيري وصدق الي قال ( من راقب الناس مات هما ) واعتقد ان نقص الحنان من أمي وابوي وانا صغيره وماديتهم معي والإضطرابات النفسيه الي كنت ولا زلت أعاني منها خلتني انسانه ماديه بحت الكل ينصدم مني لما اقول ابي زوج عنده فلوس يشتري لي الاشياء الي ما قد حصلتها وانا صغيره ويسفرني و ويونسني ما يحجرني بالبيت ولا علي هو شايب **ولا قبيح أهم شي مابي زوج فقير ( بعايلتنا البنات يتزوجون بدري ) أنا عارفه ان تفكيري غلط لكني أعاني من نقص ما اقدر اشتري براحتي ولا اصرف على كيفي من كثر ما أمي وابوي فوق راسي ومن كثر ما ينزلوني بالاسواق الرخيصه الي طقم كامل ب200 **صرت بنت فقر صدق لما أشوف تي شرت ب50 اقول في نفسي غالي ولا بشتريه مع أني عارفه ان سعره معقول في المولات ومع ان أهلي ربي رازقهم عادي مثلهم مثل الناس بس احس أني بنت فقر والله ودي اكشخ والبس واحس أني مو اقل من غيري**
بس بعد ابي اكون قنوعه وش اسوي عشان أرضى بالي عندي لو أني مرميه بالشارع ابي اقول الحمدلله وأرضى كييييف ؟

يختي ترا هذي دنيا .. والله سبحانه في حديث قدسي قال (( الدنيا ملعونة وملعونٌ مافيها إلا ذكر الله وما والاه أو عالم أو متعلم … الخ ))
الدنيا ما تسوى عند الله جناااااااااح بعوضة..
يعني تراااها دنيا دنييييييا .. ممر نمره للآخرة .. اعبدي ربك وقربي منه وتتعوذي من ابليس دائما ترا هو اللي يوسوس لك ويدخل هالأفكار براسك .. عاد انتي خليك اذكى منه ولا تعطينه مجال ..

إذا مشكلة السمنة .. انتي بديتي رياضة .. والحمد لله هذا شي حلو .. ويارب تنحفين .. وإذا على أخوك وكلامه .. يعني عادي يمكن يمزح معك .. أنتي لا تجلسين تدققين في كل كلمة وتاخذينها بجد .. والله بتتعبين وماراح تقدرين تعيشين بحياتك .. خلي روحك مرحة أكثر من كذا .. تقبلي الكلام برحابة صدر لا تصيرين حساسة زيادة عن اللزوم وإلا حساسيتك بتذبحك .. !
بعدين أحمدي ربك أن أخوك قال لك هالكلام .. يعني لو ما قال كذا كان يمكن ماتحركتي وماسويتي رياضة ولا لحقتي على عمرك .. يعني كلامه أثثثثر فيك .. وجاب نتيجة إيجابية .. المفروض تشكرينه على هالشي لانه زرع فيك روح التحدي ..

وإذا على بشرتك .. أكثر ما كثر الله عيادات التجميل وطبيبات الجلدية .. روحي لطبيبة جلدية .. وربي يسخرها لك .. وإذا على شعرك .. فيه مراكز متخصصة بالشعر يا حبيبتي .. تهتم بالشعر وترجع انباته من جديد .. وتخليه كثيف وتعطيه لمعة و….. الخ اشياء كثير.

انتي بدل ما جلستي تنزلين هالموضوع كان جلستي تبحثين بالنت عن مراكز التجميل والاهتمام بالبشرة والشعر بالمدينة اللي انتي فيها .. ماله داعي تتذمرين من خلقة ربي سواء بالطول او الوزن او البشرة او الشعر ..

انتي حاولي تحلين مشاكلك ,, وقبلها استعيني بالله وتعوذي من ابليس ..

وبالنسبة للوزن .. انتي بديتي تحلين المشكلة واذا حاسة انك مو قادرة تكملين بالبيت أو حسيتي انك مليتي أو ماعاد عندك حماس او تبين تبطلين هالشي .. انصصصصصحك تدخلين نادي رياضي .. يختي فيه كثير اندية تهتم فيك وتكون معك مدربة تتابعك أو بأول .. وابعدي عن المشروبات الغازييييييييية هذا أهم شي ..

وإذا ع البشرة راح اعطيك نصايح سريعة .. كثري من شرب الماء .. يعني حاولي يكون شربك أكثر من 8 كاسات باليوم .. تناولي اكل فيه فايتمينات .. خاصة فايتمن سي .. كلي برتقال واشربي عصيره واشربي عصير ليمون الطماط بعد يحتوي على فايتمن سي ..
كثري من أكل الورقيات الخضراء .. مثل الخس والبقدونس والجرجير .. الجرجير مفيد جدددددددداا للشعر .. ويحتوون على حديد .. ولازم تحاولين تمتنعين عن شرب الشاي وقت ما تاكلين الاشياء اللي تحتوي على حديد لان الشاي يمنع امتصاص الحديد في الجسم وما كأنك سويتي شي ..
حاولي تاكلين الخبز البر أو خبز النخالة هم مفيدات وبنفس الوقت حلوات للرجيم .. سريعات الهضم .. بعكس المخبزوات بالدقيق الأبيض ..
نوعي في أكلك .. كلي خضار وفاكهة وأسماك ودجاج وجبن .. بس خلي الأجبان والألبان والزبادي منزوعات الدسم .. وإذا ماتتحملين طعمهم .. خليهم قليلات الدسم .. الزبادي خالي الدسم زي ماسمعت يساعد على هضم الطعام بس لازم يكون خالي الدسم مو قليل ..

إذا حصل وتناولتي وجبة كبيرة أو دسمة .. أشربي بعدها شاي أخضر .. اللي يجيك ورق .. مو زي الليبتون لااا .. يجيك ورق زي النعناع .. سوي لك كوبين أقل شي .. واشربيهم بعد الأكل بنص ساعة .. هذي تساعد على هضم الطعام ..

المشي يا حبيبتي لازم يكون 45 دقيقة متواصلة .. ولا يزيد عن كذا لأنه يتعبك ويرق الجسم .. ومالازم ينقص عن كذا لأن جسمك ماراح يستفيد شي وماراح تنحرق الدهون .. طبعا ممكن تمشين باليوم 45 دقيقة متواصلة مثلا الصباح .. وتمشين العصر برضو 45 دقيقة مافيه مشكلة .. بس لازم 45 دقيقة متواصلة في الفترة الوحدة .. وياحبذا انك تكونين جوعانة .. أو توك صاحية من النوم .. لأن المشي والبطن خالي مفيد أكثر من ناحية التخسيس وحرق الدهون من لو كنتي تمشين وانتي ماكلة ..

النوم بالليل مفيد جدا للبشرة .. وخلي السهر عنك ..

وإذا عندك حبوب بوجهك أو شي .. عليك بالمرة .. انقعيها بموية .. بعدين خذي قطنة وبلليها بموية المرة .. وامسحي وجهك فيها أكثر من مرة باليوم ,, بتشوفين وجهك إذا ما صفى وصار يلق ..

لا اله الا الله انتي ما شاء الله عليك عاقلة وراكزة بدليل إنك كبرتي من قيمتك ولا رديتي على إخوك

تصرفه كان سفيه والحل الأمثل لمثل هذي التصرفات هو سفهها .. ما شاء الله عليك

كيف تتناقضي ؟؟ بالعكس هذي مشاعر داخلية عند كل البشر وربي يوفقك وتستمر يا سارونة وتنحفي وتصير أحلى وأحلى

ولا تستخري على نفسك لبس يا قلبي بالمناسبة اللبس تحليه صاحبته وتعمل له قيمة

صدقيني أنا شفت وحدة لابسه تي شيرت بعشرين ريال والثانية لابسه قميص شيفون مرة حلو

وسعره 210 ريال تخيلي من الألى وربي ما اكذب عليك صاحبة التي شيرت بعشرين لأن فيها اناقة داخلية وقابلة بنفسها

تقبلي نفسك واحمدي الله على نعمه وبعدين شو ألحاد وانتحار تعوذي من بليس وأنا أمك

واعقلي وركزي بصحتك وتخسيس الوزن بالرياضة واكلي اكل صحي وباذن الله بتكون أحلى يا حلوة

وعادي الواحد بيتكلم مع نفسه وهو ماشي وين الغلط .. !!

احييك لانك مكبره عقلك وما ترديش على هالاخ الطايش ,,شكله مازال صغير ,,حتى هو اكيد ح يكبر ويتغير,, لما يقولك يا الدبه قوليله راضيه ولله الحمد وشوفي كيف يمل من مضايقتك

عندي طريقه للتنحيف بس استمري عليها,, حطي ثلاث ملاعق خميره فوريه في كوب حليب واشربيه قبل الغداء بساعتين,, الطريقه هذي مفيده ايضا للبشره تاخر حتى الشيب وعن تجربه

للشعر,,, مؤكد بأذن الله ادهني بزيت الخروع بس بشرط الاستمرار عالاقل مرتين في الاسبوع,, وتجنب تدهني الحواجب

للبشره ,,عادى اللي يصير معاك ودايما يصير للبنات في عمرك,, ومن اجل بشره متفتحه ننصحك بشرب اكبر كميه من الماء على طول الحياه,, افضل طريقه للمحافظه على البشره,,هذي معلومه خذيتها من كوريه مع انها موجوده في القران ,,اللي يقول فيما معناه ان الماء اصل الحياه
وَ جَعَلْنَاْ مِنَ المَاْءِ كُلَّ شَيْءٍ حَيٍّ أَفَلاْ يُؤْمِنُوْنَ
خلطي زيت زيتون وزيت لوز حلو وادهني عالاقل مرتين في الاسبوع

بالنسبه للحزن,, اعتقد انه فيك نفس او عين,,حافظي عالاذكار والمعوذات بشكل يومي واكثري من الاستغفار,,,والسجود له فايده عظيمه لانه يمتص كل الشحنات السالبه بما فيها شحنه الغضب

وبالنسبه للي صارك من مضايقات انسيه ,, لانك لو عودتي نفسك على استرجاع الماضي ح يصيرلك زي الوسواس اللي من الصعب انه الواحد يتخلص منه,, وقفي اي تفكير في الماضي,, وقولي الحمدلله اني مش معاقه وجميع اطرافي موجوده

اخيرا اوصيك بالرقيه الشرعيه