السلام عليكم ورحمة الله
وأخيرا نزلت الايس كريم شوكولاته بناءا على طلبكم ويارب يعجبكم ان شاء الله
بس المرة دى هنعمله بطريقة مختلفة شوية وهى اساس الايس كريم
المكونات:
كوب ونصف حليب
كوب كريمة لبانى
صفار 3 بيضات كبار
2 ملعقة كبيرة سكر
200 جرام شوكولاته مبشورة
فانيليا
الطريقة
هنحط صفار البيض مع السكر فى اناء
هنخفقهم بالمضرب الكهربائى كتير جدا لغاية مايدوب السكر والمزيج يغلظ ويبقى لونه ابيض وقوامه كريمى
هنغلى الحليب ونضيف نصه على الصفار اللى ضربناه
ونخفقهم بسرعة ونحطهم على بقية الحليب المغلى
ونشغل عليهم نار هادية ونحركهم باستمرار حتى يغلظ المزيج ويبقى زى الكريمة وهى دى اساس الايس كريم بتاعنا ونطفى النار ونضيفله الكريمة اللبانى والفانيليا
ونقلبهم كويس ونصفى الخليط ده بمصفاه ناعمة قبل مانضيفله الشوكولاته وهنصفيه ببطء لغاية مالخليط كله ينزل من المصفاة
ونقلب الخليط بعد مانصفيه بمعلقة عادية تقليب بسيط ونسيح الشوكولاته على حمام مائى ونضيفها للخليط بتاعنا
ونقلبهم كويس جدا عشان يمتزجوا وممكن نضربهم بالمضرب الكهربائى لمدة اقل من دقيقة عشان يمتزجوا كويس فقط
ونحط الايس كريم بتاعنا فى علبة محكمة الغلق
ونحطه فى الفريزر ونقلبه كل 3 ساعات عشان ميكونش كتل تلجية
وقدمته تانى يوم وزينته بشوكولاته مبشورة
وده شكله النهائى وبصراحة طعمه اكثر من رائع
طبعا اكيد فيه كزا طريقة لأيس كريم الشوكولاته غير دى انتو اختارو الاسهل بالنسبالكم او اللى يريحكم
اول حاجة بالنسبة للبيض فيه ناس هتقول البيض نى طبعا البيض مش نى احنا ساويناه فى الحليب على نار هادية فالبيض مستوى كويس جدا جدا يعنى كأننا سلقنا بيض مخفوق بس فى الحليب وفيه ناس هتقول البيض هتبقى ريحته باينة فى الايس كريم بردو لاء متنسوش اننا حطينا فانيليا غير ان الشوكولاته بتبقى هى الغالبة فى اى حاجة بتتضاف ليها
بالنسبة للكريمة اللبانى هى نفسها الكريمة السائلة وهي كريمة خاصة بالحلويات وتكون مصنوعة من الحليب الكامل الدسم وتستعمل في الطهي وتزيين الحلويات وهى نفسها كريمة الخفق وانا بشتريها جاهزة من السوبر ماركت وهى غير الدريم ويب وغير الكريم شانتى وطبعا هى بتبقى اساسية فى عمل الجناش اللى بنستخدمه فى التورتات
وممكن نستبدلها بحليب كامل الدسم بس فى الوصفة دى احنا استخدمنا حليب كامل الدسم فالاحسن نستخدمها نفسها وانا بحب اضيفها للايس كريم واى حلويات لأنها بتخلى الطعم غنى وانا مجربتش اى بدائل تانيه ليها لغاية دلوقتى
يارب موضوعى البسيط ده يكون عجبكم
سلمت يمينك
يعطيــڪ الف عاافيۂ ..
تميزت بما قدمت..
دام تواجدڪ الرائع مانخلا ولا نعدم ,,
,,
لـــڪـ ڪ,ـل تقديرــے .
