يووه ياسيداتي من زمآن عنكم اكيد انكم فقدتوني —> مادرو عنتس !
في البدايه لو سمحتوا يعني مانبي معرسات يدخلون فيذا خوفآ عليهم من هجوم العوانس وتكفيخهم من القهرلأنهم بيحسون بالنقص ليش انتم معرسات وحنا لا وش فرقنا عنكم .. على اني باصمتن بالميه على ان بعض بنات المنتدى عوانس ويحلمون بفارس احلامهم القرني . والسبب الثاني ان الموضوع بيمتلي ومالكن متسان ..
بسم الله الرحمن الرحيم يالله صبآح خير على العوانس ..
بنتس عانس وراه بنتس ماعرست لين هالحين اكيد فيها عيب والا وش مخليها زآبنتن عندكم لين هالحين ترى ياام فلان منتيب دايمه لها زوجيها ولاتردين من يجيبها ابد لو انه افريقي بس اهم شي تزتينها عشان ماتصير شغاله عند حريم اخوانها وخواتها ..
ياكثر مانسمع هالحتسي من مجتمعنا اللي مايخلي الواحد في حاله ..
طيب انا جايزن لي وضعي وانا عانس لان فاتني جمس العرس والا من اول بيتنا مايوقف جرسه من كثر الخطاطيب صافين طابور ماندري وش نبدي —> الله يمكر بتس !
بس سبحان الله على كثرهم ولا واحدن منهم جزت له الظاهر ان الخطابه ام ابراهيم غلطانه في المواصفات قايلتن لهم مواصفات لبنانيه لاني كل مادخلت على واحد يبي يشوفني الشوفه الشرعيه وانا ماسكتن المدخنه ومدنقه راسي من الحياء وكنت لابسه جلابيه وسيعه تسني خيمه وفيها كتافات وحاطه في خشيشتي كيلي << الكريم الاحمر الصغير تذكرونه هذا مكياجي
والظل شخمط شخاميط تسن بزر يشخمط على الصبوره وش اسوي طيب منيب اعرف الله يقلعتس ياعفطه انتي ونصايحتس والا انا وش لي بهالخربطه
وشعري طبعا طلعت من الحمام وخليته همآهم يقولون اظهري على طبيعتس المهم انه تاخر ماجا بدري وشعري نشفت منه المويه وطق شوشه هو انصدم باين على وجهه الصدمه ومن قوة الصدمه قال لاحول ولا قوه الا بالله ..
ياصقيع ذي اختك والا شغالتكم الصوماليه؟
قال لا والله ذي وخيتي وش رايك فيها عساها جازت لك والابستامه شاقتن حلدز وخيي على العموم يالنسيب بين امك وامي اتصال قال وش اتصاله وش نسيبه مع السلامه وماعاد لي رجعه والله يوفدزها ويرزقها بواحدن مثل شيفتها والله يصبره على مقابلها .. ويطلع وانا الحقه بعيوني
واصرخ من ورى قليبي وانا اللي اتحطم وتخيب امالي ..
طبعاً هذا الحتسي اول قبل ماتخمني العنوسه بقوه .. اما هالحين افتخر اني عانس واتعزز للي معرسات وش لاقيات من العرس غير الغثآ والمشآكل اللي مالها اول ولاتالي والمشكله ان الرجاجيل وخاصه السعوديين يتعنفقون على حريمهم ورى ركبتس سودا دبري لها دبره قري هالسواد اللي فيها قر وهم شيون المشكله وركبته من السوآد الزايد مايدهنها عشان تشهب وتصير بيضا ..
لا للزواج نعم للعنوسه .. —> شعارنآ ..
ولو افكر مجرد تفكير اني اعرست وخذاني واحد شايب معرعر عمره في التسعينات وكان سبب عرسه علي عشان اقابله واكوي ملابسه وافطره واغديه واعشيه يعني شغاله عنده بالعربي و اكيد موب مطول بيموت وارجع للعنوسه مرتن اخرى وبيت اهلي يحتريني مثل مايقولون بس المشكله انه بيحجرني وبحتد عليه اربعه شهور وعشر ايام .. :biggrin23[1]:
فويصل اعلاني مع الطقاقه عوينسه بنت ظفر ..
العوينسه قاعده على المسرح وتغني فيني وتقول:
( مردتس لي مردتس لي يطول الوقت او يقصر ترى مابه احد مثلي يحبتس ويفهمتس اكثر .. )
نرجع بعد الفويصل عزيزاتي العوانس ..
يالعوانس انتن مكرمات معزازات في بيوت اهاليكن وغير تسذا مدلعات نامر وننهي ونووم على كيفنا ولين بس يوم عيت امتس تخليتس تروحين للسوق والا رفضت لتس اي طلب تقومين الدنيا ورحتي ترغين<< تبسين يعني في غرفتس لين يصفى راستس وجت اميمتس تسمح بخويطرتس وتوديتس لو انه بدون نفس بس اهم شي انتس رحتي اما لو انتي معرسه لو تصحين لين تذنيين محد لمتس
ماقلت لكم ان العانس اسعد امرآه في العالم ..
الشي الثاني ان ماعندتس حموله يذلونتس وخاله قشرا كل يوم تلاسنين انتي وياهآ وخوات رجل نجسين يشيشون امهم عليتس وراها ماجت عزيمه فلان اييه ماتبيهم هذا لونها قبلها قابتن خشتها وشايفتن نفسها مدري على وشو ..
المفروض تأدبينها يايمه والا تقولين لأخوي هالخبل اللي يدربي راسه ورى حرمته ولا يدري وين الله حاطه فيه مايدرون ان اخوهم اردى منهم ..
ماقلت لكم ان العانس اسعد امرآه في العالم ..
الشي الثالث والاهم انتس تروحين وتجين على كيفتس محد وراتس يراقبتس ان بغيتي سوق رحتي ان بغيتي تسيرين على الجيران العصريه سيري بكيفتس صح احيانا اهلي يعييون بس ولو يلينون عليتس موب مثل قراقوش ( اسم الرجال بدال ماتقولين رجلي قولي قراقوش انسب له ) اما قراقوش مايخليتس تطلعين الا لبيت اهله والا اهلتس خميس اهله واربعاء اهلتس باقي ايام الاسبوع يخليتس مقابله الجدران في البيت ويروح لدوامه وياشين الرجال لمنه صار بيتوتي مقابلن خشتس 24 ساعه تحوم تسبدتس منه زين بعد ماتطلبين منه الانفصال ..
ماقلت لكم ان العانس اسعد امرآه في العالم ..
الشي الرابع سبحان الله قراقوش لامنه عصب وذب عليتس حتسي يقرقع في قلبتس قرقعه تجيب لتس القالون وتقولين في نفستس اييييييييييييه يازين اميمتي وطقة عصآها .. امي لامنها عصبت علينا لحقتنا بالعصا لين اروح مع باب الرجاجيل واطلع على الصاله وكن ماصار شي ..
ماقلت لكم ان العانس اسعد امراءه بالعالم .. —> تراتس اشغلتي أمنااا يابنت ..
عاد الباقي عليكم اي شي تحسون انه يغث في بيت قراقوش بتلقينه العكس في بيت اهلتس ..
وغير كل هذا ان بزمنآ هذا ماعاد فيه قراقيش صاحين كلهم الله يخلف الا النادر وان جاتس واحد حبيبن لبيب مايطول يفطس على طول اما النجس عايش لتس ابو سبع ارواح دابلن تسبدتس لين تفطسين من القهر وهو طبعا موب ميتن وراتس ولولا الحياء تسان اعرس ثاني يوم العزى ..
وانا بعرض صورتي بس لحد يتهبل ويعجب فيني لانه موب من صالحها تفكر تخطبني ..
وهـ بس تسمع بالكيرلي بتقولون وش دخل الكيرلي في الصورة انا اعلمكم اصلا دايم اقرن شعري تسذا صغيرورات صغيرورات واخليه يومن كامل ثم افكه ويطلع كيرلي —>فيتس ثقتن ميب في احد ..
قضينآ ..
تسان معكم في التقديم العانس وهـ بس ..
اشوفكم على خير ..
ملاحظة مهمة جدن جدن..
هذا الموضوع وجهة نظر شخصية
وهو مداعبتن ايضا فلا تزعلن ولاتهاوشن لو سمحتن
ياشيخة روحي قسما بالله الي مايخطب وحدة خفيفة دم مثلتس ماعنده سالفة
الله يستجيب لدعائي عاجلا غير اجل يارب ترزق هالبنوتة خفيفة الدم زوج صالح وحبوب ولا يشوف الا شوشتها بالدنيا ويعوضها عن كل الي راح باحسن منه
طيب قولي امين ولا تنسين تعزميني على ملكتس ونبارك لتس
ياحبيلك أنتي وكلامك اللي ينقط عسسل
هههههههههههههههههههههههههه
ياشيخة روحي قسما بالله الي مايخطب وحدة خفيفة دم مثلتس ماعنده سالفة الله يستجيب لدعائي عاجلا غير اجل يارب ترزق هالبنوتة خفيفة الدم زوج صالح وحبوب ولا يشوف الا شوشتها بالدنيا ويعوضها عن كل الي راح باحسن منه طيب قولي امين ولا تنسين تعزميني على ملكتس ونبارك لتس |
امــــــــــــــــين
يابعد تسبدي والله
اني دارية وانا اختس ان ماعنده سالفة
بس شوفي ابي واحدن حلون مزيونن يفتح النفس
<< احلامها واجد
وان تملكت بعزمس ع عرسي
عشان تجين ترقصين بالفوستان يالبى قلبس
يابعد قلبي انتي
ادري ان كلامي ينقط عسل << بشويش ياواثقة ارحمينا
مشكورة لمرورس عندي يااحلى بنتن في العالم كل ابوه
وبعدين خلاص بجي لعرسك وترى كشتي بروح للكوافيره وانفشها واصبغها على حسابك انتي اتفقنا
الله كريم ذكرتيني بخويتي طولت ماتزوجت مرة ويئست وبشرتها بزواج قريب ولا صدقتني سبحان الله قبل ثلاث ايام كان زواجها الله يسعدها بس اذا عندك حلم ارسليه على الخاص خلينا نشوف يمكن فيه بشارة لك بعريس قريب الله يرزقك انتي وكل بنت يارب
وبعدين خلاص بجي لعرسك وترى كشتي بروح للكوافيره وانفشها واصبغها على حسابك انتي اتفقنا |
ههههههههههههههههههاي
ياحبي لس ياختي
قسمن اني حبيتس صدق صدق
والله شوفي وانا اختس
اني دايم احلم بس اذا قمت من النوم انسى الحلم يااختي
واما الكوفيرة ابشري ع حسابي
خبرس المهر جاي والدراهم واجد
و3 ردود
ليش تسذا ليش ؟
مافي اي تشجيع ع الكتابة
ياربي وش هالحظ
اذا ماعجبس موضوعي ادخلي وانتقدي وانا اختس ماهو حرام
خليس بنتن ايجابية لاتدخلين تقرين وتنحاشين
ردي لو برمز من هالرموز اللي ع جنب تحرك ترى وش كثرها >>>
شجعيني ترى انا تعبت وان اكتب في هالموضوع