هذي نبذه عن الشاعر المبدع بندربن محيا بن علوش المحيا
شاعر سُعودي ..
من مواليد 1981 ..، طالب دراسات عليا في جامعة الأمير نايف ..
كانت بدايته عام 2001 ! أولى قصائده المنشورة كانت من خلال مجلّة فواصل ..،
بعد ذلك إستمرّ في نشر نتاجه في المطبوعات الخليجية والصُحف اليوميّة ..!
( بندر المحيّا ) لهُ العديد من الأمسيات النّاجحة أوّلها كان في مدينة الجبيل ..
تلاها الطائف / الرياض / الدوادمي و دولة البحرين الشّقيقة ..!
وله الكثير من القاصايد من اهمها نصه (ذهب)اللي قاله في تصفيات ماقبل ال48
ذَهَب كل الكَلام وفْضّتَه يْوم السْكَوْت نـْحاس
……………. قَبَل مَا اشَوفك آشَوفك نَهر مِن مَنَبَع عـْـذوبَهْ
احْبَك مِنْ زَمَانْ البَرَدْ..احْبك مِنْ زَمَاْن اليَاسْ
……………. كْثْر مَا اْصْحَى مِنَ ايْام الْوْلَه وادخْل فْـ غِيبْوْبَة
أنْا وحْدي حَبِيْبْكْ لو قَرَيْتْك فِي وجِيْه الْنَاسْ
……………. وَلْوْ وْجَهْكْ ذَنُوب ٍ مَالْهَا فِي سْجْدَتِي تَوْبَة
تَجِي مَثْل الْعَزَا بَعْدْ العَزا فِي غِيْبَة الأعْرَاسْ
……………. وْتْروْح اْشْبَهْ بْـ دَمْعَة فـْ الْوَرَقْ بـْ الْصَمّتْ مَكْتَوْبَة
مَعَكْ حَلمّي مِنَ المَا وَالمَيْاهْ تْكَذِب الْغَطَاس
……………. ياكْثَرْ الليْ غْطَسْوْا فِي حُبَك الْهَايجْ وغْرْقوْبهْ
مِجَارِيْح ٍ نَفَاهُم دَرَبَهُم لـْ عْيْونِك النْعَاسْ
……………. تَعَدّوا يْنْشدونْ الْصَبَحْ عَنْ رمْشَك وضَاعَوا بْه
يْحَطَبونَ الْضْلْوعْ فـْ غَابَةْ ايّامكْ بَلْيّا فَاسْ
……………. شِتَاهُم ضِحْكَةْ شْفَاهكْ..وشَافوْا نَاْر مَشْبَوْبَةْ
تَخَاوّو بَيْنْ مِنْ دّوّر ذهِيبْ ومِنْ سَرحْ عَسّاس
……………. حَيَارىً غّرهُمْ كَاذِب هَدَبْك وْ وجّهَوا صوبْه
وانَا الْبَارح عِيْونِي فِي عْيونِك مَرّهَا وسْوَاس
……………. بَنِيْت سْنِينِي البْيْضَا لْهَا طوبَهْ عَلَى طـوبَهْ
أردّك للحَدِيثْ بـْ لْهْفَةْ الْبَارِدْ بَلْيّا قِيَاس
……………. وتْسْولِف سَالْفَةْ لليّ عَشَقْ مَا هِيْبْ مَرْغْوبَةْ
قِمْ اجْلِسْ فـْ الْحَنَايَا قَبْل مَا يْغْتَالكْ الْقْرْطَاسْ
……………. شَعْرْتْ انِك تَبْي تَهْربْ وَرَى النِسْيانْ لـْ دروْبْهْ
أنَا مِحْتَاج لْك..مَا احْتَاجْ ليْ لاتَنْشْد الأنْفَاسْ
……………. عَنْ اْكْبَر حَاجِة ٍ فـْ اقْصَى نْفَسْ شَاعِرْك مَحْجوبَةْ
طَويْلةْ طَاولتْنَا واسْتْقّرْ المَا بـْ قَاعْ الكَاسْ
……………. كأنّ السَالِفَةْ غْيْمَةْ عَلَى شِفْتّك مَسْكوبَةْ
جَلَسْت مْقَابْلك وَجْهَاً لـِ وْجْهْ بـْ جَنبْيْ الهْوجَاسْ
……………. إذَا مُستَقْبَلكْ وجْهْي ورَى الأحْلاَم مَرعْوبَةْ
نسِيتْ يّدي بـْ يْدينَك بـْ صُدفَةْ كنّها الإحسَاسْ
……………. وذكَرْتْ إنِي نسيْت اذْكرْ يْديْنكْ كَانَت اعْجْوبَةْ
تَهَيلتكْ طَعَمْ هَيْل بـْ فَمْيْ مِنْ بَعْد طَعْم عْمَاس
……………. بـْ فِنْجَال ٍ نَعَسْ مِن نَظْرتْكْ بـْ اهدَابْ مْصْبَوبَةْ
سَرَىْ الليْلَ البَهَيمَ بـْ رِمْشكْ المُستَهْتِر الْخنَّاس
……………. وليلَةْ غيرْ هَاذيْ مِنْ ليَاليْ العُمْر مَشْطوبةْ
إذَا مَا يْعْشَقْ العاشِق سَهَرْ شَكَواهْ بَعْد نْعَاسْ
……………. يَنَامْ احْسَنْ لِه ويمسَحْ دَمْوعه فِي طَرفْ ثَوبهْ
إذَا مافجّرَ الشَاعِر قَصَيْدة صِدقَهَاْ نِبْراس
……………. يبّل الدّفْـتَرْ ويشْربْ حِبَرْ كِذبه ومَكتَوبهْ
وانَا اعْظم مِن يْحِب اليَا هَدَا بَاله عِقْب مَا انحَاس
……………. اعيْشْ بـْ كِبْرِيا والقَلبْ بَيْن يْديْن مَحبوبهْ
مْطَر هَذا الوصِل يومَ الهَجْر يمْلا الضْلْوعْ يْبَاسْ
……………. وعَسَى المَاطِرْ عَلَى يابِسْ ضْلْوعيْ يْرخْي نْصوبهْ
مَنَ الليْ يشْبهكْ؟ يالفَاتِنْ المُسْتصْعِب الحَسّاس
……………. ليَا حَاولتْ اْشوفَكْ فـْ المَلاَمِحْ قَبْلْ هَا النَوبةْ
يذّكرنيْ بِـ مِنْ لايْشْبهِكْ مِنْ يْشْبْهِك لادّاسْ:
……………. عَلَى اعْصَابِيْ سِفركْ ودوبْه ايْقظّ غَافْلكْ دوبْه
وانَا قَلبيْ وطْنْ أرضَهْ سِمَاكْ وبيتَهْ الكُراس
……………. جبِينَك شَمسَهْ فـْ صُبحَ الوَلَهْ وجْروحكْ شعْوبهْ
انَا قدّامك اخْتّرنيْ حَبيبكْ قَبْل كِل النَاسْ
……………. أوْ إنِيْ مثْلْ عِشَاق ٍ هَووّ رِمشكْ وضــَاعْوا بهْ
****
قصيدة علياء
..
تهب الريح فـ اوراق الشجر ويغرد العصفور
……………….وانا تحت الهجير وصمتي احياناً يكون ظلال
وتتكسر خلاخيل الرعد في بارق ٍ مغرور
………………..واحس اني تكسرت وبقى في داخلي رجال
أطش بفم هذا الضي حزن وبعض من ديجور
……………….واغمض جفن من تحته سديم ٍ واقف ٍ مامال
يالارض اخذي سنابل وجهي اللي مانبت فالبور
………………..تعب حتى اساريره غدت بعد الغياب اطلال
خذي بعض الجهات ومن ملامح شاعر ٍ مجبور
………………..وهو يذبح من عروق الزمن ساعه على الترحال
يالارض البارحه همّ الستاير والنجف والدور
…………………وحزن امي وجوعي والفراغ ودفتر ٍ دجال
خذت اغلى دموعي فالعيون وخاطري مكسور
………………..وصوتي ينسكب فوق الورق واحس به لاسال
قبل ذيك المدينه والنعاس وبابها المبتور
………………..تعلمت البداوه والحضاره هي سراب اللال
امانه قولي لـ(عليا) قراح الما وطهر النور
…………………تراني طفل مامل البكا لو ملت الأطفال
طفل مات بهدبها والخدود وشعرها المنثور
…………………قبل يمشي بزهو ويلبس الغتره بدون عقال
طفل كان يتشيطن فالسطوح ويّدرج فالسور
………………..ويسرح فالنياق مواعد ٍ عشره وهو جمال
يشوف بعين عليا صورته وبثغرها البلور
……………….ويْتنفس غلاها ويهذي لامرّته بالشــال
يالارض الوقت خليّته مزيف واحترف لي دور
……………….وانا مالي سوى عليا وحلمي والهوى القتال
فبعض احيان احس اني كذا ..شاعر وله جمهور
………………..واحس اني في بعض احيان اقول اشياء ماتنقال
ورى هذا الكلام يحسّب الشاعر بليد شعور
……………….لوى معصم حديثه والقلم بيدينه الاغلال
وخيول ٍ تركض بصدري وتجمح ويْغشاها عثور
……………….وتعاود ركضها عقب المطيح ويرتجل خيال
يجيني من قبل هالحال ..حال..وحالي المستور
……………….رضيت بقسمتي لو نصف تفاحه على ايّة حال
يقولون البشر عنتر وهو عنتر يخاف الثور
……………….وانا اقول المخافه وارده في سيرة الابطال
اجل ..مليت انوّخ حيرتي لعتابي المقهور
………………ومليت آتسلل فالسطور المظلمه واختال
يالارض اخذي يديني مالقيت اللي يمد الشور
………………وانا تحت الهجير وصمتي احياناً يكون ظلال
بروز 2024م
بـنـدر بن محـيـا
****
قصيدة شعول (بندر المحيا)
دنـّت بســـاق الهجوس المغرم حجول
…………………..وزيّـنت فوق الشماغ المترف عقال
قلت اقلطي ماورى الحرمان موصول
……………………في صدر من ميـّل احزانه ولا مال
سكنت بيت ٍ جديد بشـــارع (شعول)
…………………وفقدت لي زول يسوى عشرة ازوال
ووقفت جنب الســهر والنوم معزول
……………………عن جفن من رمـّـدت عينيه واهتال
من وين اببدا كلامي ويش ابا اقول!
……………………والناس ماتســـمع المجروح لاقال !
والـقاتـل الـبارحه حـطـوه مــقــتول
…………………..وفـ عيونهم شفت انا المقتول قـتـال!
والناس لوصـّـدقت بالخلّ والـغـول
………………….ماصّـدقت بالقـصـيـد..الوان واشكـال!
والشـْعـر انا واصله عرض وعلى طول
……………………عد ٍ رويـّتـه يوم(ن) افكاري حــبــال
في ذمتي كنـّـه المرجــان واللــول
…………………..على الورق وان قصر فالقاف وان طال
ويامبعد ٍ حول دار الحول والحول!
…………………..وانـــــا علــى حـــال مامثـله ولا حــال!
ياعمّ كل الجروح الزرق .. يـــحول!
…………………. وراك ماصــرت لجروح الـغـلا : خــال!
من غبت والمــا ظـمــا! والحلم مشلول
………………….والحزن جرهد ودمعي وادي ٍ ســـــــال!
ولاتحسب اني عن الاحزان مسئـول
……………………انـت اتحمــّـل ذنـوبـي يــوم الاهــوال
لاتـرمـع اللــغـز دام اللــغـز محـلول
……………………ولاتعـتـذر لي بـعـذر ..وتضرب امثــال
قضـيـّـتي مـعك دايم ضـد مــجـهـول!
…………………….وجرايمك صدّ واحســانك لي وصـــال
والبال مشـغول! ليــه البـال مشــغول؟!
…………………….وطعونك الخضر ماجت لي على البال!
يــبـل قــلـــبي لـيامـن جــيت همـلول
…………………….وان رحت قلــــبــي جفاف ونصه رمال
كم نافذه تشـــتهيك وباب مــقـــفول
…………………….وكم ريـــح عطر ٍ لبيــتك جرّت رجْـــال!
ياللي صباحك معي بالحب مغســول!
……………………ترىغــيابك دجــا واعمــالك اعمــال!
ان غبت غابت سنين (وكلّت حمول
……………………مـتـني) ..ومتني عليه حــمــول ٍ ثقال
… … …
وبعض الـغلا كان مايبنى على آصول
……………………مثل الرجل كان مات ولا له عيـــال !
قصيدة شمس مالها مغرب(بندر المحيا)
..
من اللي قَال مَال الشِّعر وقفة لاجل تنهيدك
………. من اللي قَال تنهيدك قصيدة شعر ما تُكتب ؟!
أنا ماني على قيد الحَيَاة اللي على قيدك
………. أنا قيدي حَيَاة ٍ لا اسْتَرحت ابْهَا بديت أتْعَب!
مواعِيد الوصل في يْديك يامَا أكذب مواعِيدك
………. وأنا لو إني أفهم بعض كِذبك..قلت لك تكذب!
تْبَّعِد عن وِصالي والمواصل خاتم ٍ بـ ايْدك
……….. أجل ليتك حَبيبي من بعيد إن كنت ما تَقـْرب
ثلاث أيام أو حول أربعة ما كنت في عيدك
……….. جَلست بمُفردي..بيني وبينك كنت أبي أهرب
أَشبّهك بصباحي ..مغربي ياصعب تحديدك
……….. مادامك شَمس تَطلع في سمَايَه ما لها مَغـْرِب!
قم اسأل باقِي الأحلام عَنّي يمكن تْفِيدك
……….. نَعَمْ قلت الك يمكن!..كان ما فَادَتْك لا تَغضَب!
خَطَاك إن العَتب صَعب ٍ عليك وقَادر يْكِيدك
………."صدَق مِن قَال : خِلك يَجْهلك..لو مَا قدَر يَعْتب
أحبك من شتاي اللي تَرَمّد في مواقِيدك
………. وعُمْر ٍ ولّعَت كَفْ الليَالي نَار بِه..واشتَب !
وَ لا أقول الرِّضَا قمّة عَذَابك قَبْل ما ارِيْدك
……….. أقول إن الرِّضَا نَهْر ٍ لك بقلبي عَجَز يَنْضَب
عَذَاب ٍ مِنك ما قصّر غَلاك إلا بدا يْزِيدك
………. بعين ٍ قصّرَت في شوف غيْرك..فِيك تِتْعَذّب
هَلا بأشهى ربيع ٍ مِن غصونك لا عَناقِيدك
………..تْقول ان الغصون مِن الخَجَل عنقودها مُعشِب!
لعمْري ماني بْوحدي بنِيرانك بتسهِيدك
………..ولكنّي قدرت أغسل عيونكْ كلها بالحُب
هلابك مَسْهَلين الأرض أرضك..(اعتبر بْيْدك
……….. حَنَايَاي النحيلة) يا نَحِيل الخصـْر يا مُرعِب
كأنك لا رجعـْت أو مَا رجعـْت بصمت أغَارِيدك:
……….. قميص ٍ في جفن يَعقوب ردّ الشوف بإذن الرب
سكوتك عن سكوتك ما يْشابه دون أنَاشِيدك
……….. سوى موت ٍ تَعلّق في فَمك..وشلون لو تسهب؟
أقدّم عذر عن عذري كذيّا ماني بميدك!
……….. وأثر مِن يعتذِر من نفسه لنفسه حقيقة : صَبْ!
وأنا شِعري قصيْد ٍ مِن قصيْد ٍ شِعره يْعِيْدك:
………… لقندِيله، لنوره، للخَطَا، للذَنْب، للمُذْنِب !
إذا هاذي قصيدة فالفَضل يَرجع لتنهِيدك
………..أنا مِن عَام أبي أسمع تَنَاهِيدك..أبي أكتب!
****
قصيدة أصدق من الدمعه على خدود الايتام..!(بندر المحيا)
أصدق من الدمعه على خدود الايتام..!
مات الرجا ضاع الورق جفت اقلام
…………………………………..وانا اذكرك فالثانيه والدقــيقه
قل منتظر واقول انا منتظر عــام
………………………………قل واحشك واقول ويش الطريقه؟
شاعرك عزّم يوم رفـّت له اعلام
………………………………ومـْـن القراح وضفـته بلّ ريـــقه
ناداه ليل عـيـــونك وقال قداااام
………………………………ورّوح يدوّر فالخــيال الحقيـــقه
ياللي وصالك حاســبه عدة ايـام
…………………………….غيبتك خلّت داخل الصدر ضـيقه!
ان كان قصدك تروي الروح الاوهام
……………………………اوهامك اهون من فراق ٍ مااطـيقه
ولعل قلب ٍ خاف من بعض الآلام
……………………………يـموت من كـثر الجـروح العميــقه
ينبض بحبك كل عرق ٍ وصمـّام
……………………………وطيوفك لعيني هي اوفى صديـقه
لاصرت اطاوع فيك عـاذل ولوّام
…………………………..وراي ابادلك المـشـــــاعر رقيــقه؟!
لك في ضلوعي شـاعر ٍ مابعد نام
……………………………وان نام هاجــوس القصـايد يفيــقه
أصدق من الدمعه على خدود الايتام
………………………….واحنّ من قلب الشــقيق لشـــقيقه!
يملى زوايا دفتري شـــــيح وثمام
………………………………..ومن فــوق ريضان الحنايا بريقه
وبعض الغلا اللي قسّم المهجه اقسام
……………………………مثل الســجين اللي يدينه طلـيقه!
ولو للأمل باب ٍ تجي منه الاحلام
…………………………….مااستوطن الياس بصدور الخليقه
والصمت ورد ٍ جف فتراب الانسام
…………………………….يوم انســكب عطر الكلام ورحيقه
ياصاحبي عمر الهوى ماانتهى دام
…………………………….به عـهـد مابـين الرفــيق ورفيــقه
من جيت لك والأرض في عيني حطام
…………………………….والشوق ضيّع خطوتي في طريقه!
وقريت في وجهـــك ذنوبي والآثام
……………………………..كنك تقول لخاطري …في حريقه!
بندر بن محيا ــ حياة الناس2002 ـ2003 م
****
قصيدة ريحة الطيب (بندر المحيا)
..
لو ماجمعنا الياس والتغريب
………….. هربت عن وجهك ورى سنيني
لو قلت لي بـ اجرحك قبل اتغيـب
………………. جرحت قلبي عنك بيديني
جرحتني هاذي ترى مو طيب
…………. الطيب دميّ .. وانت مخطيني!
غيرك رماني بالخطا ويصيب!
………….. والا انت تخطـي يوم ترميني!
وراي من بعض السهام اهيب!
……………. والله ما اخاف الا من يْميني
ياللي غرامك مثل عوية ذيب
…………….. كل مابغيت اغفى تصحّيني
انا السجين اللي لقى التعذيب
………… في صمت عينك ، وانت تحكيني
ليه المحبة في عيونك عيب
……………. لاصار عيبك هو نظر عيني؟
أحترقت الاعصاب قبل آشيب
……………… وياليت نار الياس تدفيني
ولااجل اتعيّن الك اذا بتغيـب:
………………. اترك مسافة بينك وبيني
مقدار ماهبت بريحة طيب
…………… ريح ، وتلّفت الك من حيني!
انا جريحك والجروح اتطيب
…………….. ولاعـاد تجرحني وتبكيْـني
مااصدّق الكذاب فالتكذيب
…………… والصدق من كذاب يعنيني!
وعدوّي أحياناً تراه صحيب
………….. واصحابي احياناً عدوّيني !
اودي الهقوة عبث واجيب
………….. وهي عبث .. صعبة توديني
لاصرت ناوي فالهجير اتغيب
……………… اترك ظلالك بينك وبيني
****
صباحك عاطر با الورد والفل والبنفسج والرياحين .
مجهودك رائع وتستحقين عليه الشكر والتقدير .
إختياراتك موفقه يسلمك ربي ويعافيك .
ولا تحرمينا من جديدك يا حلوه .
وتقبلي مروري ولكي مني التحيه ,
أختك
( إحساس طفله )
والشـْعـر انا واصله عرض وعلى طول
عد ٍرويـّتـه يوم(ن) افكاري حـبــال
في ذمتي كنـّـه المرجــان واللــول
على الورق وان قصر فالقاف .. وان طال
/
ياعمّ كل الجروح الزرق .. يـــحووول!
وراك ماصرت لجروح الـغـلا : خــال!
من غبت والمــا ظـمــا! والحلم مشلول
والحزن جرهد ودمعي وادي ٍســـــال!
ولاتحســب اني عن الاحزان مسئـول
انـت اتحمــّـل ذنوبي يوم الاهــوال
/
ان غبت غابت سنين (وكـــلّت حمول
مـتـني) ..ومتني عليه حــمــول ٍثقال
وبعض الـغلا كان مايبنى على آصــول
مثل الرجل كان مات ولا لــه عيـــال !
تْبَّعِد عن وِصالي .. والمواصل : خاتم ٍبـ ايْدك
أجل ليتك حَبيبي من بعيد إن كنت ما تَقـْرب!
الله علىَ كم الإحساس في هذه الصفحَه
عسىَ الله يوفق بندر يروق لي شِعره، وهدوءه
موضوع قيّم، ويستَحق التقييم 
تحياتي00
اختك/ نجمة الحلوين
شكرا لكي غاليتي (نجمة الحلوين)
على هذا المجهود الرائع وبالفعل الموضوع يستحق التقييم
دمتي بود
أختك/ رمز البراءه