المشهد الأول:
نايف : هلا وليدوه .. يا لله حيّه ..
وليد : هلا نايف .. الله يحييك .. بتجي الاستراحة ؟
نايف : لا والله مالي نفس.. ياخي أخويانا بايخين ..
وليد : إيه والله أنك صادز .. خاصة رائد هالرومنسي ..
نايف: إيه ذبحنا روميو العرب وسوالفه الأسطورية مع خوياته هههههه ..
وليد: ولا هيثم .. ذبحنا بالشيشه حقته .. كأنه محد يشيش إلا هو ..
نايف: من بعد الدخان وأنا غاسلن يدي منه ..
وليد: وبندر شخباره ؟
نايف: بندر ذبحنا بالبلوت ودايم يتصقع ..
وليد: ودحيم ذبحنا بسيارته الجديدة .. كأنه محد معه كامري إلا هو ..
نايف: هههههههه وش عنده البانوراما ؟
وليد: لا تجيب طاري البانوراما ويجي طاري رامي ..
نايف: وراه وش فيه ؟
وليد: ياخي شايف نفسه على وشو مدري ..
نايف: إيه والله أنك صادز .. من عقب البي أم دبليو شاف نفسه علينا ..
وليد: تصدق آخر مره جانا الاستراحة قبل شهر ..
نايف: جعله معد يجي .. إلا جعل أخويانا كلهم معد يجون ههههه ..
وليد: إلا جعلنا أنا وياك ما نروح لهم استراحتهم البايخة مره ثانيه هههههه ..
.
.
المشهد الثاني:
نوف: دودو .. شفتي ريموه في عرس أمس ..
وداد: إيه .. الله يفشلها ههههههه خلاقين وحالتها حاله ..
نوف: لابسه عشرين لون يعني أني موضة ههههه..
وداد: وش عرفك أنتي.. مصممه فستانها عند إيلي صعب هههههه
نوف: وأمها يوم قامت ترقص .. هالعجوز موب عاقلة ..
وداد: إيه يحق لها .. شكيرا على غفلة ههههه ..
نوف: ولا سوسن ما شفتي شعرها .. يعني أني " كارييييييه "..
وداد: شكلها رايحة كوافير فالنسيم ومخيس ..
نوف: لا لا شغالتهم قصته لها فالبيت ههههه ..
وداد: أما هدى حكاية ثانية .. ميك أب أبوريالين ..
نوف: لا هذي حاطه "أصباغ جوتن" ههههههه ..
وداد: عشاهم كان حلو بس بارد .. وقهروني المشافيح ..
نوف: بسمه ودانه هالدبّتين ما بقو شي ..
وداد: حتى رنا .. أكلت ثلاث أطباق جعلها المغص ..
نوف: ههههههه حرام عليك تدعين عليها ..
وداد: لا تستاهل .. أبي أعرف وين تودّي كل هالأكل !!
نوف: شكلها تقسمه على خواتها العصلات (النحيفات) الماصلات ههههه ..
.
.
.
.
– من القرآن الكريم :
* قال الله تعالى: ((ولا يغتب بعضكم بعضاً أيحبّ أحدكم أن يأكل لحم أخيه ميتاً فكرهتموه)).
* وقال سبحانه وتعالى: ((ويل لكل همزة لمزة)) . ويل: وادي في جهنم .
– من السنة النبوية :
* قال رسول صلى الله عليه وسلم: ((أتدرون ما الغيبة؟ قالوا: الله ورسوله أعلم؛ قال: ذكرك أخاك بما يكره؛ قيل: أفرأيت إن كان في أخي ما أقول؟ قال: إن كان فيه ما تقول فقد اغتبته، وإن لم يكن فيه ما تقول فقد بهته)).
* وقال عليه الصلاة والسلام: (( لما عرج بي مررت بقوم لهم أظفار من نحاس يخمشون وجوههم وصدورهم، فقلت: من هؤلاء يا جبريل؟ قال: هؤلاء الذين يأكلون لحوم الناس ويقعون في أعراضهم )) .
* الغيبة من كبائر الذنوب ، وكفارتها التوبة النصوح ، وهي من حقوق الآدميين ، فلا تصح التوبة منها إلا بأربعة شروط ، هي:
1- الإقلاع عنها في الحال .
2- الندم على ما مضى منك .
3- والعزم على أن لا تعود .
4- و استسماح من اغتبته إجمالاً أو تفصيلاً ، وإن لم تستطع ، أو كان قد مات أو غاب تكثر له من الدعاء والاستغفار .
ربي يغفر لنا ويرحمنا
والمشكلة اذا قمت تنصح شافولك وكانك جاي من كوكب اخر من الاستغراب
