وتين ..
هـذه الفتــآة المدلـله كثيــرا ً .. والجميله كثيرا ً كثيرا ً ذات الوجه الطفولي .. تبلغ من العمر 20 عــآما ً
تعيش مع والديها حمد و شيخه .. ولديها أخ اسمه نوآف ويبلغ من العمر 4 أعــوآم
حمد ذو الشخصيه القويه المعروفه ومن اغنــى اغنيــآء الرياض يملك الكثير من الاموال .. ومع قوة الشخصيه يميزه قلبه الطيب وعدله وكرمه
أما شيخــه فهي إنســـآنه لا تقل في المستــوى المادي عن زوجها .. اما في الشخصيه فهي تتميز بالغرور
و الكبرياء .. وكثيرا ً ماتقارن بين الناس والطبقات في المجتمع .. ومع ذلك يضل بها قليلا ً من الطيبه التي نادرا ً ماتظهرها ..
اما وتين فهــي انســآنه اقل مايقال فيها انها روح هادئه .. رسامه مبدعه .. رومنسيه وحالمه كثيرا ً .. مهذبه جدا ً .. متواضعه لدرجه كبيره
ليست اجتماعيه وعلاقاتها محدوده .. مدللـه وطلباتها مجابــه دائمــا ً ..
//
في منطقه اخــرى من الرياض تقطن عائله سليمان ..
سليمان رجل متواضع .. مستواه المادي متوسط .. صاحب شخصيه هادئه .. لديه زوجه تسمى حصه
حصه انسانه حنونه جدا ً جدا ً بها من الطيبه مايكفي هذا الكون .. وكثيرا ً ماتشعر بالحزن بسبب فقدانها ابنتيها التوأم في حادث قديم ..
لم يترك لها هذا الحادث سوا الحزن على ابنتيها
ولم يترك لـ سليمان سوا ضرر في احدا رجليه سبب له العرج البسيط ..
لديهم ابن يسمى هجر .. وهو الابن الاكبر ويبلغ من العمر 24 عاما ً .. هجر شخص عملي جدا ً جذاب في ملامحه ..
وبدر الاصغر ويبلغ 15 عاما ً
وفيصل ابن اخيه لـ سليمان .. قام بتربيته هو وحصه بعد وفاة والديه وهو في سن صغير
نشأ فيصل بين هذه العائله التي احبته كثيرا ً وهو ايضا ً أحبها
فيصل ذو شخصيه رائعه كثيرا ً وغاليا ً ماتكون متقلبه .. جميل بدرجه معقوله وله اسلوبه الخاص في التعامل مع من حوله
فيصل يبلغ من العمر 26 عاما ً .. وهو معلم في احدى مدارس الرياض ..
//
و في نفس المنطقه تسكن عائله متعب الصغيره ..
متعب الأرمل صاحب الشخصيه المتعصبه
يسكن هو وابنته وريف التي تبلغ 18 عاما ً وهي طالبه في الثانويه
وريف فتاة مبتسمه وشخصيه ضحوكه
ولكن حياتها رسمت لها دموع واحزان لا تنتهي وذلك بعد وفاة والدتها بمرض القلب ..
لديها أخ اكبر اسمه معاذ ويبلغ من العمر 25 عاما ً .. متواجد في امريكا ليحصل على شهادته في الطب ..
و هو غالبا ً مايتواصل معها ليطمئن عليها ..
.
هجر يضحك بأعلى صوته ويكلم خويه : الله يقطع شرك يامحمد يااخي انت ماتترك حركاتك هذي
احمد اخو محمد التوأم يرد على هجر : والله انه شيطان ومابيعقل اللين نزوجه هالداج
هجر : وشلون سويت كذا بالله من وين لك هالافكار ..؟!
محمد وهو مبتسم ويحس بشوية فخر : عاد افكاري .. انت ماتدري ان عندي نظره ثاقبه بالعالم اللي حولي
احمد يسوي حاله شرقان ويكح : نظرة وش ..؟! انت بالله عندك نظره ثاقبه اقول ريحنا بالله
هجر لازالت ابتسامته مرسومه على وجهه : وانا اشهد والله ان ماعندك سالفه بس صدفه اللي صار معك
محمد : اللحين يالدلخ انت وياه كل هالتفكير والتخطيط من شهور وماعندي سالفه .. شف كم لي وانا احاول اوصل لها ويالله بالعافيه وصلت .. ويوم وصلت اكلتها المقلب مضبوط عشان تعرف من محمد
هجر يخفي ابتسامته عنيتا ً ويتصنع الخوف : تخوف والله
احمد يضحك : اقول بس خلاص اترك البنت بحالها وش لك فيها
محمد : ايه خلاص وصلت للي ابيه والحين ماابيها
هجر يقوم : اجل انا رايح ونتقابل بالليل ان شالله
محمد : وين ياشيخ اجلس شوي معنا
هجر : لا بمر البيت واشوف وش عندي ووش ماعندي وارجع بعدين
احمد : ايه ترى الشعاء اليوم هنا لا تتأخر بالليل
هجر : ان شالله يالله سلام
محمد واحمد : مع السلامه
محمد يناظر احمد : قم قم خلنا نروح حنا بعد وش يجلسنا بلحالنا هنيا
احمد يقوم : يالله مشينا
قامت من سريرها وهي تتمغط وتتثاوب وتلم شعرها البني المنسدل لنص ظهرها بكلبسه وتعدل بجامتها الوردي الحرير .. ونزلت من السرير بعد ماخطت على درجتين لأنه عالي شوي ومشت لقفص عصافيرها اللي معلق بزاويه الغرفه ورفعت راسها وناظرتهم وابتسمت وقالت : طولت بالنومه صح ..؟! مليتو وانتو جالسين بروحكم .. انا اسفه ياحبايب قلبي .. بس اليوم ماازعجتوني بأصواتكم شاطرين والله .. لو ازعجتوني كان رميتكم بغرفه الملابس .. وضحكت وتوجهت لدورة المياه اللي بنفس الغرفه ..
بعد ربع ساعه طلعت وتين وهي مغسله ومتوضيه وصلت الظهر والعصر سوا لأنها اخرتهم .. وطلعت من الغرفه بعد مارمت شرشف الصلاه على السجاده .. وهي طالعه تقابلها الخدامه معديه من قدامها
ميسري : نعم
وتين : قولي لخاله امنه تجهزلي اكل بموت جوع وجيبيه تحت بالصاله
ميسري : اوكي
نزلت وتين للصاله وشافت الدنيا هدوء والتلفزيون مقفل .. استغربت وقالت بنفسها : وينهم ..؟!
معقوله طالعين من البيت هالوقت .. راحت فتحت باب الحوش مالقت احد .. نزلت البدروم ناظرته كله.. المسبح الطالولات والكراسي الواضح انها على ترتيب الصبح .. ومثل هالوقت نواف دايم يحوس يا بالحوش يابالمسبح مع الخدامه .. ردت طلعت وجلست بالصاله بعد ماشغلت التفزيون
بعد وقت موب طويل تجي الخاله امنه وبيدها صينيه الاكل : صحيتي يابنيتي
وتين ناظرتها وابتسمت : ايه صحيت
امنه تحط الصينيه على الطاوله وتقرب تحب وتين : يازينها بنيتي يازينها .. وش فيك طولتي بالنوم .. ؟
وتين : مانمت الا الصبح كنت سهرانه
امنه : وش له تسهرين ياحبيبتي .. السهر يضر الصحه وانا امك .. لا عاد تسهرين ياايمه سمعتي
وتين بدلع : كلها كم يوم وبتجي الجامعه وبنرجع للنظام والنوم بدري .. خليني اتهني بهاليومين ياخاله
امنه تقرب لها وتلمها وتحبها : تهني يابنيتي بس حنا نخاف عليك ومانبيك ترهقين نفسك والسهر مامنه الا المرض ياعيوني .. وتبعد عنها : شفتي الدكتور وش قال ذاك اليوم بالتلفزيون عن السهر ماسمعتيه .. قال انه ماينفع ويرهق ويسوي بلاوي سودا
ضحكت وتين : حاضر من عيوني مابسهر كثير .. وش تامرين عليه بعد
امنه ترد وتحبها : مايامر عليك عدو .. يالله عاد كلي زين وخلي عنك الديت ذا ولا تبين اوكلك بنفسي
وتين بضحكه اعلى : لا لا وش توكليني انا اكل بنفسي .. وبعدين اسمه دايت ياخاله مو ديت
امنه : ما أدري عنه هو ذا اللي تسوينه انت معصقله خلقه .. نسيتي يوم انك صغيره واوكلك .. ولا الحين صرتي كبيره وخلاص ماتبيني اسوي لك شي
وهالمره وتين اللي حبتها : انا مااستغنى عنك ابد ولا انسى كل اللي سويتيه لي .. بس ماودي اتعبك معي .. الا وين ماما وبابا ونواف ..؟! مااشوف احد بالبيت وينهم فيه ..؟!
امنه : والله ما أدري قالوا انهم بيروحون مشوار ومابيطولون
وتين : اهااا ..
امنه : انا بروح اكمل شغلي لا بغيتي شي نادي علي .. زين يمه
وتين : زين
بدر يطق باب غرفه فيصل ..
فيصل واقف على المرايا ويصلح شماغه لأنه بيطلع من البيت : ادخل
بدر يفتح الباب ويدخل : فيصل وين بتروح الحين ..؟!
فيصل : عندي كم مشوار وكم شغله بقضيها .. ليش وش بغيت ..؟!
بدر: ابيك توديني معك النادي
فيصل : خل هجر يوديك
بدر : هجر موب موجود طلع من بدري
فيصل : والسواق
بدر : السواق مع امي طلعت هي بعد
فيصل : وين راحت امك ..؟!
بدر : ما أدري
فيصل : زين يالله انزل انا بنزل وراك الحين
نوف : هلا والله
فيصل : اهلين .. كيفك .؟!
نوف : الحمدلله بخير ياقلبي .. انت شلونك وش اخبارك ..؟!
فيصل بنبره حاده : بخير
نوف : وراك معصب ..؟!
فيصل : ولا شي .. وش عندك الليله ؟
نوف : اممم .. ماادري والله يمكن اطلع من البيت .. ليه تسأل ..؟!
فيصل : بمرك اذا انك فاضيه
نوف : لا اجل تعال وانا بأجل طلعتي
فيصل : يالله اجل بيننا اتصال
نوف : اكيد ياقلبي ..
ويقفل منها وياخذ مفتاح سيارته وينزل ..
في بيت ابو معاذ اللي هو شقه متوسطه الحجم .. تطلع وريف من غرفتها وهي تكلم بالجوال وتضحك : لا لا لا اصلا اول اسبوع من المدرسه بغيب مافيني اداوم واقلق نفسي ..
هجر بسيارته ويكلمها : اُف اُف اسبوع كامل بتغيبين .. والله مادرى عنك معاذ كان ذبحك
وريف : وش بيسوي معاذ يعني .. انا كسلانه وماامشي بالدراسه ابد .. يالله يالله بخلص هالسنه وافتك .. وبعدين موب ذنبي اذا اخوي شاطر .. لازم بعد انا اكون شاطره
هجر : ايه لازم تكونين شاطره .. على فكره ترى انا مااحب البنت الكسلانه .. تدرين بهالشي ولا ماتدرين
وريف : لا اول مره ادري الصراحه .. بس معليش انا موب شاطره بس لازم تحبني
هجر : لا مااحبك الا اذا صرتي شاطره وتخرجتي بنسبه ممتازه وتكملين بعد الجامعه وتتوظفين
وريف تشهق و ترفع حواجبها : كل ذا تبيني اسويه .. لا اجل شكلك مابتحبني ابد .. تعال الحين انت يوم انك تتفلسف علي وش شهادتك بالله
هجر : انا مخلص جامعه يعني ماتدرين ووظيفتي جاهزه بداوم من اول السنه .. وبعدين وش عليك مني انا رجال اما انت بنت ولازم تنتبهين لمستقبلك عشان الدنيا ذي مافيها امان .. عاد كيفك ياتكونين كذا يامع السلامه مااحبك ولا اعرفك
وريف : صادق بس ماتقدر ..
هجر : مااقدر على وش ..؟!
وريف : ماتقدر ماتحبني
هجر يرفع حواجبه : عجييييب والله .. من وين لك هالثقه
وريف : من زمان وانا واثقه من نفسي .. يالله اتحداك ماتكلمني شهر كامل
هجر : لا تتحدين
وريف : الا بتحدا
هجر : احسن لك لا تتحدين ولا بتخسرين التحدي
وريف : لا مابخسره ..
هجر : تراك انت اللي طلبتي مو بكره تتصلين تقولين وحشتني وما أدري وش
وريف تضحك : نشوف هالحركه تصدر من منو فينا
ينفتح باب الشقه ويدخل متعب وبيده اكياس .. ووريف اللي كانت واقفه قباله وهو داخل وبيدها الجوال ارتبكت وضحكت تداري ارتباكها : طيب اجل اكلمك بعدين ياهاجر ابوي جى الحين
وريف تتلعثم بالكلام : يالله اشوفك على خير
هجر : طيب على اتفاقنا ولا لأ
وريف : ايه .. يالله مع السلامه
وتنزل الجوال تحطه بجيبها وتروح لأبوها تحب راسه وتاخذ منه الاكياس : يعطيك العافيه
متعب : الله يعافيك .. من كنت تكلمين ..؟!
وريف : صديقتي هاجر ..
متعب : من هاجر هذي .. بنت من ..؟!
وريف : صديقتي بالمدرسه
متعب يناظرها بنظره حاده : ماابي مكالمات زياده عن اللزوم بالجوالات وفلانه صديقتي وعلانه خويتي .. موب كل من طبل لنا رقصنا له
وريف بخوف : طيب انا ماسويت شي يايبه
متعب : ادري انك ماسويتي شي بس ابيك تنتبهين لنفسك اكثر .. يالله خذي هالاكياس للمطبخ ..
وريف بحزن : ان شالله وتروح للمطبخ وتفتح الاكياس كان ابوها متقضي للبيت مقاضي خفيفه ورتبتهم كل شي بمكانه وهي تقول بنفسها : اُف ياربي على الطالعه والداخله نصايح وهم .. شكلي بكمل دراستي مثل ماقال هجر عشان مااجلس بالبيت .. يااربي بس متى اتزوج واطلع من هالبيت اللي يطفش
يرن تلفون البيت بهالحظه وتركض للصاله عشان ترد بس شافت ابوها بوجهها وخففت سرعتها ومتعب انتبه لها
متعب : تعالي ردي
توجهت وريف ورفعت الخط : ايوه نعم
حصه : السلام عليكم ورحمه الله وبركاته
ابتسمت وريف وهي تحب حصه لأنها بأستمرار تسأل عنها : هلا وعليكم السلام ورحمه الله
حصه : شلونك يابنيتي .. وش اخبارك
وريف : الحمدلله بخير انت كيفك ياخاله
متعب عرف انها حصه بدون لا يسأل بنته لأن مافي غيرها يتصل على البيت
حصه : بخير يارب لك الحمد .. هاا استعديتي للمدرسه ولا باقي
وريف : لا والله ماسويت شي ..
حصه : متى بتتجهزين مابقى غير اسبوع ..
وريف : ان شالله بتجهز يمدي الوقت
حصه : تبين امرك لا رحت اتقضى لبدر ..؟!
وريف تبتسم : لا والله تسلمين انا بروح مع ابوي ان شالله
حصه : لا تستحين انت مثل بناتي الله يرحمهم .. ربي خذاهم واعطاني اياكي ..
وريف : الله يرحمهم ..
حصه : في خبر موب زين عرفتيه ولا لأ ..
وريف اختفت ابتسامتها وانقبض قلبها : لا ماعرفت شي .. وشو الخبر ..؟!
حصه : بننقل من بيتنا لحي ثاني .. بس ماابيك تزعلين لأني بمرك على طول وبعد انتو بتدلون بيتنا وتجينا
وريف انصدمت من الخبر يعني هجر ماقال لها أي شي عن هالموضوع وقالت بأنفعال : ليش ومتى ..؟!
حصه : ان شالله بهاليومين .. الحين حنا بنفضي البيت وبهالاسبوع ان شالله بننقل
وريف بحزن : ليش ..؟! ليش ماتجلسون في بيتكم بيتكم حلو ومافيه شي
حصه : ياحبيلك خلاص عاد ذاك البيت اكبر وازين بعد .. وان شالله العقبه لكم
وريف : ان شالله
وريف : سلامتك وماتقصرين
حصه : الله يسلمك .. ولا تسوين عشا الليله انا برسل لكم
وريف : لا مايحتاج لا تتعبين حالك
حصه : لا تعب ولا شي .. وش حدك انت وابوك .. كلها صحنين
وريف : مثل ماتبين ياخاله
حصه : يالله مع السلامه
وتين بعد ماخلصت اكل نادت على الخدامه تشيل الصينيه وتجيب لها جوالها من فوق عشان تتصل على امها وتشوف وينهم .. لكن بمجرد ماراحت الخدامه انفتح الباب ويدخل حمد وشيخه اللي ماسكه نواف من يده ..
حمد : السلام عليكم ورحمه الله
وتين التفتت لهم : وعليكم السلام .. وينكم .. وين رحتوا ..؟!
شيخه تفصخ عباتها وتدخل للصاله ووراها زوجها ويفلت من يدها نواف ويركض لـ وتين : وتين وتين
وتين تشيله وتبوسه : وين كنت ..؟!
شيخه ذات الشخصيه القويه والحنونه بنفس الوقت جلست : رحنا مشوار فاتك
وتين : وين .. وليه مااخذتوني معكم ..
حمد : كنت نايمه ومابغينا نخرب عليك النومه
وتين : زين وين كنتو ..؟!
شيخه تناظر حمد وتبتسم : اقولها ..؟!
حمد يناظر وتين : لأ
وتين بإسلــوب توسل : وين .. تكفون قولولي ..
شيخه : مفاجئه
وتين : ماما .. بابا .. يالله عاد علموني .. وتناظر نواف : نوافي وين رحتو ..؟
نواف يناظر امه وابوه اللي محرصين عليه مايقول شي ويرد ويناظر وتين : مالحنا متان ( مارحنا مكان )
وتين بدلع : يالله منكم .. خلاص ماابي اعرف
حمد يبتسم : اقول ياوتين
وتين بزعل وتكشيره حلوه : نعم
حمد : لا ولا شي
وتين : ماااامااا
شيخه تهز كتوفها : انا مااقدر اقول شي ..
نواف : انا ادولك .. ( انا اقول لك )
حمد بصوت عالي : ياويلك
نواف خاف : لحنا ثرينا حلاو .. ( رحنا شرينا حلاو )
ويطلع لها حلاوه مصاص من جيبه : ثوفي ( شوفي )
وتين تناظر التلفزيون : خلاص قلت لكم ماابي اعرف
شيخه : خلاص قولها حرام تحسرها
حمد يبتسم : اقول ولا ماا اقول
وتين : لا تقول
حمد : لا بقول
وتين : لا لا تقول
حمد سكت شوي وبعدها قال : رحنا شرينا لك سياره
وتين ما استوعبت اللي قاله فتحت عيونها على الاخر : صدق ..؟!
شيخه تضحك : ايه صدق
حمد يطلع المفتاح من جيبه ويحركه لها : لكزس بانوراما
وتين تصرخ من الفرحه وتنقز : لي انا ..؟!
حمد : ايه لك انت .. وخذي مفتاحها ومتى مابغيتي تطلعين من البيت اطلعي فيها مع السواق
وتين تروح له وتحضنه وتبوسه : شكرا ً .. يااحلى ابو بالدنيا
شيخه : وانا مالي بوسه وشكرا ً ..؟!
وتين تروح لها : وانت بعد شكرا شكرا شكرا
وتنادي بصوتها على الخاله امنه : ياخاله امنه .. تعالي شوفي
وتطلع امنه من المطبخ وهي تمشي بسرعه وتعدل شيلتها : وش فيك يابنيتي وش صاير ..؟!
وتمد لها مفتاح السياره : بابا وماما جابو لي سياره هديه
امنه مستغربه : سياره ..؟
وتين : ايه سياره
الكل ضحك على جملتها ..
وتين : لا ياخاله بس لا بغيت اروح أي مكان بعطي المفتاح للسواق واروح معه
امنه : ايه .. اجل مبرووك يابنيتي مبروك
نواف يناظرهم وبيده حلاو ويروح يكلم الخاله امنه وهو واقف عند رجوالها : تبين حلاو
وامنه ترفعه بثقل : ياعلها بالعافيه على قلبك ياوليدي وتحبه
بعد ماجلسوا قالت وتين : بابا وش مناسبه الهديه ..؟!
حمد : بدون مناسبه .. يعني اذا بجيب لك هديه لازم يكون في مناسبه
شيخه : حنا ماعندنا الا بنت وحده ونبيها احسن الناس .. عشان كذا ابوك جاب لك السياره .. عرفتي
وتين : الله يخليكم لي يارب
حمد وشيخه : امين ويخليك بعد ..
حمد يقوم يوقف : يالله انا بطلع اخذ لي دش وبطلع عندي شغل
شيخه : بتتعشى بالبيت ..؟!
حمد : لا يمكن برا
وتين : لا بنتعشى كلنا برا وبنروح بسيارتي
شيخه : فكره حلوه
حمد : لا خلوها بكره اليوم مايمديني
وتين : بابا تكفى عاد لا تقول مشغول.. وروحو بروحكم
حمد : عاد الليله مشغول عندي اجتماع مهم اجلوها لبكره وانا اروح معكم ولو تبون اليوم روحوا بدوني
وتين : لأ بدونك لأ نبي كلنا سوا
حمد : اجل بكره ان شالله
شيخه : خلاص ياوتين بكره مايفرق عن اليوم .. خليها بكره
وتين : اوكي بكيفكم
حمد يرقى الدرج ويروح لغرفته وشيخه لحقته بعد وقت موب طويل ونوا ف نام على الكنبه ووتين قامت لغرفتها هي بعد ودخلت وقفلت الباب عليها وتحس بفرحه كبيره .. ضلت واقفه بوسط الغرفه الكبيره واللي مسميتها مملكتها الخاصه وناظرت كل ركن فيها .. اللين وقفت عيونها على رسمة البنت الحزينه اللي على لوحه كبيره مبروزه ومعلقه على جدار الغرفه وهاللوحه هي رسمتها بنفسها .. مااتدري ليش رغم العز والجاه والمال والدلع اللي هي عايشه فيه تحس بحزن دفين بداخلها وانها تفقد شي كبير بس وش هالشي ماتدري .. تلاشت هالافكار من راسها بعد مااخذت جوالها واتصلت على صديقتها نوف : الو الو
نوف : هلا والله .. يااهلين وسهلين
وتين : هلا فيك .. كيفك
نوف : بخير الحمدلله .. انت كيفك ..
وتين : الحمدلله مبسوطه على الاخر ..
نوف : ان شالله على طول تكوني مبسوطه بس وش اللي باسطك هالكثر .. لايكون عشان قربت الدراسه والجامعه وهمها
وتين بفرحه : لا تخيلي بس اكون فرحانه عشان كذا .. بابا وماما وش جابوا لي اليوم ..؟!
نوف : ايش ..؟!
وتين : فكري
نوف : اممم .. لابتوب جديد
وتين : لأ
نوف : جوال جديد
وتين : بعد لأ
وتين بدلع : فكري شوي
نوف : والله ما أدري .. يالله انت قولي وريحيني من التفكير
وتين : جابوا لي ..
نوف : ايوه
وتين تقولها بفرحه : جابوا لي سياره
نوف فتحت عيونها على كبرها وابتسمت : صدق ..؟
وتين : ايه والله .. صار عندي سياره
نوف : وش نوعها ..؟!
وتين : لكزس
نوف متفاجئه : ماشالله تبارك الله .. على البركه .. متى بتمريني ان شالله ..ثم ضحكت
وتين : الوقت اللي تبينه بمرك وبنتمشى ونتعشى بعد
نوف : يالله مبروك ان شالله
وتين : الله يبارك فيك يارب .. شرأيك امرك اليوم نتعشى برا
نوف : لأ اليوم مايمديني اطلع من البيت
وتين : ليه وش عندك ..؟!
نوف : مشغوله شوي
وتين : بوش مشغوله ..؟!
نوف : ياربي ياللقافه وش دخلك الحين
وتين تضحك : ترى ماامرك بسيارتي
نوف ضحكت : الله لا يحوجني لك ..
وتين : لا لا امزح معاك .. اصلا انا مااعرف غيرك صديقه ومااقدر ازعلك
نوف : ايه احسب بعد بتقولين غير ذا الكلام
بعد ماخلصوا سوالف قفلت نوف وتحس بشي بداخلها .. هي مالها صديقات ابد غير وتين واللي القدر رماها عليها بالصدفه بالجامعه .. ولسوء حظها ان وتين بنت مره جخ وبنت عز وعايشه مع اهلها ونوف على العكس تماما ً .. ووتين دايم تسولف عن حياتها والنعيم اللي هي فيه وحب اهلها لها هالشي يأثر بنوف مع العلم ان وتين تسولف لها بطيب نيه .. بس كان يأثر بنوف كثير لكن ماتبين لوتين ابدا ً
هجر يدخل للبيت ويقابل امه وهو داخل : السلام عليكم ورحمه الله
حصه : وعليكم السلام ورحمه الله .. راجع بدري اليوم وش عندك
هجر : لا بطلع مره ثانيه بس جيت اغير ملابسي
حصه : اخوك بدر تأخر بالنادي رح جبه
هجر : اللحين اقول للسواق يمره انا مايمديني
حصه : كله مشغول انت ومايمديك .. ياولدي اجلس بالبيت شوي وانت كل وقتك برا .. وبعدين مابقى شي وننقل عسى بتجلس طول الوقت برا وابوك واخوك ينقلون العفش
هجر : لا يمه لا نقلنا بكون موجود اول واحد .. وبعدين وش يجلسني زي الحريم بالبيت
حصه : الحين اللي يجلس في بيته حرمه .. الله يهديك بس
هجر : امين الله يهديني ادعيلي بس انت
حصه : والله اني ادعيلك انت واخوانك واخواتك بعد
هجر : الله يرحمهم .. بس يمه لا تدعين للأخواتي تراهم صغيرات ماعندهم ذنوب
حصه حست بالحزن : ياحسرة قليبي عليهم
هجر لوى بفمه : يوووه .. اسف اسف يمه ماقصدي اذكرك .. الا وين ابوي
حصه : اتصل عليه رجال وطلع من بدري
هجر يطلع الدرج : يالله انا بدخل اتروش واطلع مره ثانيه متواعد مع الشباب نتعشى بالاستراحه اليوم