السلام عليكم ورحمة الله وبركاته
أخواتي العزيزات اكتب لكم وانا مقتنعة بأن الي راح اكتبه غلط لكن أبي أحد يعلمني كيف اتخلص من الشعور الداخلي الي لطالما عذبني ايام وليالي …
أنا من عائلة متوسطة تخرجت من الجامعة الحمد لله ، ولله الحمد على قدر من الجمال وكنت انخطب من يوم كنت بالثانوي لكن فضلت اكمال دراستي الجامعية اولا بعد التخرج بمدة تقدم لي شخص من عائلة ثرية ومعروفة بمدينة الرياض وامي كانت فرحانة جداً وما اخفيكم سعادتي كانت اكبر بعد ما سأل الوالد عنه وعن اخلاقه الصراحة ما لقى رد شافي من الي حوله خصوصا ان مجتمع الرياض كبير جداً واصبح من الصعب ان الواحد يسأل عن اخلاق شخص
بحثت كثيرا في وسائل التواصل الاجتماعي عن اسمه ما حصلت شي له المهم ابو خطيبي كلم الوالد وحددوا موعد وشاف الولد وحددوا موعد الشوفة الشرعية المهم خطيبي انه يشوفني على انفراد والوالد ما مانع جلست معاه وما اخفيكم كنت متشوقة اشوف شخصيته وكنت راسمه اشياء كثير في ذهني اول ما بدأ يتكلم قال انا شخص عملي وبدخل في الموضوع مباشرة انا راح اطلع بعثة بعد كم شهر واذا اراد الله وتم الزواج راح تكونين معي لكن للتوضيح انا ما احب احد يتدخل في شئوني او يسألني عن أي شي يخصني انا ما أحب اطلعه لاحد وانتي لك مكانتك واحترامك وكل الي تطلبينه راح يلبى لك فورا دون نقاش عندك شي تبين تقولينه .. انا لحظتها ما ادري وش جاني هل هو شعور بالصدمة او خوف ما ادري لحظتها فاجأني قال ما عطيتيني ردك قلت له طيب الي تشوف وقمت من مكاني .
بعدها الوالده سألتني علمتها هي لحظتها قالت يا بنتي استخيري وعطيني ردك . فكرت كثير وشاورت خواتي الي تقول وافقي هذا فرصة بيخليك على راحتك والي تخوفني من المستقبل انا استخرت وما ارتحت ورفضته وفيه شعور في داخلي يأنبني اني ليتني ما رفضته المهم بعدها بمدة خطبتني وحده من اقاربنا لولدها واستخرت وحسيت براحة على انه موظف بسيط وحالتهم المادية عادية لكن حسيت براحة له خصوصا بعد ما سمعت راي ابوي واخوي فيه انه رجال وكفو ويتحمل مسئولية بيته تزوجنا بسرعة كبيرة لدرجة ما حسيت بالأيام وسافرنا سفرة بسيطة ما انكر هو خلى المكان جميل بالنسبة لي وكنت مبسوطة توظفت بعد الزواج وظيفة بسيطة عشان اتسلى لكن تجيني حالات الي هي محل موضوعي واجلس ابكي بالليل كثير واحس ان هذا مو مكاني واني استحق الافضل حياتنا حياة عادية انا اقوم بأشغال البيت وهو يصرف على البيت على حسب قدرته الترفيه مو دائما مريحني في اشياء وما يضغط علي لكن احيانا اذا قارنت حياتي بحياة بعض الي حولي اندم واقول ليتني ما اخذته وتجي مواقف احيانا من الناس الي حولي تخليني انفجر في وجهه واطلع كل الي في خاطري عليه وهو الله حق يتحمل ويسكت ويحاول يهديني رجعت لبيت اهلي خلال 3 سنوات اكثر من 10 مرات واتعوذ من الشيطان واقرى قرآن واستغفر وارجع ومع هذا شعوري الداخلي اني مو مرتاحة معه علما بأنه يصلي ويخاف الله صحيح يجي منه اخطاء لكنها اشوف تحدث من الجميع وانا متأكدة انه يدري اني مو مرتاحة فما يضغط علي ولا يبين انه متضايق على ان امه كم مرة تقولي انتي روضتي فلان لأنه عصبي جدا فاستغرب من كلامها انه ولا مرة عصب علي الا في نطاق ضيق وعصبية بسيطة واحسه ماسك نفسه كثير اخر مرة الي حسيت انه انهار فعلا صارخت في وجهه كنت راجعة من زواج وركبت وانا زعلانة ويكلمني وانا ما ارد فجاة دق جواله يكلمه واحد من اصدقائه عشان بيسافرون بعد ما قفل انفجرت في وجهه وقلت انت ما تحس ولا عندك دم انا تشوفني زعلانة وما تكلمني علما اني وانا رايحة الزواج كنا نضحك ونسولف هو استغرب قال انا ما زعلتك بشي شفيك زعلانة وقعدت اصرخ وابكي ودخلنا البيت وانا ميتة وهو يهديني وانا ابعده عني واقوله كارهتك وكاره شكلك وعيشتك القرف انا دافنه نفسي بالحيا ولا سويت لي مثل باقي الحريم انا لو ماخذه الي قبلك كان انا في هنا هو لحظتها ولع ووجهه صار زي الجمر وتوه بيتكلم وطلع من البيت وانا اصرخ واسبه . وقعدت اتحسر على نفسي ليش ما خذت هاك الرجال .طبعا رجع للبيت الصباح ونام في الصالة وما كلمني صحيت الظهر ما لقيته يوم جا العصر واتصل على جواله كان مقفل قلقت عليه وندمت كثير على الكلام الي قلته دخل البيت قبل المغرب وشفته ودخلت غرفتي توقعت انه بيدخل بيكلمني لكن صار العكس جاب لي وله غدا وقعد ياكل لحاله طلعت قلت له انت ليش ما تكلمني رفع راسه وما رد علي صرخت في وجهه وبدون ما يناظرني قال لا ترفعين صوتك واحترمي نفسك ما بي اسوي شي اندم عليه وما بي اكلمك قام غسل وطلع من البيت جهزت شنطتي وارسلت له قلت بروح لاهلي وابيك تطلقني جا بعد العشا ووداني بدون أي ردة فعل جلست عند اهلي اسبوعين ما كلمني فيها وعلمت اهلي بالسالفة وتكلم علي ابوي وامي وقالوا انتي اصلا ما تنفعين تصيرين زوجة . يوم ربي اراد اني اشوف الصدق بحثت في تويتر مرة عن اسم خطيبي السابق ولقيته طبعا حسابه مقفل سويت متابعة له واضافني بسرعة ودخلت وشفت الي ما ينشاف علاقات وصور غريبة وحفلات برى المملكة طبعا وتذكرت زوجي واستقامته وقعدت احمد ربي واستغفره وسمعت وقريت كلام المشايخ عن ان المرأة الي تطلب الطلاق من غير بأس حرمت عليها رائحة الجنة جلست ادق بعدها على زوجي اكثر من 50 مرة ورد علي وانا ابكي وقلت له انا احبك والله اسفة انا ما استاهلك تكفى بجيك انا وببوس رجلك سامحني طبعا هو يحبني كثير فوق ما اتخيل وفي اقل من ساعة كان عند باب بيت اهلي وخذاني رحنا وتعشينا وتعذرت منه وبكيت كثير وهو قال انا سامحتك بعدها بمدة كنا طالعين نتمشى قال لي فلانة عديني اني ابتلاء بلاك ربي فيه واحتسبي الاجر انا انصعقت من كلامه قلت ليش تقول كذا انا احبك قال بس مو مرتاحة معي وندمانة واذا شفتي انك ما عاد تقدرين تكملين ارجوك نترك بعض بدون شوشرة وبكل هدوء احسن انا عذرته في كلامه وما رديت طبعا هو تعامله معي مثل اول واحسن بس اشوفه يسرح كثير واحس في قلبه غصة بس ما يرضى يتكلم انا طولت في حديثي اعذروني تكفون دلوني على الطريق الله يخليكم .
من تملك مثل هذا الرجل اعتقد انها اسعد انسانه في الوجود …
احتفظي بزوجك واسأل الله ان يسخرك له ويسخره لك ..
دمتي بود
انتي الشيطان تمكن منك صح ولعب فيك لعب
شوفي اول شئ انتي استخرتي في زواجك الاول وربي بعد عنك الشر
لازم تقتنعي بنصيبك مهما كان وهذا المقسوم لك من رب العالمين
انا ما راح اطول في حديثي معاك
لكن انصح بالتالي
لاتقارني حياتك باي احد مهما كاااااااان
احترمي زوجك واحسني التعامل معه كزوج حسسيه انه رجل وصاحب قوامه واطيعي كل اوامره
وان شاء الله مع الوقت يرجع احسن من اول
هذا الحل الوحيد
استغفري ربك وتوبي اليه ..انتي بنعمة يفتقدها الكثيرات .
زوجك يستحق منك الاحترام والتقدير ….
الانسان لما بيلاقي شخص يحبو عليه بالمحافضة عليه بكرى لو تخصريه
راح تعضي صوابعك من الندم …
حافضي على بيتك و زوجك واجبري بخاطرو لان الي قلتيه شيء يجرح حقا…
والكلمة السيءة
لا تنسى احمدي ربك لو كان رجل
اخر كان طلقك …
و لانو يحبك سامحك …حافظي عليه بارك الله فيك .
وعوضيه خير على تصرفو معك.
وارضي بنصيبك لانك انت الي وافقتي عليه وماحد جبرك
استغفري الله واعتذري لزوجك وخليه تاج فوق راسك وابدا مااتجيبي سيرة القصص القديمة انسيها وعيشي حياتك حبيبتي… ناس كتير بتمنوا عيشتك.. وربنا يهدي بينكم ويصلح بينكم
زوجك تعرفينه كزوج وقاعدة معاه
هذاك مجرد كلام
حطيه ع رأسك وادعي ربك يسهل رزقته