بإ ذن الله اللي تبي الزوج أو الذريه أو المال تعالي -اسلاميات 2024.

——————————————————————————–
خواتي اليوووم موضوووعي غيررر غيرررر،، صدق اللي تحس عمرها مظايقه وحزينه او فخاطرها شي وما تحقق او مهمومه او اي شي،،

فبقولها عزيزتي ما غلطتي يوم دخلتي موضوعي لانك صدق بتستفيدين وما بتطلعين الا وانتي مستانسه وبتحسين هموم الدنيا طاحت عنك،،

كلنا ناس وكلنا لنا حاجاات ونمر فابتلاءات وفمشاكل وضغوط هالحياة وصدمات من ناس ومواقف تخلينا صدق نتعب ونهتم ونسكن الحزن قلوبنا،،

بس عزيزتي اللي تقرين كلماتي الحين بعطيييك اشااااراتـــ وخطوات اعتبريها اشارات الدواء،، وتحتاجينه صدقيني علشان يتحققلك اللي فبالك،،

كلمات وعبارات ارسلها لك من قلبي،، وكلي ثقه انها بتوصل قلبك وبتدخله علطوووول وبتسكنه،، وكلامي مب من هوى،، بالعكس من تجارب ناس حقيقيه،،

حاولت قد ما اقدر اجمعهن فموضوع واحد،، لاني صدق صدق اشوفنا محتاجين له،،،

خواتي: اللي عندها مشكله،، واللي تعاني من زوجها،، واللي تبى تحمل،، واللي تبى تنجح وتتخرج،، واللي تبى الرزق،، واللي تبى ربي يصلح امورها،، واللي تبى ربي يحققلها اللي فبالها واللي تبي الزوج الصالح واللي واللي ،،، الـــــــــــــــــــــــخ

تعالي ويايه وانا ابصم لك بتحققين اللي تبينه ،، والطريقه وايد سهله،،، جربي طريقتي وبتلاحظين من اول يوم فرق واااااااظح فحياتك،،،

يالله بنبدأ،،،،

أول شي عزيزتي ابيكي تسجدين الحين شكر وحمدلله رب العالمين،، انه رزقك بنعمة الاسلام ورزقك هالبلاء او هالمشكله علشان يشوف صبرك ويصلح لك حالك ولا تنسين اكيد اشتاقلك ملك الملوووك،،،

وابيكي تسترخين استرخاااء تام ووتنسين انك من اهل الدنيا،، حديثنا اليوووم غيررر حديث روووح وهمسات قلب وأنين ضمييير يشتكي ،،،

كلنا نذنب ونعصي وكلنا نغلط،، وربي يقووول بما فيه معناه،، لو كانو الناس ما يذنبون،، كان ربي جاب قوووم غيرنا يذنبون فيستغفر لهم،،

والله لهالكلام سلوى للخاطرررر

تعااالي ويايه هاتي اييييدك لاتخافين اوعدك ما تنزل دموعك لانك اخترتي تقرعين باب السماء باب ملك الملوك رب العالمين تعااااااااااليـــ غناتيــــــ

اختيه الغاليه،، جربي ويايه نرقد من وقت الساعه 10 بليل،، وخلينا ننوي نقوم الليل لا تقولين صعبه،، سهله والله اذا عندك عيال رقديهم من وقت ورقدي وياهم،، خلونا شوي بعيد عن السهر والافلام والانترنت،،،

شو رايك تظبطين جوالك وتقومين الساعه 2 ونص،، لا تقولين وايد من وقت،، نحن رقدنا اربع ساعات ونص،، ولا تنسين انه نحن اصحااااب حاجاااات نحتاج ربنا فهالووووووقت،،، ربي ينزل فالثلث الاخير في ليل ويقول هل من تائب فاغفر له وهل من سائل فاعطيه وهل من داعي فاستجيب له ،،

احلى شي الليل يشهد بقصص التائبين ودموع المكروبين وفرح المهمومين بفرجهم،، كوني منهم عزززززيزتي،،،

خلينا نصلي قد ما نقدر ونطول فالقيام لحد الساعه 3 وربع ويفظل لو تقرين سورة البقره فقيام الليل مفعووولها عجيب فالبركه والراحه النفسيه وتبعدعنكي العين والحسد والسحر وكل شيء سبحان الله،،،

وخلو ثلث ساعه ندعي وهنا احلى ى ى ى شي،، ربي فوووقك علطووول والملائكه حولللليييك،، حتى اني احيانا والله افتح دريشه واتريا اسمع صياح الديج ويصيح وايد هالوقت لانه يشوف الملائكه وقت السحر وهذا وقت فظيييل لدعاء،، اتذكر وحده من الاخوات تقول،، انها تسوي لنفسها اجواء وهي تصلي قيام الليل تسكر الاضواء وتشغل الابجوره وترتب الغرفه وتخليها اجواء فنتكه علشان تتهيأ عدل للصلاه،، لا تصتغرون هالشي،، سبحان الله حتى يمكن ملك مار عندك ويرفع دعوتك،، اصلن يكفي انه ربي قريب عليك ويسمع دعائك

ادعيه من قلب وصيحي فظفظي له اشكيله حالك خبرييييه،، اتركي الشكوى للناس،، اقرعي باب ملك الملووووكـــ،، لكي حاجه والناس صدووكي،، تبين تحملين تبين زوج صالح تبين أي شي،، مافي شي مستحيل ويا ملك الملوووك ،، ادعيه باللي تبينه صيحي وحاول تصيحين واظهري افتقارك ،، ربي يسمعك ويفرح بعودتك

المسلم يسأل الله تعالى من فضله، فهو يعلم أن الله تعالىقريب إليه، ويدفع عنه، وان الدعاء يفع مما نزل ومما لم ينزل وان البلاء لينزل ويلقاه الدعاء، ويعتلجان إلى يوم القيامة.

يقول حكيم: ليس بفقيه من كان له عند الله حاجه ولا يقوم الليل"،، الله خلصتي الدعاء وصحتي وطلعتي كل اللي فخاطرك وانتي متيقنه لنه ربك بيستجيب،، طيحي عسجاتدك عجنبك اليمين واجلسي استغفري باصابعك عندك نص ساعه تقريبا لين يأذن الفجر

استغفري وااااااايد ربك يقول " والمستغفرين بالاسحار " كثررري وايد صدقيني الاستغفار سبب فتحقيق الآمال،، ويفتح الاقفال
شكت امراه اشيخ انها ما تحمل
قالها الزمي قيام الليل والاستغفار في الاسحار،، فوالله ما ما مر الا 15 يوم وهي تشعر بآلام ولما كشفت وجدت نفسها حاممممملـــ سبحانك يالله،، لا ترد من سألك ما اعظمك

وقومي عيشي حياتك طووول اليوم بين صلاه واستغفار واطلعي واستانسي واظحكي وعيشي حياتك روحي للمولات واللي تبينه،، مافي وقت للهم وللحزن ولا الظيج،، ربي بيفرج كل شي،،، صلي الضحئ وتقربي لله بنوافل ولا تنسين الوتر

حافظي على سورة يس قبل ما ترقدين،، لانك اذا قريتيها فليله بنية خالصه لوجه الله اصبحتي مغفوووور لك،، يالله عرظ مغررررررررري روعه،، يكفي انه القرآن يشرح الصدر والبااااااااالـــ

الزمي ركعتين حاجه كل يوم فأي وقت وداومي عليها ربي ما بيخيب ظننننك،،، الزم دعاء ذي النون" لا إله إلا انت سبحانك إني كنت من الظالمين" لا تنسين الرسوول قال من دعاه به وهو في كرب استجيب له،،
لا تنسين صدقه مفعولها سحرررررررررررري ،،، واتصدقي وادعي ربج انج تصدقتي بنية ربي يرظى عليه وتقربي بدعائك له باعمالك الصالحه مثل ما سوو أهل الكهف،، والكل يعرف قصتهم،،

وخلي الأطفال يدعوون لك ،، الاطفال ما عندهم ذنوووب صغااار،، خليهم يدعون لك،،

ربك ما تعرفين دعوه تصادف وقت استجابه وتنرفع وتكون سبب فانفراج محنتك وكربتك،،،

ولازم نصفي قلوبنا صوب كل الناس ونرد الحقوق لاصحابها ونتسامح من اللي غلطنا عليهم وما نغتاب حد،، ترا كل هالاسباب سبب فاستجابة دعاء،، وما نستعجل اهم شي

وربي يفرج همومنا وكروبنا ويحقق لنا اللي فبالنا عاجلا غير آجل لاإله إلا انت سبحانك إني كنت من الظالمين،، واسمحوووولي خواتي طولت عليكن،،،

وكلنا موجودين هنيه فهالموضوووع وبنشجع بعض خواتي،، وبنتواصل بدعاااااء،، بس صدق والله يا خواتي حطي هالمعادله فبالك:

الدعاء+ قيام الليل+ الاستغفار+ الصدقه + حسن الظن بالله = فرج فرج فرج وتحقيق للآمال ورضى ملك الملوووك

– من لزم الاستغفار جعل الله له من كل هم فرجا ، و من كل ضيق مخرجا ، و رزقه من حيث لا يحتسب
الراوي: عبدالله بن عباس المحدث: الألباني – المصدر: السلسلة الضعيفة – الصفحة أو الرقم: 705
خلاصة الدرجة: ضعيف
**********************************