اخواتي العضوات المحترمات
اليوم جبتلكم حمية انا جربتها وحسيت انها خفيفة وسهلة بس المهم انك
تداومي عليها حتى لا يرجع الوزن اللي فقدتي بسرعة. ..
يا سيدات ويا بنات %%% هاي الحمية بروتينية 100% وبعدين تبدي تدخل الاكلات فيها شوي شوي.
المهم تحافظي على 3 عناصر مهمة فيها :
( شرب لترين من الماء في اليوم قبل الاكل وبعدة بنص ساعة وخلال اليوم كله – مشي ثلث ساعة باليوم وتكدرين تعوضين عنه بحركة زايدة شوي – الاهم هو انك تاكلين ملعقتين شوفان كويكر باليوم بأي طريقة )
حبيباتي راح انقسم الحمية الى 4 اقسام : لازم توزنين الاول وتعرفين شكد تريدين تنزلين من الكيلوغرامات لانه المرحلة الاولى تعتمد فترتها على هذا الشي.
المرحلة الاولى : هي مرحلة تاكلين فيها بس بروتينات فقط ( كل انواع اللحوم والسمك والبيض ) مشوية او مسلوقة او مطبوخة بدهن قليل. في وجبتين الغداء والعشاء. ممنوع كل الاشياء الباقية والشاي والقهوة لازم من دون سكر طول مراحل الريجيم الاربعة.
تكدري تاكلي مع اللحوم علبتين في الوجبة الوحدة من لبن زبادي خالي او قليل الدسم.
وكمان تاكلي علبة كلما حسيتي بجوع بين الوجبات.
طبعا راح تسألون عن كمية اللحوم اللي لازم ناكلها بالوجبة ؟
اكلك انه الكمية مفتوحة حتى تشبعي { بس يعني لا تزيديها عن المعقول } 
اما مدتها فحسب عدد الكيلوات اللي تريدين تنزليها :
– اقل من 5 كيلوغرامات : تستمر ليوم واحد. بسيطة
– من 5 الى 10 : ثلاث ايام
– من 10 الى 15 : خمسة ايام.
– اكثر من 20 : سبعة ايام ( بس في هذه المرحلة لازم يكون تحت اشراف الطبيب. انا بلغت اللهم فأشهد ) .
المرحلة الثانية : هالحين راح ندخل الخضراوات النية والمطبوخة والخضار النشوية مثل البطاطا والبقوليات مثل الفاصولياء والعدس والحمص.
راح تدخل لمدة 3 ايام في الاسبوع بالتناوب مع اليوم البروتيني. يعني
يوم بروتيني – يوم بروتين وخضار – يوم بروتيني …
راح تستمر هذه المدة ( الى ان توصلين للوزن اللي انتي تريديه ) وطبعا لا تنسين العناصر الثلاث اللي ذكرتهم فوق.
المرحلة الثالثة : هالحين انتي نزلتي … ووصلتي للوزن اللي تريديه … شنو راح تسوين ؟؟؟
احسبي كم كيلو نزلتي واعطي 10 ايام لكل كيلو. .. وهو راح يكون مدة المرحلة الثالثة. …يعني اذا نزلتي 5 كيلو راح تكون المدة 50 يوم وهكذا. … اتصور فهمتوها مو صعبة مو! !!!
شنو اللي راح يصير بهذه الفترة : قسمي المدة على قسمين.
في القسم الاول راح ندخل شوية من الخبز الاسمر يعني قطعتين صغار. قطعة جبن قاسي خالي الدسم. 200 غرام برغل مثلا مطبوخ.
راح تكدرين تاكلين حبة فاكهه وحدة كبيرة مثل البرتقال والتفاح. او ثمرتين صغار مثل المشمش والخوخ والاجاص. ما عدا التين.
اهم شي : عندك في الاسبوع وجبة حرة تاكلين فيها الاكلات اللي تريديها بس بكمية معقولة.
ولازم يكون في يوم واحد بالاسبوع بروتيني وهذا شرط مهم. 
وهذه المرحلة تسمى مرحلة التثبيت حتى لا ترجعين المزن اللي فقدتيه.
في القسم الثاني من هاي المرحلة راح تضاعفين كل الحصص اللي دخلناها جديد . يعني كمية الخبز والبرغل او ممكن معكرونة معمولة من حبة القمح الكاملة. وكمان المفاجئة : ((( اللك وجبتين حرة بالاسبوع )))
وكمان لا تنسي العناصر الثلاثة واليوم البروتيني.
المرحلة الرابعة : هاي المرحلة متروكة مدتها لك انتي تقررين كم فيك تستمري عليها طول عمرك. راح تتعلمي كيف تاكلين قليل واكل صحي.
والاهم انك تحافظين على اليوم البروتيني بالاسبوع.
خواتي الفاضلات … انا ما راح اكذب عليكم واكول اني مشيت على هذا الريجيم من الاول للآخر … انا عملت ومشيت مضبوط حتى نصف المدة … بس والله نزلت بشكل مو طبيعي وصارلي سنة تقريبا وانا اكل الى ان رجعت دبة مرة ثانية بس انا راح ارجع اسوي وابدي من جديد.
اتمنى ان ما اكون طولت عليكم بس سامحوني والله اريد فايدتكم
الكم مني الف سلام وتحية
ملاحظة : قبل ما تبدون بالريجيم حاولوا تخففون بالاكل لمدة اسبوع على شان ما تشوفوا البداية صعبة.
جزاك الله خير الجزاء وبارك الله فيك واثابك وانار قلبك بنورالأيمان
رائعه في طرحك المميز
الله لايحرمنا منك
ومن روعة حضورك
يارررب انحف بدون شر