السلام عليكم ورحمة الله وبركاته
شخباركم صبايا
>>> ماأعرف في المقدمات
لكذا ندخل في الموضوع على طول
على كثر قرائتي لقسم افتح قلبك
على اني اكتشفت انه اغلب المشاكل تجتمع في نقطه وحده , وهي أنه كل وحده مو راضيه عن حياتها اللي عايشه فيها ..
طيب ليه ؟؟
الرسول صلى الله عليه وسلم قال : ( الله لا يقضي قضاء لمؤمن إلا كان خيرا له ),
وينا عن هذا الحديث ؟!
وينا عن شئ تعلمناه في اولى ابتدائي وهي مراتب الإيمان :
ان تؤمن بالله وملائكته وكتبه ورسله واليوم الأخر وبالقدر خيره وشره
وينا عن هذي الأساسيات اللي المفروض نبني فيها أنفسنا بهذي الدنيا !؟
لازم كل وحده فينا تفهم هذي الأيه قال الله تعالى : ( لقد خلقنا الأنسان في كبد ) أي مشقه وتعب ..۔
كل العالم إلي عايشه على الارض تعاني من مشاكل وتعب ومشقه وهموم , وحزن .. حتى الرسول صلى الله عليه وسلم وهو نبي عليه الصلاة والسلام كانت في مشاكل في حياته , وفي بيته , وحزن على موت زوجته خديجه رضي الله عنها ,, فحنا مو أحسن من نبيا عليه الصلاة والسلام ..
الدنيا هذي كلها يالغاليه خلقت عشان نعبد الله ,, ومن العبادات الرضا بقضاء الله وقدره ايا كان خير أو شر,
إذا كان خير نحمد الله ونشكره ومانتشائم, وإذا شر نتصبر وندعي الله ونكثر من الاستغفار ,,
فكذا خلي شعارك دائما " الدنيا حلوه بس نفهمها "
وحطي تحت نفهمها خطين ,،
يعني مثلا لو فهمتي مسئله مو راح تصير سهلة وتقدرين تحلينها وانتي واثقه ؟؟
هي كذا الدنيا !! أفهميها وراح تمشين فيها وأنتي مرتاحه وواثقه .۔
الشئ الثاني خلي لك قواعد و قوانين في حياتك تمشين فيها
وهالشئ من تجاربي الشخصيه ولين اللحين ماشية فيها وماعمري والله ندمت منها والله يثبتني عليها ,, وإلي هي :
✿ التوكل على الله بكل أموري الصغيره والكبيره .
✿ الأستخارة بكل أمر حتى لما أبغى أدق على فلانه وابغى منها شئ استخير ,, حتى لما أشتري أي شئ استخير .
في شئ خايفه منه أو عليه ,, أستودعه عند الله ,, مثلا كل رابط حق التحميل استودع جهازي منه ,، اللهم اكفيني من شر فلان .
✿ادعي دايما بصلاتي بالقناعه في كل اموري والحمد الله في اشياء كثيييير ناقصتني بس عمرها ماحسستني بالنقص بالعكس احس اني كامله في هذي الدنيا وماني محتاجه شئ .
✿ دايما ادعي اللهم لا تحوجني إلا لك ,, وسبحان الله ربي اغناني في اشياء كثيره
وهذي قصتي لكم,,
كنت دايما اتسلف من عند اختي أغراض وأختي والله انها طيبه بس عندها عيب تخليك تكرهين تاخذين منها شئ ,, تذلك فيه ليين ماتقولين بس
وكنت انا وياها دايما مضاربات على اسلوبها الشين هههههههه
فسبحان الله جا على بالي في يوم من الايام , ادعي هالدعاء اللهم لا تحوجني لأحد إلا لك.
فصرت والله نادرا ولله الحمد ماأطلب من أحد شئ ,, وصاروا بالعكس يتسلفون مني
وفي قصص كثييييره والله في حياااتي لدرجة اني شليت يدي من عباد الله ووكلت أموري له وحده لا شريك له
والله يابنات أنه الله منّ علي بعزه وكرامه ماشفتها قبل ماأقول هالدعاء .۔
اللهم لا تحوجني لأحد إلا لك يارب
اللهم إنا نسألك الثبات على الدين ,, اللهم أني استودعتك ديني
وعلى فكرة كل مشكله مرت عليك او انتي فيها تعتبر فيتامين قوة لك ,, قصص كثيره في هذا المنتدى قرأتها وكانت من وحده كانت حساسة والكل يأذيها وفجاءه صارت شخصيتها ماتهتم في أحد ,, هذا يعتبر شئ حلووو وانه شخصيتها تحسنت وصارت أقوى وأنا منهم ,, كنت حساسة لدرجة ماتتصورونها ,وأحب الضحك واللعب , اما اللحين والحمد الله كثييير تعلمت من هالدنيا ,, وصارت من صفاتي اني احاسب كل كلمة تنزل مني , ومتى وقت اللعب ومتى وقت الجد ,, واني قد تحمل المسؤليه بأذن الله , والأهم من هذا كله قربتني من الله أكثر وأكثر وعرفتني انه هالدنيا حلوه بكل حالاتها ,,
فأقول الحمد الله انه هالمشاكل أنوجدت في حياتي( رب ضرة نافعة )
نصيحتي لكم يالغاليات :
أذكري الله كثيير , وأكثري من الدعاء في الصلاه , ولا تنسون هالدعاء ربنا هب لنا من أزواجنا وذرياتنا قرة أعين وأجعلنا للمتقين إماما ,, رب أجعلني مقيم الصلاه ومن ذريتي ربنا وتقبل الدعاء .
تعلمي انك تتمسكي بس بالله وحده .
اتركي عباد الله ,, تراهم مثلك عبيد لله فقراء مايقدرون على كل شئ ,,
إن الله على كل شئ قدير
والله يابنات إذا فهمتي هذا الكلام فأوعدك – بأّذن الله إنك ترتاحين في حياتك من جميع النواحي..
لأنك وبكل بساطه توكلتي على الله ,, ومن توكل على الله كفاهـ
كفاهـ من كل شئ صغير وكبير ,,
فبعد اليوم خلونا كلنا نبدأ بشعار ~ ✿ ][ الدنيا حلوه بس نفهمها ][ ✿~
~ ✿ وعندنا أمل كبير وتفائل يقول بكرى أحلى ✿~
من أختكم المحبه لكم
حلم العمر عيونه
دعواتكم الحلوه
والله يجعله في ميزان حسناتي ,, ويجعله صدقه جاريه لي ليوم الدين يارب
منقووووووووول وربي كلامها ذهب الله يوفقها 
✿جعله الله في موازين حسناتك يوم لاظل الا ظله✿
✿يعطيك الف عافيه غاليتي✿
✿ننتظر جديدك✿
✿دمتي بخير يارب✿
جزيتي خيراا
منوريييييييين
وجزا الله كاتبة هذا الموضوع خير الجزاء وجعله الله في موازين حسناتها ان شاءالله
وجعله في ميزااااااان حسناتك توكل على الله خير الامور