💔قصيدة راااائعة تحكي عن المخدرات💔 -خواطر 2024.

كلمات لكل من غرق في هذا المجال الخطير (امخدرات) قصيدة جزائرية
* المخدرات
* هذا الدنيا لو كان جات تتعاود** ماذا بيا
* نعاود حياتي ملي بدات حتى للدقيقة هاذيا
* نروح نصلي زوج ركعات نطلب الله يعفو عليا
* أو يغفر** لي كل ما فات ** ونطلب السماح من والديا
* عملتلهم بزاف حاجات ** وكويتهم بشحال من كية
* بابا تعذب** ويما بكات ** ودعوتهم راهي أتبع فيا
* حتى حياتي كامل ولات غير عذاب** وميزيريا
* وين نحلق نلقاها طفات دايما بلية موراها بلية
* طول النهار هايم وين جات ** وندخل للدار غير لعشية
* ندخل غير باش نبات نلقى** يما** تستنا فيا
* أتدخلني غير بالسكات تسكت فيا** وتخبي عليا
* وتخسر عليا زوج كلمات آه يا خسارة التربية
* واش جابت أو** واش ربات واش تعبت** وسهرت عليا
* رجعتها زوج دمعات ** والله** عيب** او خصارة عليا
* يلعن** ديك الساعة بالذات ساعة وحدة لعبت بيّا
* ما ننساهاش طول لحياة تبقى ديما بين عينيا
* فديك الدقيقة لحكاية بدات جاو** ناس دارو بيا
* ندو** ونجيبو** فالحكايات ** وبدات الريحة تجبد فيا
* قالولي** ما جابت ما آدات ذوق** وتشوف شحال خلوية
* أجبد غير وحدة وفرات تشوف كي تنسى هم الدنيا
* قلت** ماعليش نهار او فات ما نضنش بلي تحكم فيا
* أنا الي نحكم فالذات ** وما شي ذاتي ألي تحكم فيا
* الجبدة ولات زوج جبدات من بعد قارو من بعد كمية
* من بعد ولات إذا والات بدات بشوية تكبر الحية
* مناسبات من بعد عادات من بعد زوخ** ورجولية
* من بعد ولات تمشيلي فالذات ولات هي الي تمّشي فيا
* وين نهرب نلقاها جات حتى لعندي تحوس عليا
* وتقابرني فالشدّات حتى نصيبها بين يديا
* تحرقت ولاّت فتات تلوّات** وتستنى فيا
* نجبد وحدة زوج ثلات لتم** تتبدّل العقلية
* نولي نشوف في حاجات عمري ما شفتهم بعينيا
* حياة خير من هاذ لحياة ** ودنيا خير من هاذ** الدنيا
* دنيا وحد وخرا** اتبنات باش تكون مخدومة ليا
* ما فيها عذاب لا معانات لا تعب لا مسؤولية
* وين مان** حب نروح نبات دنيا كامل بين يدّيا
* لحجر تردهم مخدات ** والتراب يوّلي حنين عليا
* نطيح** اونرقد** وين ما جات نرقد** ولمّا نحل عينيا
* نسمع داخل راسي حاجات وكلّي حس يقلق فيا
* ويقول لي هذا ليل** وفات هاذي ليلة فاتت خلوية
* واليوم وين رايح نبات ليلة وحدوخرا** راي تستنى فيا
* ولازملي مخدرات لازم قارو** ولا كمية
* ولا قطرة** ولا حبات ** ولا غبرة المهم هي
* حكمت فيا** ودرك فرات درك خلاص اتطفرت فيا
* العقدة ولات زوج عقدات والدنيا راهي تعقدت عليا
*
* يا نكملها كيما بدات ** ونشوف فيها تقتل فيا
* يا نحبسها كيما جات يا تحبسلي حياتي هي
* مدام لحقت للممات إمّا فيها** ولاّ فيا
* جابلي ربي** باراكات الي خسرتو بزاف عليا
* خسرت** وخسرت بزاف حاجات خسرت كل شي بسبابها هي
* خسرت ربي خسرت الصلاة خسرت الدين** وخسرت الدنيا
*
* خسرت مالي** وصحتي رشات خسرت خاوتي** وخسرت والديا
* خسرت ولاد** وخسرت بنات ولاّو كامل يهربو عليا
* خسرت عمري** وضيعت اوقات وزدت خسرت حتى العقلية
* وبصراحة في ثلت كلمات ولات معنديش شخصية
* حاجة وحدة برك بقات ** حاجة وحدة مزالها حية
* الروح مدام مزالها فالذات نقدر نوقف على رجليا
* نقصد رب المخلوقات ** نسجدلو** وندير النية
* ومدام النية لربي صفات بلا شك راو رايح يسمع ليا
* هو الي يحيي لموات سبحانو** نرفدلو** يديا
* يا مجيب الدعوات ** اهديني واعفو عليا
* وافتح قلبي للصلاة ** وامسح الدمعة من عين والديا
* واعفيني مالمخدرات ** وارفع عنا هاذ البلية
* او نوعدك كيما بدات انحبسها غير بالشوية
* ونعاود نخلف كل ما فات ** ونمد** لروحي صفحة نقية
* ونختم كلامي بالصلاة ** والسلام على خير الأنبيا
* محمد سيد المخلوقات ** والحمد الله على الساعة هاذيا
* فيصل كرشوش كتب لبيات ** ولو لحكاية ماصراتليش ليا
* لكن هذ لحكاية صرات لناس بزاف عزاز عليا**.‬

♥..

المشاركة الأصلية كتبت بواسطة shemo cool راائعه 🙁 🙁 الله يبعد المسلمين عن المخدرات 🙁 ♥..

آمييييين
شكرااااا لمرورك الجميل